21.11.2020

21.11.2020 कार्तिक (कतक) ज़ूनॖ पछॖ (शुक्ल पक्ष) सतम (सप्तमी)  बटॖवार (शनिवार/ शनिश्चरवार) श्री सप्तर्षि सम्वत 5096, राश कुम्भ (रऻच़ हॖन्ज़ॖ 10.25 बजि प्यठॖ), ऋतु हेमन्त (चलान)...ॳज़्यकि प्यठॖ छु द्रठॖपऻन्च़ुक (पंचक) शुरु

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

              लल वाक्

         (पराग पुस्तक- 127)

मल व्वंदि च़ोलुम 

जिगर मोरुम

त्यॆलि लल नाव द्राम

यॊलि दऺल्य त्रऻव्यमस तती

          *******

           अर्थात

मैं ने अपने मन के मैल को हटाया। जिगर को मारा, इच्छाओं का दमन किया। जब अपना दामन फैलाकर  वहीं उसी के पास डेरा जमा लिया। तभी मेरा नाम लल प्रसिद्धि पा गया।  अर्थात मैं ने एक पल भी उसका साथ नहीं छोडा।

*************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

           *******

1. हऻसिल युन (To get/To obtain/To achieve)

2. हऻज़िर खऺदमत (In the service of waiter)

3. हऻमलॖ (Pregnant)

4. हऻवी (Skilled/Expert)

5. हऻफ (Sorrow/Woe/Distress/Oppression)

               मुहावरॖ

1 मु: च़लवुन्यन ब्रोंह तॖ लारवुन्यन

        पथ

   अ: बुज़दिल तॖ बेमंदछ

2. मु: च़लहऻ तॖ छुम नॖ वार, 

          रोज़हऻ तॖ छुसय बार

    अ: न रोज़नस वार न गछ़नस

          या, प्रथ तरफॖ मुश्किलॖय

          मुश्किल

3. मु: च़लान तॖ लारान युन

    अ: दवान तॖ दोरान वातुन, या,

         जल जल वातुन

           (शुर्य पनॖन्य ह्यॆछनऻव्यूख)

**************************

पंचान्ग:-  शॊहरत हऻसिल सपदनॖ पतॖ ह्यॆतिन लूख स्वामी विद्याधर सऻबुन दर्शनॖ करनॖ बापथ लगातार यिन्य मगर दपान ज़्यादॖ लूकन हॖन्दि आव गव निशि दूर रोज़नॖ म्वखॖ गव विद्याधर जी गुद्दर गामॖकिस अकिस वनस मंज़ तु ह्यॆच़ेयोन ब्युहुन तऺथ्य वनस मंज़ मगर आस नॖ तति ति वार व्यस्तार। तमि वनॖ नीरिथ दपान स्वामी जी वोत तुलमुल, मंज़गाम तॖ अमरनाथ तॖ ब्यॆयि ति केंच़न जायन। दपान स्वामी विद्याधर गव वापस त्राल तॖ ब्यॆयि श्रीनगर पनॖनि अवस्था हॖन्द्य पऺतिम कॆंह वऺरी कडनॖ बापथ। श्रऻनगरॖ ओस ॳम्यसॖन्द्यव भख्तव 1947 ईस्वी मंज़ ॳम्यसॖन्दि बापथ करन नगरस मंज़ अख आश्रम बनोवमुत यॆति यि पतॖ रोज़नि आव। अध्यात्मिक ज्ञान दपान स्वामी विद्याधरन ओस यूत प्रोवमुत ज़ि 1950 ईस्वी मंज़ पनॖन्य प्राण त्रावनॖ केंह समय ब्रोंठॖय वॊन ॳम्य पनॖन्यन भखतन ज़ि म्यॆ छु वुन्य यॆमि सम्सारॖ दूर गछ़ुन तॖ दपान शिव सुन्द नाव स्वरान स्वरान गव स्वामी विद्याधर विष्णुलूकस। पांच़हऻठ वुहुर ओस स्वामी विद्याधर यॆलि सु निर्वान सपुद। यि दपान रूदमुत छु थदि पायुक यूग्य प्वरुष। पनॖनिस ग्वरॖसॖन्दिस नावस प्यठ दपान छि ॳम्य कॆंह स्तुति लेछमच़ॖ। ज्यॆमि पलोडाहस मंज़ छु ब्याख अख आश्रम आमुत बनावनॖ ॳम्यसॖन्दिस नावस प्यठ।वनॖनॖ छु यिवान ज़ि स्वामी विद्याधर छु ओसमुत अख वऻहिद शख़स युस ॳकिस ऱयतस छु रूदमुत अमरनाथ नागॖ तथ कठकऺशिस मंज़। दपान ॳम्य ॳन्य केंह अकारकुन कऻशिर्य बटॖ कारकुन तबकस मंज़ यिम पनॖन्यन बटॖ बायन निशि नीच नज़रि मंज़ आमॖत्य रोज़ान ॴस्य। स्वामी जीयुन अख व्यच़ार छु ओसमुत ज़ि कारकुन तॖ अकारकुन गछ़ि मेलुन इकॖवट़ तॖ यि भेद भाव गछ़ि ख़तम गछ़ुन। इन्सानसॖन्ज़ ज़ाथ छॆ नॖ वुछिन आसान बल्कि ॳम्यसॖन्द्य रॖत्य कर्म गछ़न वुछिन्य। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)