21.12.2019

21.12.2019 पॊह (पौष) गटॖ पछॖ (कृष्ण पक्ष) दऺहम (देवादेव) (दशमी) बटॖवार (शनिवार/शनिश्चरवार)श्री सप्तर्षी सम्वत 5095, राश तुला (दुहॖचि 8.27 बजि प्यठॖ)ऋतु हेमन्त (चलान)...ॳज़्यकि प्यठॖ गव शुरु चिल्लॖय क्लान् (युस रोज़ि 40 द्वह)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात तॖ सॗत्य छु अख लल वाख ति अर्थ सहित
**************************
1. मु: माल वुछिथ ज़काथ
    अ: बुथ वुछिथ बोग
2. मु: माल मस्त हाल मस्त
    अ: यस यड बऺरिथ आसि सु
         क्याह ज़ानि ब्यॆयि सॖन्ज़
         ब्वछि
3. मु: माजि ख्वतॖ कूर बऺड
    अ: मस्लुक व्यॊखच़ार आसुन/
         ताज़ॖ मसलॖ छि व्यॖख्ती
         आसान
4. मु: माजि हुन्द नॖ माल्युन शुर्यन
         हुन्द मातामाल
    अ: ज़ोरॖ लदनि ज़ंगॖ/पानियार
         ज़ोरॖ हावुन
5. मु: मऻज्य वॊहवान छुम नॖ कांह
         पॊत्रॖ वति प्यठ ब्यॆह
    अ: हंगॖ मंगॖ न्यायन मंज़ पान
         त्रावुन/ज़ोरॖ लडऻय मऺल्य
         ह्यॆन्य
**************************
1. बऺत्य.....Wicks
2. बतॖ....Food/Cooked rice
3. च़ॊट...Bread
4. छ़्यॊट...Impure
5. श्रूच़......Pure/Fresh
6. छ़ॊट.....Short
7. ज़्यूठ....Long/Lengthy
8. बतस तल ब्वद...One who
         doesn't think beyond
9. तल..Under/Fry/Beneath
10. प्यठ...On something/
                Upon
**************************
         गीता ज्ञान  :अध्याय 18
ज़मीनदऻरी, गऻव पालॖन्य, पॊज़ कारॖबार, यि छु वेशि सॖन्दि स्वबावुक व्यवहार, सीवा बाव चंडाल सुन्द कर्म ज़ान
वॊन भगवानन गीता ज्ञान
**************************
असुना आव म्यॆ याम अख सालॖ कार्ड वुछुम तॖ पॊरुम ज़ि ॳकिस कऻशिर्य कोरि छु लानि आमुत अख लऺडकॖ युस बिहारुक बसकीन छु। खान्दर छु कार्डॖ मुतऻबिक करुन ब्यॆयिस शहरस मंज़।कूर छि पऺरमॖच़ ल्यीछमॖच़ अनान ज़्येनान, जान स्वन्दर, जान गरॖच मगर आव दिल पनॖनि ज़ऻच़ न्यबर लऺडकस प्यठ। कर्मॖ लीखाये कर नमस्कार। यॆलि ॳस्य कऺशीरि ॴस्य वखतॖ अकि व्वपर ज़ऻच़ सॗत्य सम्बन्द गन्डनॖच रफ़तार ॴस नॖ यीच़। बस योर कुन लऺग्यथॖय होव कर्मॖलीखाय नॊवुय रंग तॖ म्यूल असि पर ज़ऻच़ हुन्द संग। छ़ॊकान छि वारॖ वारॖ ॳस्य ग्रॆन्दि मंज़। दय ज़ानि कॊत ताम रोज़ि यि सिल्सिलॖ जऻरी। व्वंय छु यि वनुन ति मुश्किल ज़ि अथ बदलावस मंज़ ज़िम्मवार कुस छु, शुर-कॊट किनॖ तिमन हुन्द मोल-मऻज्य ति क्याज़ि ख्वश छि बासान द्वनवय दऺर्य ज़न। ॳन्दॖर्य-ॳन्दॖर्य कऺमिस क्याह व्यच़ार छि व्वथान सु ज़ानि सुय मगर असि क्याह छु बोज़नॖ यिवान यि ह्यकव ॳसीय वऺनिथ।कूशिश छि तोति करॖन्य म्यॆ बासान ज़ि च़ेनॖवुन्य दिन्य पनॖनिस समाजस ज़ि यिमव हर्कतव सॗत्य छु वातान सख़ ज़ख असि प्रथ रंगॖ। माजि-ज़्यव न वनॖनॖ सॗत्य छु दबाव सऻनिस अदबस तॖ ज़ऻच़ न्यबर खान्दर करनॖ सॗत्य छु असर सऻनिस कल्चरस, सानि सभ्यतायि, सान्यन संस्कारन तॖ यिम चीज़ म्वकलान म्वकलान ह्यॆच़ॖन्य सऻन्य प्रज़नथ तॖ पऻर्यज़ान रावॖन्य। सान्यन पऺर्यमॖत्य लीख्यमॖत्यन बडवुन्य शुर्यन पज़ि पानय यिमन चीज़न सनुन तॖ पज़्यख ज़ानुन ज़ि असि ॴखॖर गछ़ुन कोर कुन छु। दय दीन असि सारिनॖय तार। नमस्कार।
**************************
"सहज़स शम तॖ दम नो गछ़ि
यछ़ि नो प्रावख म्वखती द्वार
सलिलस लवन ज़न मीलिथ गछ़ि
तोति छुय द्वरलब सहज़ व्यच़ार"
        **************
अर्थात:- केवल शम तथा दम से ईश्वर नहीं मिलता तथा केवल इच्छा करने से ही मुक्ति नहीं मिलती। इन में कोई यदि पानी में नमक की तरह भी घुल जाए तो भी सहज विचार दुर्लभ है।
    पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)