27.11.2020

27.11.2020 कार्तिक (कतक) ज़ूनॖ पछॖ (शुक्ल पक्ष) बाह (देवादेव) (द्वादशी) (देवादेव) शॊकुरवार (शुक्रवार/जुम्मा) श्री सप्तर्षि सम्वत 5096, राश मेष (चलान) ऋतु हेमन्त (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

   महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

             लल वाक्

        (पराग पुस्तक-133)

श्यह वन च़ऺटिथ श्यशकल वुज़ॖम

प्रक्रथ हॊज़ॖम पवनॖ सॗतिय

लोलॖकि नारॖ वऻन्लिज वुज़ॖम

शंकर लॊबुम तमिय सॗतिय

           अर्थात

छ: भूमिकाएं पार कर के श्यशकल (सहस्रार में निकलने वाला अमृत जो सारे शरीर को आनंदित करता है) फूट पडी और प्रकृति को प्राणायाम से निर्मल बनाया। प्रभु प्रेम की अग्नि में अपने को भस्म किया तभी शंकर को पा लिया।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

              *******

1. खऻर खा (Well wisher/A friend)

2. खऻसियत (Characteristic/Feature/Quality/Habit/Properly/Speciality)

3. खासकर (Especially/Chiefly/Particularly)

4. खऻली (Empty/Void/Vacant/Vacated/Unoccupied/Blank/Only/Merely)

5. खऻली गछ़ुन (To be empty).   

                मुहावरॖ

1. मु: स्वर्फॖ सॖन्ज़ॖ सथ ज़्यवॖ

    अ: दोखॖबाज़ इन्सान, या, फंद

         बाज़, या, युस नॖ डंजि रोज़ि

2. मु: सरा ड्यूंठुम सारिवॖय ख्वतॖ

         बॊड, तेल फॊल वात्यस नॖ

         ओड

    अ: न्यॆबॖर्य बॊड बारॖ अमापॊज़

         ॳन्दॖर्य नॖ व्यपन बानॖ

3. मु: सरस सरपोश

    अ: राज़ पर्दस तल थवुन

       (शुर्य पनॖन्य ह्यॆछनऻव्यूख)

**************************

पंचान्ग:- यॆमि कऺशीरि प्यठॖ कऻशिर्य बट्टॖ च़ऺलिथ आयि अज़ अकत्रॖह वऺरी ब्रोंठ याने 1990-तस मंज़ खोफॖज़द गऺछ़िथ स्व कऺशीर ॴस वखतॖ अकि साधु संतव सॗत्य मालामाल। तिहॖन्दिस ॴशिर्वादस तल ॴयि कऻशिर्य बट्टॖ पनॖन्य संस्कृति तॖ संस्कार सऺद्ययव प्यठॖ रऺछ़रावान मगर कत्यथताम छि क्वसताम कऺमी रूज़मॖच़ असि कऻशर्यन या केंह पाफ कऺर्यमॖत्य या पनॖनिस धर्मस लॊच़र द्युतमुत यम्युक फल या खऺम्याज़ॖ प्यव असि भुगतुन तॖ ततिक मुसलमान आयि राक्षस रूपस मंज़ तॖ च़ऺलॖरऻविख ॳस्य दहशथ पऻदॖ कऺरिथ, सान्यन बायन ब्यॆन्यन क़तॖल कऺरिथ, सान्यन गरन लूठ कऺरिथ, गरन ज़ॊंग दिथ तॖ बनऻवॖख स्व सऻन्य मऻज्य कऺशीर दोज़ुख य्यॊस कऺशीर ऋश्यवऻर ॴस आमॖच़ मानॖनॖ। तिमन ऋश्यन हॖन्द्य ग्वन, तिहॖन्द्य कऺरिशमॖ तॖ करामऻच़ गछ़न नॖ असि ता उम्र मऺशिथ। कऺशीरि न्यबर 1990--तॖ प्यठॖ यिम सऻन्य शुर्य ज़न्मस आयि, पलेयि बडेयि कऺशीरि न्यबर तिमन छि म्यॆ बासान च़्यॆनॖवॗन्य दिन्य ज़ि ॳस्य कमि ऋश्यवारि प्यठॖ आयि नीरिथ तॖ आयि छऺकरावनॖ पनॖनिसॖय वतनस मंज़ यॆत्यन तॖ हुत्यन। तिमन ऋश्यन मुनियन साधु संतन, महानुभायन, ज्ञऻनियन तॖ पंडितन सॗत्य वऻकफियत करनावॖन्य छि अंसि ज़िठ्यन हुन्द कर्तव्य तॖ फर्ज़ॖ अवलीन बनान तॖ यिम पनॖन्य शुर्य छि मिलनावॖन्य ब्यॆयि अकि फिरि पनॖनि रऻवमच़ि संस्कृति तॖ संस्कारन सॗत्य। म्यॆ छु विश्वास यिमन ऋश्यन तॖ महाप्वरुषण हॖन्ज़ॖ जीवनी बूज़िथ तॖ पऺरिथ ह्यन पकन सऻन्य शुर्य स्यॆदि वति, धर्मॖचॖ वति तॖ रोज़न संतन हॖन्दिस सायस तल पनुन पान तिमनॖय पुशरऻविथ। बॖ छुस यॆमि सबकॖ दऺस्य पऺत्यम्यव केंच़व दॊहव प्यठॖ संतन हॖन्ज़ॖय कथ करान।  यिथुय ब्याख अख थदि पायुक संत छु कऺशीरि मंज़ ओसमुत यस नाव छु स्वामी गोपी नाथ जी। यि छु ज़ामुत कऺशीरि श्रीनगरॖ बानॖमऺहल्लॖ सन्नॖ 1898 ईस्वी मंज़ तॖ निर्वान सपुद 1968-हस मंज़ श्रीनगर चंदपोरि।1898 प्यठॖ 1968-हस ताम याने ॳम्युसुन्द सतथ वऺरियन हुन्द आध्यात्मिक सफ़र वुछव पगाह। कथ छि जऻरी। दय कऺरिन्य पनॖन्य यऻरी तॖ दूर गऺछ़िन यि महामऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)