15.11.2020

15.11.2020 कार्तिक (कतक) गटॖ पछॖ (कृष्ण पक्ष) मावस (देवादेव) (अमावस्या) (देवादेव) आथवार (रविवार/ऐतवार),श्री सप्तर्षि सम्वत 5096, राश वृश्चिक (दुहचि 11.57 बजि प्यठॖ) ऋतु हरुद (शरद) (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

       महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

              लल वाक्

         (पराग पुस्तक-121)

द्वादशांत मंडल यस दीवस थजि

नासिकॖ पवन दऻर्य अनाहत रव

स्वयम कलपन अनतिह च़जि

पानय सु दीव तॖ अरचुन कस

              अर्थात

जो सांस खेंचकर द्वादशांत मंडल या ब्रहमॖरंथ (सहस्रार में जो देवं का स्थान है) में अनाहत शब्द एवं प्रकाश का अनुभव करता है, स्वयं ही उस की कल्पनाऐं समाप्त अर्थात शांत हो जाती हैं। स्वयं वही देव है। जब इस तथ्य का आभास हो गया हो तो फिर पूजा किस की करनी।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

             *********

1. छफ (Hurry/Eager/Haste/Quickness)

2. छपि (Sacrifice)

3. छत ( Roof' ceiling/House top)

4. छज (barge of cock/Peacock/Shade)

5. छरुन (To shit)

                 मुहावरॖ

1. मु: ज़ाम हय आसि गामॖ तति

         प्यठॖ सोज़ि पाम

    अ: ज़ाम यॊदवय दूर ति आसि 

          तोति छॆ नॖ थफ तुलान

2. मु: ज़ान छि जहान्

    अ: रसूख वऻलिस छु प्रथ कांह 

         फऻयदॖ मेलान

3. मु: ज़ात कवो रऻवॖय ज़चलो

         वऻन्स कवो रऻवॖय छ़ॊचरो

    अ: ग़रीबी छि ज़ाथ रावरावान

         तॖ छ़ॊटि सॖन्ज़ वऻन्स छॆ नॖ

         पता लगान

        (पनॖन्य शुर्य ह्यॆछॖनऻव्यूख)

**************************

पंचान्ग:- अज़ करव ब्यॆयि ॳकिस संत सॖन्ज़ कथ बाथ यस नाव छु परमानन्द। सनॖ 1794 ईस्वी मंज़ कऺशीरि सीर्यकानिल गुन्ड, अनन्तनागॖ ज़ामुत यि शखॖस यस नाव ओस पंडित आनन्द राम परमानन्द। लोलॖ सान ॴस्य ॳमिस वनान परमानन्द। यि ओस अख नामावार शऻयिर तॖ सॗती ओस बन्योमुत अख संत ति। यि ओस भक्ति बऻथ लेखनॖ बापथ ज़ानॖनॖ यिवान। ॳम्यसुन्द क़लमी-नाव ओस परमानन्द। ॳम्यसुन्द मोल ओस अख पठवऻर्य यस नाव ओस  कृष्णा पंडित। शुरु शुरुहस मंज़ ॴस परमानन्दन पनॖन्य तऻलीम पनॖनिस मऻलिस निशी ह्यॆछमॖच़।तमि पतॖ पॊर परमानन्दन फ़ारसी, संस्कृत तॖ उर्दू। स्कूलॖच विद्या हऻसिल कऺरिथ कॊर परमानन्दन खान्दर तॖ ॳम्य सॖन्ज़ि ज़नानि ओस नाव माल द्यद मगर बदकॖस्मती मूजूब दपान परमानन्दॖन्य ज़नान ॴस बद-मिज़ाज़। ॳम्यसॖन्ज़ यि ज़नान ति छि ॴसमॖच़ ॳम्यसॖन्दी गामॖच।  कृष्णा पंडित सॖन्दि स्वर्गॖवास गछ़नॖ पतॖ दपान परमानन्दस मीज्य मऻल्यसॖन्दिस दफ़तरस मंज़ॖय नोकरी ति। ॳमिस मीज्य पठवऻर्यसॖन्ज़ पदवी ।दपान ॳम्य कऺर यि नोकरी स्यठहॗय ईमानदऻरी सान तॖ इन्सऻनियत किस बलबूतस प्यठ। वनॖनॖ छु यिवान ज़ि कऻन्सि कऻन्सि ग़रीब सुन्द ज़मीनी-जऺज़ियि याने लैंड रॆविन्यू छु परमानन्दन पनॖनि चन्दॖ दिथ सरकारस वातनोवमुत तॖ तिथॖपऻठ्य आमुत ओस यि ग़रीबन मदद करान। यि स्लूक ओस नॖ दफ़तरस मंज़ ॳम्यसॖन्द्यन अफ़सरन व्यच़ान कुनि तॖ न ओस गरस मंज़ ॳम्यसॖन्ज़ि ज़नानि व्यच़ान। नतीजतन ॴस्य परमानन्दस सऻरी तंग करान, टेनॖ करान गरि ति तॖ परि ति मगर परमानन्द रूद पनॖनिस असूलस प्यठ दृढ तॖ डऺटिथ तॖ रूद ईमानदऻरी तॖ इन्सऻनियतुक परचमॖ थॊद थऻविथ। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)