11.11.2020

11.11.2020, कार्तिक (कतक) गटॖ पछॖ (कृष्ण पक्ष) काह (एकादशी) ब्वदवार (बुद्धवार) श्री सप्तर्षि सम्वत 5096, राश कन्या (दुहचि 12 बजे प्यठॖ) ऋतु हरुद (शरद) (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

     महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

              लल वाक्

       (पराग पुस्तक- 117)

दऺछनिस ओबरस ज़ायुन ज़ानहा

समंदरस ज़ानहा कऺडिथ अठ

मंदिस रूगियस वैद्युत ज़ानहा

मूडस ज़ऻनिम नॖ प्रनिथ कथ

             अर्थात

दक्षिण दिशा से आने वाले भयंकर घने बादलों को पतला बना कर हटा सकूं। समुद्र से नदी निकाल लूं, असाध्य रोगी का वैद्य बनकर उपचार कर सकूं। इन बातों की सम्भावना हो सकती है। किन्तु मूढ अर्थात मूर्ख को तत्व की बात समझा न सकी

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

             *********

1. छतुन (Greying of hair/

To become old)

2. छेकरस (At the end/At the eleventh hour)

3. छुर्य (A dagger/A knife)

4. छूत छात (Untouchability/Infection)

5. छॊख (A wound)

                मुहावरॖ

1. मु: डन्गॖ सॖह 

    अ: गरस मंज़ॖय ज़ऻलिम मूजूद

         आसुन

2. मु: डेडि तलॖय चरॖस दज़ान

    अ: यॆलि बऺडिस हऻक्यमस ब्रोंह

         कनि कांह वॖल्टॖ कऻम सप्दि

3. मु: ड्यकॖ टिकॖ

    अ: सरताज, या, हावुन लायख

            (शुर्य पनॖन्य ह्यॆछनऻव्यूख)

**************************

पंचान्ग :- स्वामी मस्तॖ बबस दपान छु असली नाव सोहन लाल ओसमुत। यि छु अख संत, यॆम्य ज़न्म छु दोरमुत पंजाब किस ॳकिस जिलस बठिंडा किस ॳकिस गामस मंज़ यथ नाव छु ओसमुत बुदलाना। पनॖनि साधनाय सॗत्य छि मीज्यमॖच़ ॳमिस अध्यात्मिकता तॖ बन्याव अख संत। मस्त बबन दपान ओस खान्दर कॊरमुत यॆलि यि त्रॊवुह वुहुर ओसमुत ओस तॖ ओस चलावान पनुन गृहस्त। मगर दपान ॳमिस आव वऻराग तॖ खान्दरॖ पतॖ शॆयि वुहर्य त्रोव ॳम्य गरॖ बार न्युन सऺन्यास तॖ फ्यूर वारिहान तीर्थॖ स्थानन। फ़ेरान फ़ेरान दपान यि सोहन लाल याने मस्त बब वोत स्वामी नन्द लाल जियस निश, युस कऺशीरि टिक्करॖ रूज़िथ ओस। वनॖनॖ छु यिवान ज़ि स्वामी नन्द लाल जियन बनोव यि सोहन लाल पनुन शिष्य। हऻरऻनी हॖन्ज़ कथ छि यि ज़ि दपान स्वामी नन्द लाल जियन ओस ग्वडय आसन सज्जोवमुत ॳम्य सॖन्दि बापथ तॖ ॳम्यसॖन्दि यिनॖ ब्रोंठॖय ओस नन्दलाल जियन पनॖन्यन भक्तन वॊनमुत ज़ि अख बाबा छु यिनॖ वोल तॖ बॖ छुस तऺमिसॖन्दिस यिनस प्रारान। सोहन लाल आव तॖ नन्दलाल जियन कॊर ॳमिस लोलॖ सान स्वागत तॖ द्युतनस नाव मस्त बब। मस्तॖ बबन दपान कऺर पज़ि मनॖ सान पनॖनिस ग्वरस नन्दलाल जियस सीवा तॖ बन्याव अख नामावार तॖ थदि पायुक संत। पगाह पकव अमि ब्रोंहकुन। दय कऺरॖन्य असि सारिनी पनॖन्य यऻरी तॖ दूर गऺछ़िन महामऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप" 

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)