13.11.2020

13.11.2020 कार्तिक (कतक) गटॖ पछॖ (कृष्ण पक्ष) त्रुवाह (त्रयोदशी) शॊकुरवार (शुक्रवार/ जुम्मा) श्री सप्तर्षि सम्वत 5096 राश तुला (दुहचि 12.31 बजि प्यठॖ) ऋतु हरुद (शरद) (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

              लल वाक्

         (पराग पुस्तक-119)

दऺमी डींठॖम गऺज दज़वॖनी

दऺमी ड्यूंठुम दॖह न तॖ नार

दऺमी डींठॖम पांडवन हॖन्ज़ मऻजॏ

दऺमी डींठॖम क्रऻजी मास

             अर्थात

किसी समय एक चूल्हे को जलता  हुआ पाया कि भरपूर गृहस्थी चल रही थी। कभी इसी चूल्हे को सुनसान पाया अर्थात पूरी गृहस्थी उजड चुकी थी। कभी पांडवों की माता कुन्ती को देखा तत्पश्चात उसे कुम्हारिन मासी के रूप में पाया।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

            *********

1. छिंदरुन (To tremble/To shake)

2.  छिवुन (Impatient/Be wild with rage/To show eagerness/To show Keenness)

3. छकॖर (Kashmiri group song/Folk song of Kashmir)

4. छकुन (To scatter/To sprinkle/To straw/To scatter here and there)

5. छुख (You are)

                 मुहावरॖ

1. मु: रतस तॖ त्रेशि

    अ: सख़ अदावत

2. मु: रॖतिस छि दऺह बऻग्य

    अ: जान कारस छि सऻरी 

         व्वमेदवार आसान

3. मु: रज़ दऺज़ मगर वर द्रास नॖ

    अ: हून्य लऺटिस छु नॖ वर

         नेरान

          (शुर्य पनॖन्य ह्यॆछनऻव्यूख)

**************************

पंचान्ग:- त्वहि सारिनी छि ख़बर ज़ि सानि कऺशीरि मंज़ छि रूद्यमॖत्य ऋषी, महार्षि, साधु, संत,स्वामी,  महापुरुष, व्यदवान, थऺद्य ज्योतिष्याचार्य, पठिथ ब्रह्मण, ज्ञऻनी, महाज्ञऻनी यॆमिकिन्य तथ कऺशीरि ॴस्य वनान ऋश्यवऻर ति। पीर फकीर ति छि आमॖत्य रोज़ान कऺशीरि मंज़ विज़ि विज़ि। अख महापुरुष ओस पोशॖ बब यस असली नाव छु ओसमुत पुष्करनाथ कौल। यि शख़स छु ओसमुत अख धर्मात्मा यॆम कऻशिर्य संस्कृति संस्कार तॖ सभ्यतायि पोछर द्युत। पनॖनि समाजिच सीवा करान करान कऺडन पनॖन्य सऻरी वऻन्स। दीवी भक्त दपान रूदमुत ओस यि महापुरुष तॖ कॆंह भजन, लीलायि, छि ॳम्य लेछमच़ॖ तॖ पोशि डऻल्य किताबि मंज़ आमॖच़ छि छापनॖ। पुष्करनाथ जियन छि अख किताब नित्य नियम पाठ विधि ति छऻपमॖच़ तॖ पनॖन्यन भक्तन ताम वातनऻवमॖच़। कशीरि ओस यि महापुरुष रोज़ान श्रीनगरॖ कन्यकऺदलॖ तॖ ओस तति गौरी शंकर मन्दरस मंज़ बिहिथ पनॖन्य साधना करान। दपान यि ओस कऺशीरि लूकॖ भवनॖ ति रूदमुत तॖ पनुन ज्ञान तति रूज़िथ बऻगरोवमुत पनॖन्यन सीवादारन। ज्यॆमिस मंज़ छु चिनोरॖ ॳम्य पनुन अख आश्रम बनोवमुत यॆति यि भगवद् गीता ‌ज्ञान, भवऻनी सहस्रनाम, पंचस्तवी वगैरा परनावान ओस परनावान यिम शुर्य, बऺड्य ति अथ आश्रमस मंज़ यिवान रोज़ान ॴस्य। ॳम्यसुन्द आश्रम छु बकाया जायन मसलन नजबगढ दिल्लि मंज़। चिनोरस मंज़ छु ॳम्यसॖन्दिस आश्रमस नाव पुष्कर स्वामी सैवा आश्रम तॖ पनॖन्य समाज सीवा दपान छि रूज़मॖच़ ॳम्यसॖन्ज़ असली साधना। यिम सपॖद्य स्वर्गवास 18 फर्वरी 2009 ईस्वी मंज़। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन महामऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)