19.11.2020

19.11.2020 कार्तिक (कतक) ज़ूनॖ पछॖ (शुक्ल पक्ष) पऻन्च़म (पऺचमी) ब्रसवार (वीरवार/ बृहस्पतिवार/गुरुवार) श्री सप्तर्षि सम्वत 5096 राश मकर (दुहचि 3.29 बजि प्यठॖ) ऋतु हेमन्त (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

       महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

              लल वाक्

         (पराग पुस्तक-125)

मद पिवुम सिन्धु ज़लन येतु

रंगन लीलिम्य क्यॆम केच़ा

कॗत्य ख्ययम मनुशि मामसॖक्य नऺल्य

स्वय बॊह लल तॖ गव म्यॆ क्याह

              अर्थात

ललेश्वरी अपने पिछले जन्मों का उल्लेख करती हुई कहती है कि मैं ने मधु की तरह सिंधुओं का (अनेक स्थानों पर जलचर के रूप में) जल पिया, अनेक रंगों के कीडों के साथ उन्ही के रंग में रंगकर मैं ने कितने ही मनुष्यों की अस्थियों का मांस खाया। अब ईस समय भी मैं वही लल हूं फिर मेरी यह दशा क्यों हुई है।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

              ********

1. हऻदिसॖ (Accident/Adventure/Misfortune/Calamity)

2. हऻसिद (Jealous/Jealous person)

3. हऻकिम (Ruler/Commander/Officer)

4. हऻकिम आला (Higher authority/The supreme)

5. हऻरथ (Perplexed of one's wits end/Wonder/Confusion/Amazement/

Astonishment)

                 मुहावरॖ

1. मु: च़ॊर नच़नॖ यिवान ग्यूरुय

    अ: कुनि चीज़ॖच ज़्यादॖती छि  

          फऻयदॖ बदलॖ न्वकसानॖय

          वातॖनावान

2. मु: च़ऺरिस गाटॖलिस छु च़ॊर खुर

    अ: ज़्यादॖ कऻकी छि ज़्यादॖ 

          परेशऻनी पऻदॖ करान

3. मु: च़रि हुन्द वांठ कोताह छु

    अ: कम जिगरॖ आसुन, या, 

          जुर्रतमंद न आसुन,या,

          खॊच़ॖ बुड

           (पनॖन्य शुर्य ह्यॆछॖनऻव्यूख)

**************************

पंचान्ग:- कऺशीरि मंज़ ओस थदि पायुक अख संत यस नाव ओस विद्याधर।  कऺशीरि मंज़़ श्रीनगरॖ स्वथि शीतलनाथॖ दपान ओस ज़न्मस आमुत यि शखॖस सन्नॖ 1885 ईस्वी मंज़। ॳम्यसॖन्दिस मऻलिस ओस नाव गणकाक राज़दान तॖ माजि ओसुस नाव हारॖमाल। तिमव ओस ॳमिस शुरिस नाव थोवमुत व्यदॖलाल। यॆलि यि बच्चॖ शु वुहुर वोत, ॳम्यसॖन्दिस मऻलिस सपुद देहान्त तॖ ॳम्यसॖन्ज़ पर्वरिश दपान कऺर ॳम्यसॖन्द्य पॆतरन, यस नाव ओस पंडित गोपी नाथ। यॆलि यि व्यदॖलाल पंदह वुहुर वोत तॖ ॳमिस कॊरुख खान्दर ऋश्य काक कौल सॖन्ज़ि कोरि सॗत्य यॆमिस नाव ओस पद्मावती। ल्वकॖचारस मंज़ दपान व्यदलाल जियन कऺर धार्मिक विद्या प्राप्त द्वन ग्वरन निश, ॳकिस ओस नाव पंडित माधव जुव तॖ दॊयमिस ओस नाव पंडित राजकाक। ॳम्य दपान कॊर पास प्राज्ञा तॖ विशारदा पंजाब विश्विद्यालय लाहौरॖ प्यठॖ। ग्वडॖ प्यठय दपान ॳमिस ओस अध्यात्मिकताय सॗत्य लगन तॖ यि ओस धार्मिक काम्यन मंज़ स्यठाह यछ़ बरान। यिम ग्वन आसनॖ म्वखॖ दपान यि बन्यव स्वामी राम जीयुन शिष्य। स्वामी राम जी दपान ओस तमि वख्तुक थदि पायुक संत तॖ तऺम्य छि दपान दिच़ॖमॖच़ धार्मिक विद्या स्वामी महताब काकस तॖ स्वामी गोविंद कौल सऻबस। शास्त्राथ ह्यॊछ व्यदलालन स्वामी राम जियस निश तॖ तऺम्य दपान द्युत ॳमिस शिव व्वपासनायुक ज्ञान तॖ ह्यॆछनोवुन शैव साधना यथ मंज़ व्यदलाल जी ह्यॊतुन स्यठाह लीन गछ़ुन। वारॖ वारॖ गव यि यॆमि सम्सारकि लॊह लंगरॖ निशि ब्यॊन गछ़ान तॖ ओस पनॖन्य साधना करान ॳकिस बंद कुठिस मंज़ बिहिथ। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"  

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)