07.11.2020

07.11.2020, कार्तिक (कतक) गटॖ पछॖ (कृष्ण पक्ष) शॆयम (देवादेव) (षष्ठी) (देवादेव) बटॖवार (शनिवार/शनिश्चरवार) श्री सप्तर्षि सम्वत 5096, राश कर्कट (चलान) ऋतु हरुद (शरद) (चलान)...चूंकि अज़ छि दॊयिम शॆयम रातुक वॊहरवोद यी अज़

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

               लल वाक्

         (पराग पुस्तक-113)

त्रेशि ब्वछि मो क्रेशनावुन

यान्य छ़्ययिह तान्य संदारुन दीह

फ्रठ चोन दारुन तॖ पारुन

कर व्वपकारुन सय छय क्रय

            अर्थात

भूख प्यास से अपने जीवात्मा तथा शरीर को मत तडपाओ। जब निर्बल हो जाए तो इसे स्वस्थ तथा स्शक्त बनाओ। जिस हठ क्रिया से शरीर को पीढा पहुंचे वैसी क्रिया करने पर तुझे धिक्कार है। मन में उपकार की भावना रखनी चाहिए वही सच्ची क्रिया है।

भावार्थ:- शरीर को भूख प्यास से तडपाना धिक्कार की बात है। अन्य लोगों का उपकार करते हुए अपने शरीर का भी ध्यान रखना चाहिए। वही सच्ची क्रिया है

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

            *********

1. चऻन्द्य (Silver/Wealth/Gain/Profit)

2. चऻल्य (Excessive self esteam/Position of superiority)

3. चाक (Chalk)

4. चाख (Cutting/A stroke with a sword/Knife/Blade/Etc.

5. चारवऻय ( Cattle/Animal)

               मुहावर

1. मु: दब हा लॊगुय पांछ़ क़दम 

         आयि नफा

    अ: मुसीबतस मंज़ पानस

          तसला द्युन

2. मु: दॊपहऻस आबस गछ़ तॖ 

         गव खॊशकस, दॊपहऻस

         खॊशकस गछ़ तॖ गव

         आबस

    अ: सु नफ़र युस नॖ ज़ांह कांह

          कऻम आसि स्यॊद करान,

          या अदलॖ बदल

3. मु: दफतम तॖ पकय

    अ: तस मुतलक वनान युस

         पऻन्य पानॖ कांह कऻम 

        आसि नॖ करान, या, बॆहवाल

          (पनॖन्य शुर्य ह्यॆछॖनऻव्यूख)

**************************

पंचान्ग:- कथ वऻच़ चलान उतरॖ प्यठॖ जंत्री मुतलक। अज़ करव ॳस्य पंडित ओंकार नाथ जीयनि जंत्री मुतलक कथ। पऺत्यम्यव दॊयव च़ोरव वऺरियव प्यठॖ आव वुछनस तल ज़ि ॳम्यसॖन्ज़ि जंत्री मंज़ छि कुनि कुनि सातन कॆंह ग़लती आसान रोज़मच़ॖ पंचान्गस मंज़ याने तिथि, वार या ब्यॆयि कॆंह।  तिम गलती छि असि ननान तॆलि यॆलि ॳस्य वुछान छि पुनीत जियिन जंत्री याने दॊयिम जंत्री। दोयव जंत्रीयव मंज़ॖ कुस हिश छि ग़लत आसान तम्युक फऻसलॖ छि नॖ ह्यकान ॳस्य कऺरिथ मगर कॆंह ज़ाननवऻल्य या पठित ब्रह्मन छि सोन ह्यस पावान तिमन कथन कुन विज़ि विज़ि। मगर वुछनस तल आव  वुन्युखताम यि ज़ि ओंकार नाथनि जंत्री मंज़ छि ज़्यादतर ग़लती रोज़ान आमच़ॖ यॆमि मूजूब ॳम्यसॖन्ज़ जंत्री परनवऻल्य ॳस्य आम लूख छि परेशान गछ़ान। म्यॆ दिच़ेये मंज़ॖ अख राय ज़ि असि पज़ि अथ जंत्री थख द्युन कॆंच़स कालस तॖ असि पज़ि वरतावॖन्य पुनीत जीयिन जंत्री याने अकॖय जंत्री ताकि यि गलतीयन हुन्द भ्रम गछ़ि दूर तॖ ॳस्य गछ़व नॖ सोंचनस प्यठ मजबूर ज़ि हु छा ठीख किनॖ यि छु ठीख। दॊयिम कथ छि अथ जंत्री मुतलक म्यॆ करॖन्य यि ज़ि असि कयाज़ि छि प्यवान यीच़ बऺड जंत्री प्रथ वऺरियि मऺल्य ह्यॆन्य। असि छु कीवल पंचान्गॖय योत प्यवान वुछुन तॖ ब्यॆयि ल्वकॖट्य म्वकॖट्य ज़ॖ त्रे चीज़ मसलन मुहूर्त, ग्रुहुन, प्रेप्युन वगैरा। बकाया छ सोरुय विवरन  गरन मंज़ मूजूद। अथ मुतलक करव ब्रोंहकुन कथ। कथ छि जऻरी। मऻज्य दीवी कऺरॖन्य असि सारिनी यऻरी। दूर गऺछ़िन यि महामऻरी। 

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव। 

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)