20.11.2020

20.11.2020 कार्तिक (कतक) ज़ूनॖ पछॖ (शुक्ल पक्ष) शॆयम (षष्ठी) शॊकुरवार (शुक्रवार/ जुम्मा) श्री सप्तर्षि सम्वत 5096 राश मकर (चलान) ऋतु हेमन्त (चलान)...अज़ छि कुमार शॆयम (कुमार षष्ठी) ति

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

     महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

             लल वाक्

       (पराग पुस्तक-126)

मकरस ज़न मल च़ॊलुम मनस

अदॖ म्यॆ लऺबॖम ज़नस ज़ान

सुय यॆलि ड्यूंठुम निशि पानस

सोरुय सुय तय बो नो कॆंह

             अर्थात

जब मेरे मन के शीशे का मैल समाप्त हुआ तो मैं ने स्वात्म को जान लिया। उस शिव को जब अपने पास ही देखा तो पाया कि वही सब कुछ है और मैं कुछ भी नहीं। अर्थात मन से मैल उतर जाए तो ईश्वर की पहचान हो जाती है। और वही सर्वत्र दिखाई देता है।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

             *********

1. हऻर्यसाथ (Happenings/Adventures/Misfortunes/Calamity)

2. हऻशियि (Margin/Border)

3. हऻशयि बरदार (Fellow traveler)

4. हऻसिल (Achievement/Gain/Profit/Produce)

5. हऻसिल करुन (To get/To gain/To learn/To obtain)

               मुहावरॖ

1. मु: छ़ऺरी मऺट छि वज़ान

    अ: न आसनस मंज़ ज़्यादॖ 

         आसनॖक्य दम दिन्य

2. मु: च़कि तलॖ कडॖन्य कथ

    अ: राज़ मोलूम करुन

3. मु: च़लॖ हऻ च़ानि दादि च़ॖ ह्यथ

         सॗत्य

    अ: यस निश तंग यी सुय 

          सॗत्य सॗत्य

       (शुर्य पनॖन्य ह्यॆछनऻव्यूख)

**************************

पंचान्ग:- स्वामी राम जी सपुद स्वर्गवास सन्नॖ 1915 ईसवी मंज़ तॖ तऺम्यसुन्द यि शिष्य, व्यदॖलाल गव बेचैन तॖ बेक़रार पनॖनिस ग्वरस बगऻर। सन्नॖ 1919 ईस्वी मंज़ दपान व्यदलाल जियन त्रोव गर संसार तॖ ह्यॊतुन फ़ेरुन जायि जायि ईश्वरस छ़ऻन्ड दिनि। यि वोत थऺज्यवोर (व्यॆजब्रऻरिस नखॖ), कमलावन (त्राल) तॖ सथू शीतल नाथ य्यॊस ॳमिस पनॖन्य जाय ॴस। हालांकि दपान पनॖनि जायि ओस आमुत विद्याधर स्वामी महताब काकनिस वनॖनस प्यठ मगर दपान ॳमिस आव नॖ अति वार ज़्यादॖ कालस बेहनस, यि दपान गव वापस त्राल तॖ नच़ान फ़ेरान रूद तॖ वोत साली यॆति यि रूद पंडित प्रसाद जुअस सॗत्य कॆंच़स कालस। वनॖनॖ छु यिवान ज़ि ॳमिस ओस नॖ ॳकिस जायि बिहिथ क़रार यिवान। ॳथ्य बेकरऻरी हॖन्दिस आलमस मंज़ दपान विद्याधर सऻब वोत कथ ताम वनस मंज़ यॆति सु ब्यूठ साधना करनि अलग थलग। दपान असली आत्मॖज्ञान म्यूल विद्याधर जियस ॳथ्य वनस मंज़ तॖ यि राज़ नन्यव ॳकिस गुजरिस युस यिवान गछ़ान वुछान ओस ॳमिस साधनायि मंज़ लीन। दपान तऺम्य वुछ कॆंह चमत्कार तॖ सु बन्यव ॳम्यसुन्द सेवक। तऺम्य कऺर शॆछ अमि वनॖ न्यबर कुल शहरस मंज़। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)