26.12.2019

26.12.2019, पॊह (पौष) गटॖ पछॖ (कृष्ण पक्ष) मावस(देवादेव)(अमावस्या) ब्रसवार (वीरवार/ ब्रहस्पथवार),श्री सप्तर्षी सम्वत 5095, राश धनु (चलान), ऋतु हेमन्त (चलान)...अज़ छु सिरियि ग्रुहुन ति (सुबहॖचि 8.00 बजि प्यठॖ दुहॖचि 1.36 बजि ताम)
***************"**********
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात तॖ सॗत्य छु अख लल वाख ति अर्थ सहित
**************************
1.मु: मुजि ख्यथ सर्द गछ़ुन
   अ: कुनि कामि मंज़ नाकाम
        सपदुन/तसला गछ़ुन
2. मु: मुजिरिथ म्वकुल
    अ: कुनुय ज़ॊन आसुन/
         परेश्यऻनी बगऻर आसुन
3. मु: मूजि प्यॆठ्य मिलवन
    अ: म्वल कम करुन/बऻज़्
         तारॖन्य
4. मु: मऺत्य आबॖय मऺत्य आब
    अ: अफ़रा तफ़री/बद-
         इन्तिज़ऻमी
5. मु: मऺतिस ज़ीर बतस कुन
    अ: ख्वदग़र्ज़ी हुन्द इज़हार
**************************
1. बतख....Duck
2. कॊकुर....Cock
3. कॊकॖर....Hen
4.  हून.......Dog
5. हून्य......Bitch
6. गगुर.....Rat
7. काव.....Crow
8. च़ऺर....... Sparrow
9. तोतॖ......Parrot
10. गऻन्ठ... Eagle
**************************
           गीता ज्ञान  :अध्याय 18
युस मनुश बेलगाव छु आसान, यॆम्य अंत:कर्न ज़ीन्यमॖत्य आसन
सांख यूगॖ निश कर्मॖ स्यॆदी प्रावान
वॊन भगवानन गीता ज्ञान
*************************
कश्मीरी सभा दिल्लि वाल्यव मनोव राथ डेडिकेशन डे यानि समर्पण दिवस। यि प्रोग्राम आव मनावनॖ लोक कला मंच, 20 लोधी इन्डसट्रियल एरिया, लोधी रोड, नई दिल्ली मंज़ राथ सुबहॖचि दहि बजि प्यठॖ शामन श्यन बजन ताम। वारियाहन मुद्दाहन प्यठ चलेयि कथ बाथ तॖ ब्यॆयि ओस कल्चरल प्रोग्राम यथ मंज़ ह्यॆन्ज़्यॆ वनॖवुन, ग्यवुन, मुशऻयरॖ, स्किट ड्रामा वगैरा वगैरा आव करनॖ तॖ पतॖ आयि यनाम कॆंच़न नामावार हस्तियन दिनॖ यिमव पनॖनि समाजि बापथ कॆंह रॖच़ कामि करिमच़ॖ छि। ख्यनॖ च्यनॖच व्यवस्था ति ॴस आमॖच़ करनॖ जान पऻठ्यन। सुशमा बठ जी तॖ कुल्दीप जियन ओस मंच संबोल्मुत जान पऻठ्य। अल्बतॖ अंदस प्यठ बास्यव ज़ि ॳन्द्रिम व्यवसथा केएसडी-यिच मंज़ ॴस क्याहताम कमी यनाम बऻगरावनस मंज़ रूज़मॖच़। अड्यन हॖन्द्य नाव आयि ह्यनॖ तॖ शाल तॖ ट्राफी आयि नॖ दिनॖ तिक्याज़ि ग़्रॆन्दिफ्युर बूज़ुम ओसुख गोमुत। कुसताम नाखान्दॗ सदस्य ओसुख थोवमुत यस नॖ पूरॖ हिसाब तॊग करुन ज़ि कस छु यनामॖ द्युन तॖ कस छु नॖ। पऺतिमि गरि वऺछ़ यिथय खलबली हिश यनामॖ बऻगरावनस मंज़ तॖ बास्यव ज़ि तजरुबॖच कमी ॴसॖख रूज़मॖच कुनि न तॖ कुनि जायि। मंच-चालकन वॊन साफ़ पऻठ्यन वाज़्यॆह कऺरिथ ज़ि समय छु कम तॖ भाषण गछ़ि नॖ च़ोरव पाच़व मिनटन ज़्यादॖ दिनॖ युन मगर तऻजिब तॖ हऻरऻनी छि ज़ि केएसडी की पनॖनी सदस्यन, डाक्टर एल एन धर सऻबन त्रऻवॖय नॖ माईक पंदाहि वुहिमि ब्रौंठ तॖ तम्यसॖन्दिस प्रवचनस ओस नॖ हॊट कुनि तॖ नॖ लॊट। आडिटोरियमस मंज़ बिहिथ लूख गऺयि तंग तम्यसुन्द भाषण बूज़िथ तिक्याज़ि पत्यम्यव त्रॖहव वऺरियव प्यठॖ वोत तिमन ती बोज़ान यि तऺम्य वॊन।ल्वकच्यव कोर्यव दॊयव ति वऺन्य पनॖन्य व्यच़ार बडॖ जान पऻठ्य। डाक्टर धर सऻबन द्युत पनुन भाषण अंग्रीज़स मंज़ तॖ गऺयस मंज़ॖ मंज़ॖ गॖठॖ-गोजि ति वनान वनान। म्यऻन्य ज़ऻती राय छि ज़ि डाक्टर सऻबस पज़ि कऻशिर्य ज़बऻन्य मंज़ पनॖन्य कथ वातनावनॖच कूशिश करॖन्य तॖ स्व ति छ़ॊटॖरऻविथ। ताहम प्रोग्राम रूद नफ़ीस अल्बतॖ यिम दूरि दुरि प्यठॖ ॴस्य आमॖत्य प्रोग्राम्स मंज़ शिरकत करनॖ बापथ तिमन रूद यि मलालॖ ज़ि तिहन्ज़ि हॊसला अफ्ज़ायि मंज़ रूज़ क्याहताम कऺमी संस्थायि हॖन्ज़ि कमज़ोर व्यवस्थायि मूजूब।
त्वहि सारिनी छुवॖ रातचि ख्यॆच़िमावसि हुन्द मुबारक।
*************************
         लल वाक्
"अथॖ मबा त्रावुन खर बा
लूकॖ हॖन्ज़ कॊंगॖ वऻर ख्यॆयी
तति कुस बा दारिय थर बा
यॆति नऺनिस करतल प्यॆयि"
       **********
अर्थात:- अपने मन रूपी गधे को
ढील मत दो। वह किसी दूसरे की
केसर की क्यारी को चट कर जाएगा अर्थात अवांछिथ कर्म कराएगा। हानी तो गधा करेगा और दण्ड तो तुझे ही मिलेगा। तेरे बिना दण्ड को भोगने के लिए स्वयं को कौन प्रस्तुत करेगा। जहां बचाने वाला कोई भी नहीं होगा।
    पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)