10.11.2020

10.11.2020, कार्तिक (कतक) गटॖ पछॖ (कृष्ण पक्ष) दऺहम (दशमी) बॊम्वार (मंगलवार) श्री सप्तर्षि सम्वत 5096, राश सिंह (चलान) ऋतु हरुद (शरद) (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

       महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

              लल वाक्

          (पराग पुस्तक-116)

दमॖ दमॖ मन ओमकार परनोवुम

पानय परन पानय बोज़न

सूहम पदस अहम गोलुम

त्यॆलि लल बॖ वऻच़ॖस प्रकाशस्थान

             अर्थात

प्रत्येक श्वास में मैं ने मन को ओमकार पढाया। स्वयं ही पढता और स्वयं ही सुनता हैा सोहम पद (सोहम= सू+अहम अर्थात 'वह मैं हूं') से मैंने अहम या मैं का लोप किया तो 'सू' अर्थात 'वह शिव' शेष रहा और वही 'सू' करती गई तभी मैं लल प्रकाशस्थान पर पहुंच गई।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

               ********

1. छातॖ (Umbrella)

2. छान (Carpenter)

3. छानुन (To percolate/To filter/To investigate/To explore/To examine)

4. छापॖर (Hawker's basket)

5. छावुन (To use/To enjoy)

               मुहावरॖ

1. मु: डबॖ डबॖ गव वडॖ रब

    अ: मॊहशूर स्यठाह तॖ ह्यॊन

         द्युन कमॖय

2. मु: डेंजि तऺल्य पन तॖ पनॖ तऺल्य

         डींज

    अ: ओरुक योरुक वऺनिथ 

          बराबऺरी अनॖन्य

3. मु: डॊम्ब्य शुर्यन ख्वखॖ ब्रऻर

    अ: तस रोब हावुन यस नॖ

         व्यच़ानॖय आसि

        (शुर्य पनॖन्य ह्यॆछनऻव्यूख)

**************************

पंचान्ग:- ओंकार नाथ जियिनि जंत्री वुछ वुछ बनऻव पुनीत शास्त्री जियन ति पनॖन्य जंत्री तऺथ्य आकारस प्यठ। कॗमथ छु तऺम्य ति ती थॊवमुत यि ओंकार नाथ जियन पनॖनि जंत्री थॊवमुत छु याने डॊड हथ रोपय। यॊत ताम म्यॆ ख़बर छि असि मंज़ छि अज़कल स्यठाह कम लूख तिम यिमन जंत्री वुछनुक अभ्यास छु। ज़िठ्यन ज़िठ्यन यिमन तगान ॴस जंत्री समजॖन्य तिय रूद्य नॖ कुनी। नवि पुयि छु नॖ जंत्री वुछनुक ज्ञान। ऒत ताम ॴस्य आसान क्वल ब्रह्मण यिम पनॖनिस यॆज़मनस मदद ॴस्य करान जंत्री मंज़ॖ कॆंह कॆंह चीज़ हावनस मंज़ बावनस मंज़ तॖ ह्यॆछिनावनस मंज़। व्वंय रूद्य नॖ असि मंज़ तिम क्वलॖ ब्रह्मण ति यनॖ ॳस्य कऺशीरि न्यबर आयि। ॳस्य छि कर्मॖ काण्ड करनस मंज़ ति अज्ञान तॖ बऺनिमि ख्वतॖ बऺनिमिस पायदानस ताम यूत वऻत्यमॖत्य ज़ि सानि ज़ऻच़ मंज़ छि कर्म काण्ड अज़कल नक़ली ब्रह्मण करान।  यिम ब्रह्मण छि आमॖत्य उतराखण्डॖ प्यठॖ या  उतरांचलॖ प्यठॖ या छि कॆंह आमॖत्य बिहारॖ प्यठॖ या उड़ीसा प्यठॖ तॖ रटॖ लगोवमुत सानि जंत्री या कॆंच़न धार्मिक किताबन हुन्द अध्ययन कॊरमुत तॖ छि पनॖन्य यड पालान सानि ज़ऻच़ मंज़ कर्मॖ काण्ड कऺर्य कऺर्य। तमि अलावॖ छि तिम ति हवऻहस मंज़ तीर लऻयिथ अपुज़ पॊज़ वऺन्य वऺन्य असि ब्रऺमित करान रोज़ान। म्वखसर म्यानि वनुनुक मतलब छु यि ज़ि असि पज़ि यिमन द्वन ज्यॊतषी जियन वनुन ज़ि़ कीवल त्यूतुय छापुन यूत असि दरकार छु। तमि म्वखॖ प्यॆयि तिमन द्वन अकिस जायि बिहिथ यि तय करुन ज़ि किथॖपऻठ्य ह्यकन तिम जंत्रीयन फ्युर द्यिथ संशोधन कऺरिथ तॖ पंचान्गस तामॖय महदूद थवॖन्य यि जंत्री। कथ छि जऻरी। दय कऺरिन्य असि सारिनी यऻरी। दूर गऺछ़िन महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप" 

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)