14.11.2020

14.11.2020 कार्तिक (कतक) गटॖ पछॖ (कृष्ण पक्ष)) च़्वदह (देवादेव) (चतुर्दशी) (देवादेव) बटॖवार (शनिवार/शनिश्चरवार),श्री सप्तर्षि सम्वत 5096, राश तुला (चलान) ऋतु हरुद (शरद) (चलान)....अज़ छि दीवऻली (दीपावली) ति

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

     महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

              लल वाक्

         (पराग पुस्तक-120)

दीशि आयस दश दीशि तीलिथ

च़ऺलिथ च़ॊटुम शुन्य अदॖ वाव

शिवॖय ड्यूंठुम जायि जायि मीलिथ

शॆह तॖ त्रॆह त्रॊपिमस तॖ शिवॖय द्राव

               अर्थात

दसों दिशाओं में पहुंचकर तथा इनको देख समझ कर मैं पलटकर अपने देश में पहुंच गई फिर तुरंत शून्य को भी पार किया तो शिव को ही सर्वत्र मिला हुआ पाया। छ: और तीन को बंद किया तो अपने में भी शिव ही को पाया।

भावार्थ:- दस इन्द्रियों के देशों को समझ कर जान लिया। उन से हटकर तत्पश्चात तीव्रता से अपने अंतर में शुन्य की अवस्था अर्थात विषय विकारों से शून्य या ऊपर हो गई है और नव द्वार को बंद करके सर्वत्र शिव को ही व्याप्त पाया। अर्थात शिवमय हो गई।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

            *********

1. छडॖ (Unmarried person/A bachelor)

2. छऺतीस (Mean/Condemned person/Miser/Stingy person)

3. छनुन (Fall from a mass/Be reduced)

4. छ़नॖरावुन (To cut)

5. छपुन (To be printed/To scatter/To splash water)

                मुहावरॖ

1. मु: रस मीनिथ तॖ नाटॖ गंज़रिथ

    अ; तूलिथ तॖ मीनिथ,या, कमॖय

2. मु: रऺहदार गुरिस छि पनॖनी 

         कॊठ्य फॖटान

    अ: युस शख़स कऻम करनस 

          मंज़ मऻहिर आसि, तऺस्य

        छि ज़्यादॖ कऻम मटि खसान

3. मु: ज़ामतुर गव पामतुर

    अ: ज़ामतॖरिस युथुय ह्यॊर ब्वन

         गछ़ि तस छु रोज़ान कानि

         तल

**************************

पंचान्ग:- अज़ छि दीवऻली। त्वहि सारिनी छु ॳज़्यकि दुहुक मुबारक। कोरोनावयरस महामऻरी आसनॖ मूजूब तॖ प्रदूशन आसनॖ मूजूब छि टास त्रावनस तॖ पटाखॖ चलावनस ममऻनियत आमॖच़ करनॖ सरकारॖ दऺस्य। मतलब छु ज़ि यॆमि लटि छु दीवऻली मनावनुक चमखम कमॖय पाहन।यॆतिक्यन लूकन मा प्यॆयि फरॖख मगर असि याने कऻशिर्य बटन प्यॆयि नॖ ज़्यादॖ फरॖख कॆंह। ति क्याज़ि कऺशीरि मंज़ ति ओस कऻशुर बटॖ यि द्वह हदस मंज़ रूज़्यथॖय मनावान। बालॖ यपोर यिनॖ म्वखॖ छि तोति सऻन्य शुर्य फ्रख त्रऻविथ दीवऻली द्वह टास या पटाख चलावान। तति ओस फ्रटॖ तम। आंगनन मंज़ॖय ॴस्य ल्वकॖट्य म्वकखट्य टास चलावान तॖ फ्रठ ओस रोज़ान त्यम्बॖर युथ नॖ छ़्यॆयि पशस लगि तॖ नार लगि। बऺड्य पटाख या टास ॴस्य अमूमन यारबलॖ चांदस प्यठॖय चलावान। तत्यन ओस प्यवान हिरासॖ करुन ज़ि युथ नॖ गफलतन यि टास गछ़ि बाहच़ि कुन। हऻन्ज़ ॴस्य नॆरान बाहच़ॖ नमन प्यठ तॖ ॴस्य रऻछ रोज़ान। कुनि कुनि सातॖ ॴस ल्यकॖ ल्यख ति गछ़ान ओरॖ योरॖ। बटॖ ओस ॳज़्यकि द्वह लक्ष्मी हॖन्दिस नावस प्यठ सत्यदीव ति करान। पूर्यन प्रेप्युन हावान तॖ पूर्य ॴस्य यिवान बऻगरावनॖ ति ओरॖ योर। मिठऻय ज़्यादॖ ख्यनस ओस नॖ कऻशुर बटॖ लगान। मिठायि किलो डॊड किलो ॳनिथ सुत्य रलॖमिलॖ मिठऻय तॖ कुनी कॖसमॖच्य मिलऻविथ ॴस्य सऻरीय बटॖ यि दप्यज़ि ति दीवऻली मनावान। ब्यॆयि ॴस्य ज़ालान दार्यन प्यठ च़ऻन्ग्य या मोमबति ज़ऻलिथ ब्यॊन ब्यॊन जायन याने कुठ्य दार्यन, चोकस मंज़, वुज़स मंज़,ब्रांदॖ द्वारस निशॖ प्यठ वगैरा। ब्यॆयि ॴस्य तासा वासा गिन्दान रोज़ान हालांकि यि कऻम ॴस बासनॖ यिवान गन्दॖ कऻम तॖ यूत बॖ त्यूत ओस यिवान परहेज़ॖय कऺरनॖ। अमि द्वह ॴस्य अनान नॊव बानॖ ति कांह कांह गरॖ, काशवॖ, कृछ़, गऺडवॖ थाल वगैरा। कुनुय द्वह दीवऻली हुन्द ओस यिवान मनावनॖ। यॆतिक पऻठ्य पांछ़ द्वह ॴस्य नॖ यिवान मनावनॖ। बालॖ यपोर तऺरिथ गव सोरुय फिरिथॖय।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

*************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)