05.12.2019

05.12.2019, मॊन्जहोर (मार्ग) ज़ूनॖ पछॖ (शुक्ल पक्ष) नवम (नवमी) ब्रसवार (वीरवार/ ब्रहस्पथवार/गुरुवार), श्री सप्तर्षी सम्वत 5095, राश मीन (दुहचि 1.22 बजि प्यठॖ), ऋतु हेमन्त (चलान) द्रठॖपऻन्च़ुक (पंचक) (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात तॖ सॗत्य छु अख ललवाख अर्थ सॗत्य ह्थ
**************************
1. मु: गुर्य छु वॊनमुत खसवॖनिस
        खारथ तॖ वसवॖनिस वालतम
    अ: युस सऺहल छु बासान सुय
         छु मुश्किल आसान
2. मु: गुरिस सवऻर्य तॖ बछेरस
         अतॖगथ
   अ: यस नॖ पज़ि तस छि ख़दमत
         प्यवान करॖन्य
3. मु: गऺन्डिथ गऻव गासॖ लॊव
    अ: प्रथ कऻन्सि ज़रूरतॖ मुतऻ-
         बिक ख्यन-च्यन वातॖनावुन
4. मु: गन्दॖ खशखाश
    अ: बद-ज़ाथ इन्सान
5. मु: गन्टायि शुर
    अ: बुजॖरस मंज़ ज़ामुत शुर
**************************
1. बाज़ऻबितॖ.....Steadily/
                        Regularly
2. बाज़े........ Sometimes
3. बाग़वान.......Gardener
4. बाग़............Garden
5. बाकय........Balance/
             Remaining/Out-
             standing
6. बाकय थवुन.....To keep
             balance/Put out-
             standing
7. बाख.....Weeping
8. बाख त्रावॖन्य....To cry loud-
            ly when somebody
            dies
9. बाकोफ़....With grandeur/
                  With pomp and
                  show
10. बाकमाल..... Excellent/
             With excellence of
             highest order
**************************
         गीता ज्ञान :अध्याय 18
प्रवर्ती तॖ नवर्ती मार्ग युस ज़ानान,
कर्म अकर्म म्वख्ती तॖ बन्दन भय अभय ह्यू स्व ब्वद सातविक ज़ान।
वॊन भगवानन गीता ज्ञान
**************************
वुन्य छु तॖ वुन्य छु नॖ। ब्रुंज़िस मंज़ छु संसार फिरिथ गछ़ान। फिकिरी छु नॖ तरान इन्सानस ज़ि यिम व्वलॖगॊतॖन्य कतिक छि तॖ किथ पऻठ्य यिवान छि। ख्वरव तलॖ छि म्यॆच़ न्यॆरान यॆलि कऻन्सि क्वमॊकॖ तॖ क्वखतॖ यॆमि ज़गतॖ निशि म्वख्ती मेलान छि। वुछान वुछान सपुद राथ प्रताप विहारस मंज़ अख च़़्यून सानि कऻशिर्य समाज्यूक म्वकलथ,श्री रवीन्द्र बादाम गव स्वर्गस।
वऺरी खण्ड ओसुस वोतमुत यलाज करनावान,ज्यॆमि, दिल्लि तॖ चिन्नयस मंज़। मगर यीच़ मॆहनत कऺरिथ, रॊपियि रूदॖ खर्चऻविथ तॖ यूत यलाज लॊगुस नॖ कुनि अर्थस। अज़ छुस दाह-संस्कार हिन्डन शुमशान घाठस प्यठ। यिम ति ॳम्यसॖन्द्य यार दोस्तॖ,अंग ॴश्यनाव आमॖत्य ॴस्य, सारिनी हुन्द ओस कुनुय वाक् तॖ वच़ुन ज़ि कऺशीरि प्यठॖ यनॖ ॳस्य च़ऺलिथ आयि योर यिथ आयि ह्यनॖ तनावस मंज़। कुनि न तॖ कुनि रऺन्ग्य रूद ज़ॆहनी दबाव। ज़िठ्यन रूद जायि जादादुक तनाव, नवजवानन रूद दुवखतॖच च़ॊट कमावनुक तनाव, कऻन्सि रूद गरॖक्यन ॳन्दरिम्यन मसलन हुन्द तॖ कॆंच़न गरॖक्यन न्यॆबरिम्यन मसलन हुन्द तनाव। नवि नवि ब्यमारि आयि व्वतलिथ तनावॖ मूजूब। डाक्टर छु बुथ वुछतॖय वनान ज़ि तनावॖ कि वजह सॗत्य छु असि ब्लड-प्रेशर, मधुमेह यानि शुगर, कैन्सर वगैरह वगैरह। असि  लऺज्य यॊत यिथ मरनस ति च़लॖ लार। कॆंह गरॖ गऺयम नज़रि यिमन नॖ अज़कल व्वंय कांह ज़्युठुय रूद  न। यॆमिस नॖ ज़्युठ बनॖनॖच वऻरी ॴस,सुय बन्यव मॊतॖबरि तोतॖराम  ति क्याज़ि तऺमिस ह्यॊर वऻत्य सऻरी स्वर्गस तॖ यॆमिस कॗन्सिस वुनि असनॖक्य तॖ द्रॊकॖनॖक्य द्वह छि  तऺमिस प्यव गर्युक ब्रख बेवायि पऻठ्य। सु आमुत छु तऺन्ज्यन्यन लदनॖ। तऺमिस छु अकि तरफ़ॖ क्रूर तॖ ब्यॆयि तरफ़ॖ खय। पनुन अनुग्रह कऺर्यनख म्योन दय। युस आव योर तस वापस गछ़ुन। मोतस क्याह करि सोन पशुन। नेरान अकि फिरि फ़ेरान नॖ वापस, फेरान मगर तमिकुय कॆंह कालस।नम गछ़ान ॳछ यॆलि फ्युर लगान ख़यालस, दमफुट्य गछ़ान लगान ब्यॆयि तऺथ्य जंजालस।
**************************
"तिम छि नॖ मनुश तिम छि ऋष
 यिमन दिह मनॖ निशि गव
बऺडिथ तॖ बुडिथ ब्याख क्या रछिय
फुटिमितिस बानस प्यॆयी ग्यव"
         *************
अर्थात:- वे मनुश ऋषि हैं जिन्होंने बचपन से ही मन को शरीर से अलग रखा अर्थात मन को काबू कर लिया। बड़ा होकर जंजाल बढने और बुढापे में शरीर टूट जाने से मन क़ाबू नहीं रह कर इधर उधर उसी प्रकार भटकता है जिस प्रकार टूटे बर्तन में से घी रिसकर निकल जाता है।
     पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)