02.12.2019

02.12.2019,मॊन्जहोर (मार्ग) ज़ूनॖ पछॖ (शुक्ल पक्ष) शॆयम (षष्ठी) च़ऺन्दॖरवार (सोमवार) श्री सप्तर्षी सम्वत 5095, राश कुम्भ (रऻच़ हॖन्ज़ॖ 12.56 बजि प्यठॖ) ऋतु हेमन्त (चलान) द्रठॖपऻन्च़ुक (पंचक) ति शुरु कुमार शॆयम ति अज़
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात तॖ सॗत्य छु अख लल वाख अर्थ सॖत्य ह्यथ
**************************
1. मु: ग्रटॖ अनवार
    अ: लगातार
2. मु: ग्रॆद्यहूर
    अ: वुचापॖ/बेडोल
3. मु: गुर्यन लाज्येयख नाल खर
         गऺयि पडर दऻर्य दऻर्य
    अ: नाबॖकऻरी या अज़रवुन्य
          किन्य पनुन पान क़ऻबिल
          ज़ानुन
4. मु: गुर्य वाल्यो गुर हा मूदुय
         लॊट हा रूदुय अथस क्यथ
    अ: म्वलुल चीज़ अथॖ मंज़ॖ
         गऺछ़िथ हऺसरत ख्यॊन
5. मु: गुर नॖ ख्यवान ज़ब यॆलि नॖ
         मेल्यस तॆलि ख्यवान रब
    अ: नऺखरॖ छि नॖ पोशान
**************************
1. खूर.....Heel/Barbar's
               blade
2. ख्वर....Foot/Feet
3. ख्वर-पंजॖ....Toe
4. नम......Nail/Nails
5. म्यादॖ....Stomach
6. शूशॖनोर...Lungs
7. दिल.......Heart
8. द्यमाग....Brain
9. कछ़......Armpit
10. अंदरमॖ.... Intestines
**************************
      गीता ज्ञान  :अध्याय 18
युस कर्मॖ फल यछ़ान, लालची आसान, दॊयम्यन कष्ट दिवान बदकार इन्सान, सु कर्ता राजस
मानॖन यिवान
वॊन भगवानन गीता ज्ञान
**************************
यॆमि हिसाबॖ कऻशिर्य लडकॖ या कऻशिर्य कोरि पनॖनि ज़ऻच़ न्यबर छि खान्दर करनस मंज़ व्वंय ख्वश, म्यॆ छु नॖ बासान ज़ि सऻन्य ज़िठ्य या यिमन लऺडकन किहो कोर्यॆन हॖन्द्य मोल मऻज्य ह्यकन अथ रफ्तारि थख दिवॖनऻविथ। अथ मंज़ ति छु नॖ कांह शक ज़ि कॆंच़व वऺरियव पतॖ यी नॖ कऻशुर बटॖ परज़ॖनावनॖ ति। बऻहिमि जमऻच़ ताम छु शुर पनॖनिस मऻलिस माजि हॖन्ज़न नज़रन तल आसान। अमि पतॖ छु यि शुर ट़्रेनिंग्य वेनिंग्य गऺछ़िथ पनॖन्यन गरिक्यन बऻच़न हॖन्ज़न नज़रन निशि दूर गऺछ़िथ बॆ-लगाम गुर बनान। यी मनस मंज़ यिवान ती छु करान ख़ास कर खान्दरॖकिस मामलस मंज़। यिम सानि समाजिक्य च़ुक्यदार छि तिम ति छि नॖ ब्रौंहकुन यिथ अथ मसलस प्यठ कथबाथ करान। तमि तलॖ छु बासान ज़ि तिमव ति छु व्वंय पनॖन्य हऺथ्यार त्रोवमुत तॖ मोनमुत ज़ि यि सपदान छु ति छु ठीख सपदान। कुस कर प्यॆयि पायस यि करि वखतॖय फऻसलॖ। अनॖहूर रोज़ुन ति बन्यऻव सानि ज़ऻच़ मंज़ व्वंय अख फऻश्यन। छ़ान्डान छि कॆंह रोज़ान तान मगर सऺहल सऺहल छिख नॖ मेलान तिक्याज़ि तनॖखॗहॖच तॖ थॊद परनॖच तॆह छि वर छ़ान्डनस मंज़ रुकावठ बनान। समजोतॖ करनस प्यठ छु नॖ कांह दॊर ति तयार। नतीजि छु ब्यॆयि ती ज़ि ज़ऻच़ न्यबर न्यॆरुन।
बॖ छुस वरमाला ग्रुप पनॖनि समाजि बापथ चलावान पनॖनि मोबायलॖ दऺस्य। वुछनस तल छु म्यॆ यिवान ज़ि च़्वॊयत्रॖह-पांच़ॖत्रॖह वुहिर लऺडकॖ तॖ कोरि छि वुनि छ़ान्डान अख ॳक्यसॖन्दि बापथ वर। अख मुहावरॖ युस सान्यव ज़िठ्यव ज़ांह कालि वॊनुमुत छु ज़ि "त्रॖह गव सॖह, च़तजिह गव पतजिह तॖ शॆठ गव ब्रेठ" छु गोमुत व्वंय बे-माने। क्याज़ि तॖ किथॖपऻठ्य अथ प्यठ करव बुथि कथबाथ। कर्मॖ लीखाये कर नमस्कार। तोतस सॗत्य नॖ तोतस वार, गव तोतस कावस सॗत्य प्यार, तोंति हॊल ब्रग बिचोर वुछान लाचार, कर्मॖ लीखाये कर नमस्कार।
**************************
"मूढस ज्ञानॖच कथ नो वऺन्यज़ि
खरस ग़ोर दिनॖ रावी द्वह
युस युथ करिय सु त्युथ स्वरे
क्रेरे कऺरिज़ि नॖ पनुन पान"
      ***********
अर्थात:- मूढ को ज्ञानोपदेश न करना। गधे को गुड देने सॆ तुम्हारी मेहनथ अकारथ जाएगी। जो जैसा करे, वह वैसा भरे। तुम्हें अपने आप को कुऐं में धकेलना नहीं चाहिए।
    पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)