06.12.2019

06.12.2019, मॊन्जहोर (मार्ग) ज़ूनॖ पछॖ (शुक्ल पक्ष) दऺहम (दशमी) शॊकुरवार (शुक्रवार/ जुम्मा),श्री सप्तर्षी सम्वत 5095,राश मीन (चलान) ऋतु  हेमन्त (चलान) द्रठपऻन्च़ुक (पंचक) (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ। पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात तॖ सॗत्य छु अख लल वाख ति अर्थ सहित
**************************
1.मु: ग्वडॖ लोरिहऻन पतॖ कोरिहऻन
   अ: ग्वडॖ छु इन्सान ल्वकॖटहऻन
        मंगान अमापॊज़ नज़र छस
        आसान कुनि बऺडिस चीज़स
        कुन
2. मु: गूर वन्याह ज़ांह म्योन द्वद
         छु च़ॊक
    अ: पनॖनिस चीज़स छा कांह
          कॖठ कडान
3. मु: गॊट नय आसि गाश कस
         बासि
    अ: जऻनी छि तती अथि यिवान
         यॆति नाकारगी ति आसि
4. मु: गूर्य गरि छा वॊछ़ रावान
   अ: यथ जायि माहोल मुवऻफिक
         आसि तति छु इन्सान
          फ़ऻयदस मंज़ॖय रोज़ान
5. मु: ग्वडॖ गव पानस पतॖ ग़ऻर
         जानस
    अ: ग्वडॖ गछ़ि पानसॖय फ़ऻयदु
         वातनावुन
**************************
1. बांग...Crowing of a cock
2. बाल....Ball/Mountain/
         Children/Unmarried
         girl/Hill
3. बाला.....On the top/
                 Above all/Super
4. बालादऺर ..Summer house
                   Pavilion
5. बालऻयी.... Mountainous/
                  Over and above
6. बालॖपान....Young age/
         Young person/Youth
          Childhood
7. बालॖयार..... Childhood
                       friend
8. बालॖ......Ear ring
9. बालुक......A boy
10. बाग्यवान...Lucky person
              Providential/Fotu-
              nate
**************************
         गीता ज्ञान  :अध्याय 18
मनुश यॆमि बज़ॖ धर्म अधर्म  नॖ ज़ानान, नॖ कर्तव्य अकर्तव्य सऺही मानान, हे अर्ज़न स्व ब्वद च़ॖ राजस ज़ान
वॊन भगवानन गीता ज्ञान
**************************
लीखित ललाटस यूतुय छुय मेलान त्यूतुय इन्सानस। कस कोताह स्वख-द्वख बूगन छुय ख़बर ॳकिस भगवानस। कऻच़ाह मॆहनत छु यि इन्सान पनॖनि ज़िन्दगऻनी मंज़ करान आमुत मगर ॳकिस ब्रुंज़िस मंज़ छु सोरुय ताज ओ तख्त बदलान। गरवेठ सॊम्बरावान थऺक्यमॖत्य ॳस्य,सॊम्बरावान कऺहन्दि बापथ, खऻली अथव गछ़ुन योरॖ असि तथ ख्यन यॆति पऺज़्य तय हापथ। थॊकमुत पान बासी यॆमि सातन परुनुय गछ़ि तमि सातन, हरि ओम् तत्सत्। असि बासान दुनिया ज़्यून सोरुय, असि ॴखॖर गछ़ुन छु तोर ननॖवोरुय। ओम् नाव सॗत्य रोज़ी पथ कुन सोरुय असि ॴखॖर गछ़ुन तोर ननॖवोरुय। यिम छि कॆंह लऻनॖ ल्येछिमच़ॖ म्यॆ कॆंच़न ब्यॊन ब्यॊन बऻतन मंज़। यिम लऻनॖ प्यॆयि म्यॆ याद राथ यैलि बॖ खड़ा ओसुस शुमशान घाठस प्यठ यॆति रवि जी बादामस दाह संसकार आव करनॖ। लूख ॴस्य आमॖत्य ब्यॊन ब्यॊन जायव प्यठॖ। लद्दाखॖ प्यठॖ ति वुछिम कॆंह नफ़र आमॖत्य ओश हारान तॖ कॆंच़व संस्थायव प्यठॖ ति ॴस्य आमॖत्य यिमन सॗत्य रवि जी वॊथमुत ब्यूठमुत ओस।  गछ़न वऻलिस क्याह पताह छु ज़ि तम्यसन्दि गछ़नॖ पतॖ यॆति क्याह क्याह सपदान छु। कोताह बदलाव यिवान छु। सु छु न्येरान पानस ॳछ वऺटिथ। क्वदरयतुक यि राज़ छु राज़ॖय ज़ि क्याज़ि छु निवान इन्सानस बेवायि पऻठ्य तॖ बे-आरॖ पऻठ्य। रवि जी ओसमुत छु फ़याज़ तॖ असवुन इन्सान, मद्दगार तॖ समाज्युक रुत कांछन वोल। मॆहनती तॖ मॊहब्बती इन्सान। ॳम्य ॴस पनॖन्य अख पहचान बनऻवमॖच़। ईश्वर दीन ह्यमथ ॳम्यसॖन्द्यन गरिक्यन  जुदऻई हुन्द द्वख च़ालनॖ बापथ। स्वर्गस मंज़ ॴस्यनस जाय। माय पनॖन्य पथकुन त्रऻविथ द्राव।
**************************
"नियम कर्योथ गरबा
च़्यतस करबा प्यॆयिय
मरनॖ ब्रौंठॖय मरबा
मऺरिथ मरतब हुरिय"
     ******
अर्थात:-माता के गर्भ में आकर तू ने प्रण किया था (कि अब केवल आपका नाम ही जपूंगा)। तुम्हारे द्वारा किया गया वह प्रण तुझे कब याद आएगा।अपना शरीर छोडने से पहले ही अपने आपको पहचान ले, तब ही तेरा रुतबा बढेगा और तू ऊंचाई को पाएगा।
      पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)