16.11.2020

16.11.2020 कार्तिक (कतक) ज़ूनॖ पछॖ (शुक्ल पक्ष) ऒक्दॊह (देवादेव) (प्रथमा) (देवादेव) च़ऺन्दॖरवार (सोमवार) श्री सप्तर्षि सम्वत 5096, राश वृश्चिक (चलान) ऋतु हेमन्त.....चूंकि पगाह छि द्वय रावान, पगहुक वॊहरवोद यी ॳज़्य।

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

     महामऻरी नाश - मंत्र

जयन्ती मन्गला काली भद्रकाली कपालिनी। दुर्गा ‌क्षमा शिवा धात्री स्वहा स्वधा नमोस्तुते

**************************

            लल वाक्

       (पराग पुस्तक-122)

पानस लऻगिथ रूदुख म्यॆ च़ॖय

म्यॆ च़ॖय छ़ान्डन लूसुतुम द्वह

पानस मंज़ यॆलि ड्यूंठुख म्यॆ च़ॖय

म्यॆ च़ॖय तॖ पानस द्युतुम छ़ोह

             अर्थात

तू तो मेरे अंदर वेष बदल कर रहे और तुझे ढूंढते ढूंढते मेरे दिन बीत गए। जब मैं ने तुझे अपने अंदर देखा तो मैं तेरे साथ मिलकर आनंद लीला करने लगी।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

           *********

1. हातॖ (Compound/A piece of land/An enclosed space)

2. हऻफ़िज़ (Protector/Preserver/Guardian/One who knows the holy Quran by heart)

3. हाल (Welfare/Position/Particulars/Condition/A big or large room)

4. हालि हऻरान् (To be astonished/In bad circumstances/Passing through hard times)

5. हाल बावुन (To express thoughts)

                  मुहावरॖ

1. मु: च़ऻन्गिस तल अनिगॊट

    अ: यॆति कांह चीज़ मॊहिया 

         आसि तति नॖ तम्युक 

         फऻयदॖ वातुन

2. मु: च़ॖतॖ बॖ लॖतॖ बब

    अ: स्यठाह कम तेदाद नफ़री

         या, छ़ॊट अयाल

3. मु: च़िथॖर हय दॊशि वऺर्यस 

         पोशि

    अ: च़िथरस मंज़ रूद प्यॊन छु

         सज़वुन आसान

        (शुर्य पनॖन्य ह्यॆछनऻव्यूख)

**************************

पंचान्ग:- दफ़तरस मंज़ अफ़सरन हॖन्दि दऺस्य ज़्यादॖ तंग करनॖ म्वखॖ तॖ तिहॖन्दि टेनॖ बूज़्य बूज़्य आव परमानंद तंग तॖ द्युतुन नोकरी जवाब तॖ लॊग पूरॖ पऻठ्य साधनाय मंज़ तॖ ब्यूठ अध्यात्मिकतायि छ़ऻन्ड दिनि। दपान परमानंद ओस यिवान नज़रि ज़्यादॖतर कुल्य छ़ायन तल साधनायि मंज़ लीन तॖ ब्यॆयि ओस आसान सादन हॖन्द्यन सत्संगन मंज़। यिम अक्सर पनॖन्य मंडली करान रोज़ान ॴस्य मार्तंन्ड मंदरस मंज़ तॖ परमानंद ति ओस तिमन सॗत्य सॗत्य आसान। शऻयरी करनुक खुमार ओस परमानंदस ज़बर्दस्त तॖ शुरुआतस मंज़ दपान ह्यॆच़ ॳम्य फारसीयस मंज़ शार लेखॖन्य तॖ थॊवुन पनुन क़लमी नाव ग़रीब। मगर कॆंच़ॖ कऻल्य पतय दपान परमाऩन्दन बदलोव पनुन व्यच़ार तॖ ह्यॆतिन कऻशिर्य ज़बऻन्य मंज़ भजन, लीलायि बेतरी लेखॖन्य तॖ पनुन क़लमी नाव ति बदलोवुन तॖ थोवुन पनुन नाव परमानंद। यि संत ओसमुत छु दपान भगवान राम तॖ भगवान कृष्ण सुन्द व्वपासक तॖ ॳम्य प्रऻव महारत भगवत लीलायि लेखनस मंज़ यिम लीलायि स्यठाह मशहूर सपदेयि। ॳम्यसॖन्द्यन बऻतन मंज़ छु रूदमुत संस्कृत लहजि ति कुनि कुनि जायि मगर ॳम्यसॖन्द्य लीख्यमॖत्यन लीलायन मंज़ छु रूदमुत पशपान भक्ति भाव तॖ मॊदुर तॖ मीठ्य लफ़ज़न हुन्द वरतावं। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप" 

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)