30.11.2020

30.11.2020 कार्तिक (कतक) ज़ूनॖ पछॖ (शुक्ल पक्ष) पुनिम (देवादेव) (पूर्णिमा) (देवादॆव) च़ऺन्दॖरवार (सोमवार) श्री सप्तर्षि सम्वत 5096, राश वृष (चलान) ऋतु हेमन्त (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

    महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

               लल वाक्

         (पराग पुस्तक-136)

स्वर्गॖक्य जामॖ त्रऻविथ अलख प्रोवुम

दग़ ललॖनऻवॖम दय सॖन्ज़ि प्रये

पॊत ज़ूनि वऺथिथ मॊत वुज़ॖनोवुम

च़ेन तॖ मालि कुलिस प्यठ न्यॆन्दॖर प्यये

              अर्थात

स्वर्ग के वस्त्र त्याग कर तथा पीडा सहकर अलख पाया और प्रभात के समय उठकर प्रभु का स्मरण करती रही। मानो कि मैं पेड पर सो रही हूं अर्थात मुझे सदा ही जागरूक रहना पडता है। यही शैवमत का शांभव उपाय हे।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

             *********

1. दाब (Pomp and show/Pressure/Force/Control)

2. दातॖ (Who gives generously/Benefactor/Liberal/The creator)

3. दाथ (Metal)

4. दाथुर (Heap/Stack/Accumulation)

5. दाज (Dowry)

                     मुहावरॖ 

1. मु: शाल च़ऺलिथ बठ्यन चोब

    अ: नज़र टऺलिथ रोब हावुन, या

         बऺल्य क्रकॖनाद

2. मु: शाल शाल ब्यॊन ब्यॊन, 

          टुंगि विज़ि कुनि

    अ: ज़ऻती दुशमनी ॴसिथ ति

         इतिफ़ाक आसुन

3. मु: शाल गव क्वलि ज़ि आलम

         गव क्वलि 

    अ: युस मरि तसॖन्द्य किन्य छु 

        दुनिया मरान

            (पनॖन्य शुर्य ह्यॆछॖनऻव्यूख)

**************************

पंचान् :- गोपी नाथ जी दपान ओस फ़ाकॖ अक्सर तॖ वारियाह दरान। ख्यनॖ च्यनॖ किस मामलस मंज़ दपान यि संत ओस नॖ कुनि कुनि सातन ख्यन ख्यवानॖय बऺल्कि दपान म्वगॖल्य तॖ शीर्य चाय ओस खुलॖ डुलॖ च्यवान रोज़ान। गोपी नाथ जीयस प्यठ दपान वारियाह ॳदीबव छु कऻफी फलसफॖ ल्यूखमुत यथ मंज़ ॳम्यसॖन्ज़ जीवनी, ॳम्यसॖन्ज़ सादगी मुतलक छु वारियाह कॆंह आमुत लेखनॖ। वनॖनॖ छु यिवान ज़ि स्वामी गोपी नाथ जियन ओस आध्यात्मिक ज्ञान यूत हऻसिल कॊरमुत तॖ दैव शक्ति यीच़ प्रऻवमॖच़ ज़ि यि ओस हवहऻस ह्यकान ऱवख बदलऻविथ या कऻन्सि हुन्द मृत्यु ओस ह्यकान टऻलिथ। यिति छि दपान ज़ि यि संत छु पनॖनि मायाय शक्ति सॗत्य रुदमुत पनुन रूप धारण करान अकी सातन ब्यॊन ब्यॊन जायन। हालांकि यि शक्ति छि आमॖच़ च़्येनॖनॖ स्वामी नन्द लालस (नन्दॖ बबस या नन्दॖ मॖतिस) मंज़ ति। यिमन कथन मंज़ कोताह पज़र छु यि वनुन छु मुश्किल अल्बतॖ केंच़न भखतन हुन्द विश्वास छु यिमन कथन मंज़ तॖ सोन बऺहस करुन छु म्यॆ बासान बे-मतलब। संत यीत्य ति आमॖत्य छि यथ यथ जायि कऺशीरि मंज़ या ओरॖ योरॖ तिम छि हमेशॖ लूकॖ कल्याणॖ बापथ आमॖत्य। गोपी नाथ जी ति छु तिमवॖय मंज़ अख संत रूदमुत थदि पायुक। गोपी नाथ जी सपुद निर्वान सन्नॖ 1968 ईस्वी मंज़ कऺशीरि श्रीनगर चंदपोरि। गोपी नाथ जीनि नावॖ छि कशीरि तॖ कऺशीरि न्यबर आश्रम आमॖत्य बनावनॖ मसलन खरयारॖ कऺशीरि श्रीनगरॖ, ज्यॆमि, वैशाली गाज़ियाबादॖ, दिल्लि मंज़ द्वन च़्वन जायन, बंगलोरॖ, पूने वगैरा तॖ यिमन आश्रमन मंज़ छु यिवान नित्य पाठ पूजा करनॖ तॖ तमि अलावॖ हवन, होमा बेतरी करनॖ। यिथॖ पऻठ्य वऻच़ अंद स्वामी गैपी नाथ जीयिन जीवनी मुतलक म्यऻन्य कथ। दय कऺरिन्य असि सारिनी पनॖन्य यऻरी, कथ छि जऻरी, दूर गऺछ़िन यि महामऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)