12.11.2020

12.11.2020, कार्तिक (कतक) गटॖ पछॖ (कृष्ण पक्ष) बाह (द्वादशी) ब्रसवार (वीरवार/ बृहस्पतिवार/गुरुवार), श्री सप्तर्षि सम्वत 5096, राश कन्या (चलान) ऋतु हरुद (शरद) (चलान)

*************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

       महामऻरी नाश -  मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

               लल वाक्

          (पराग पुस्तक- 118)

दमादमॖ कॊरमस दमन हाले

प्रज़ल्योम दॗफ तॖ ननेयम ज़ात

अंदरिम प्रकाश न्यबर छ़ॊटुम

गटि रॊटुम तॖ कऺरमस थफ

             अर्थात

जिस प्रकार लोहार खाल में वायु भरकर आग में धातों को तपाता है, इसी प्रकार मैं ने परिश्रम से बार बार प्राणायाम की क्रिया की जिस से मेरे अंदर ज्ञान दीप प्रदीप्त हुआ तथा मुझे अपने वास्तविक रूप का ज्ञान हुआ कि मैं यही हूं। अंदर प्राप्त हुए ज्ञान प्रकाश को मैं ने बाहर छलकाया अर्थात व्यवहार में लाया और बाहर के अंधकार रूपी अज्ञान को समाप्त किया।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

              *********

1. छॊत (Grey)

2. छॊन (Without/Empty/Vacant)

3. छॊम्बुन (To thrash (grain))

4. छऺच़रावुन (To abuse/Admonish/Reproach)

5. छोंफ (Churner)

                मुहावरॖ

1. मु :रातस वॊनमय लऻल नामॖ 

         सुबहऻस दॊफथम लऻल 

         क्याह वाति मॊजॖलूनस

    अ: फिकिरी तऻर्य तऻर्य ति नॖ

         फिकिरी तरुन

2. मु: रऻछस दॊहा तॖ च़ूरस गऺरा

    अ: वुम्रि हॖन्ज़ रऻछ छि रछ़ा 

         ग़फलऺच़ किन्य क्वलि

         गछ़ान

3. मु: रब तॖ सब हिशी कथा

    अ: यॆलि रॖतिस तॖ कृतिस

          फरखॖय रोज़ि नऺ

      (पनॖन्य शुर्य ह्यॆछॖनऻव्यूख)

**************************

पंचान्ग :- मस्त राम या मस्त बब नाव दपान आव दिनॖ सोहन लाल जियस स्वामी नन्द लाल जीयनि दऺस्य तॖ मस्त बब आव ज़ानॖनॖ स्वामी मस्त राम या स्वामी मस्त बब। लगातार च़्वन वऺर्यन दपान कऺर मस्त बबन सीवा पनॖनिस ग्वरस स्वामी नन्दलाल जियस 1964 प्यठॖ 1968 ताम। स्वामी नन्दलाल जीनि निर्वान गछ़नॖ पतॖ ओस स्वामी मस्तॖ बब पनॖनिस ग्वरॖसॖन्ज़ि यछ़ायि मुतऻबिक हुशरु आश्रमॖच देख रेख करान। दपान स्वामी मस्त बबस आव क्याहताम अध्यात्मॖक गॖर तॖ ॳम्य बनावनोव माजि रऻज्ञन्याय हुन्द मन्दर बऻद्यपोरॖ। यि मन्दर दपान आव बनावनॖ सिरिफ भक्तन हॖन्दि सहयोगॖ सॗत्य। अमि पतॖ दपान बनावनोव ॳम्य ब्याख आश्रम ज्यॆमि पटोली मंज़। अथ आश्रमस ति छु रूदमुत मस्त बब सॖन्द्यन शिष्यन हुन्दॖय सहयॊग तॖ यॊगदान। अमि अलावॖ छि मस्त बबॖन्य आश्रम बनेमॖत्य हरिद्वारॖ, दिल्लि मंज़ करालाहस मंज़ तॖ उतर प्रदेशस मंज़ शालमऻर गार्डनॖ। यिमन आश्रमन मंज़ छु अज़कल वार्षिक हवनॖ यिवान करनॖ तॖ तमि मऺज़ीद छु नित्य सुब शाम पूज़ा पाठ तॖ भजन कीर्तन चलान रोज़ान। कथ छि जऻरी। मऻज्य दीवी कऺरिन असि सारिनी पनुन अथॖरॊट तॖ कऻसिन जलदॖय यि कोरोनावयरस महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)