09.11.2020

09.11.2020 कार्तिक (कतक) गटॖ पछॖ (कृष्ण पक्ष) नवम (देवादेव) (नवमी) (देवादेव) च़ऺन्दॖरवार (सोमवार), श्री सप्तर्षि सम्वत 5096, राश सिहं (दुहचि 8.41 बजि प्यठॖ) ऋतु हरुद (शरद) (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

        महामऻरी नाश - मंत्र

जयन्ती मन्गला काली भद्रकाली कपालिनी। दुर्गा ‌क्षमा शिवा धात्री स्वहा स्वधा नमोस्तुते

**************************

            लल वाक्

       (पराग पुस्तक-115)

तंथॖर गलि तय मंथॖर म्वच़े

मनथॖर गॊल तय मॊतुय च़्यथ

च़्यथ गॊल तय क़ॆंह तिना कुने

शुन्यस शुन्या मीलिथ गव

              अर्थात

तंत्र (शिव संबन्धी ‌साहित्य या शास्त्र पढने के बाद) समाप्त होने के बाद मंत्र जपना शेष रहता है। मंत्र जपने की क्रिया के बाद चित शेष रहता है। चित के लीन होने पर शून्य ही रहता है। अर्थात परम शिव ही शेष रहता है और चेतन के संग चेतन लय हो जाता है।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

             ********

1. चपाथ (Slap/Blow)

2. चपॖ (Used to row a boat/Hand length/A measure of four fingers/A span)

3. चपॖन्य (Sandal/Slipper/Foot wear)

4. चटपट (Quickly/Instantly/Without delay)

5. चटऻय (Mat/Palm mat/Date mat/Coconut mat/Grass mat)

               मुहावरॖ

1. मु: द्रास ह्यॆनि म्यूलुम नॖ द्रास

         कॖनॖनि पॊकुम नॖ

    अ: यॆलि प्रथ अंदॖ मोयूसी 

         लबनॖ यी

2. मु: दऺर्यावॖ निवान कांह आब

         बूत्यमार दिवान बुथि बुथि

    अ: अखा छु ॴश करान 

        ब्यॆयिस छु यिवान अज़रवुन

3. मु: द्राग च़लि तॖ दाग़ च़लि नॖ

    अ: सख्ती छि हमॆशॖ याद 

          रोज़ान

         (शुर्य पनॖन्य ह्यॆछनऻव्यूख)

**************************

पंचान्ग:- ओंकार नाथ जियिनि जंत्री मुतलक छि कथ चलान। यॊदवय तॊह्य वुछिव जंत्री मुच़रऻविथ, ग्वडनिक्न पांच़न सफन प्यठ छु लीखित 'विषय सूचना', 'इनको भूलिए मत', 'कार्यालय के बारे में', शॆयमि सफॖ प्यठॖ अखत तॖ अकतऻजी सफस ताम छि ब्यॊन ब्यॊन पाठ आमॖत्य छापनॖ, यिम छि तिमय पाठ यिम प्रथ वऺरियि ॳस्य अथ जंत्री मंज़ वुछान छि कुनि बदलावॖ रॊस्तुय।   यिम पाठॖ किताब छि अलग अलग ति मेलान रोज़ान। ॳकि फिरि ॳनिथ छि तिम पाठॖ किताबॖ पूजा गरस याने ठोकुर कुठिस मंज़ यिवान थवनॖ रऺछ़रऻविथ। जंत्री छि रोज़ान बदलान प्रथ वऺरियि तॖ कॆंच़ॖ कालॖ पतॖ छि यिम जंत्री यिवान कॖनॖनॖ कबऻडिस तॖ सु छु मिलनावान रोज़ान यिम जंत्री कूडस सॗत्य याने सोन यि ल्यूखमुत धर्म शास्त्री अर्थात पाठ मंत्र वंत्र छि मेलान रोज़ान कूडस सॗत्य युस स्यठहॗय ग़लत छु। जंत्री मंज़ युस सानि बापथ ज़रूरी छु सु गव पंचान्ग। यि पंचान्ग छु छऻपिथ सफॖ 311 प्यठॖ सफॖ 336-हस ताम, ब्यॆयि छु कॆंच़न सफन प्यठ मुहूर्त प्रकरन,, प्रेप्युन, ग्रुहुन वगैरा  हऻविथ तॖ बकाया सफन प्यठ ल्यूखमुत फलसफॖ छु सानि समजॖ न्यबर। न छु सु असि यिवान समॖज तॖ न छु कांह समजावन वोल समखान। अम्युक मतलबॖ गव ज़ि असि प्यठ छि जंत्री ज़बर्दऺस्ती यिवान पुशरावनॖ। असि छु सिरिफ पंचान्ग तॖ ब्यॆयि बदलवॖन्य चीज़ याने मुहूर्त प्रकरन वगैरा योत आसुन युस तस पंच़ाह शॆठन सफन मंज़ मी हावनॖ। 422 सफॖ वाज्यन जंत्री सॗत्य असि करुन क्या। तुहॖन्ज़ राय छुस बॖ यछ़ान ज़ानॖन अथ कथि मुतलक।  कथ छि जऻरी दय कऺरॖन्य असि यऻरी। दूर गऺछ़िन महामऻरी।

************************** 

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)