18.12.2019

18.12.2019, पॊह (पौष) गटॖ पछॖ (कृष्ण पक्ष) सतम (सप्तमी) ब्वदवार (बुधवार) श्री सप्तर्षी सम्वत 5095, राश सिंह (चलान) ऋतु हेमन्त (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात तॖ सॗत्य छु अख लल वाख ति अर्थ सहित
**************************
1. मु: मऻन्ज़ लऻगिथ ति अथॖ
         छ्यॆनी
   अ: बद-कॖस्मती छॆ नॖ तदबीरव
         सॗत्य ख़तम गछ़ान
2. मु: ल्यख छा थ्वख ज़ि लऻरिथ
         गछ़ि
  अ: ल्यॆकि क्या खोच़ुन/बदकामि
        छॆ नॖ वज़नदार आसान
3. मु: माडि माज़स वातल वाज़ॖ
    अ: मऺकरिस चीज़स छि मऺकरी
        वरतावन वऻल्य/यथ नॖ कुनि
         रऺन्ग्य स्यज़र आसि
4. मु: ल्यॆकी तुलुन तॖ ल्यॆकी
         बॆहनावुन
    अ: कऻन्सि प्रथ विज़ि बेज़ती
         करॖन्य
5. मु: माडि माज़ म्यॆठिनॖ खानॖ-
         माजर पठि नॖ
    अ: ख़स्लथ छॆ नॖ बदलान/
         नाकारॖ मालस नाकारॖ
         वरतावन वोल
**************************
1. बऻवी...Something tends
               to happen/Which
             cannot be avoided
             Unavoidable
2. बऻगी....One who revolts/
             Rebel/Mutineer
3. बागि बोग....Share/Due
                      share
4. बऻय बरादरी..Brotherhood
5. बऻय बंदॖ...Relatives/Kith
                   and kin
6. नान्य....... Grandmother
7. मातामाल.... Maternal
8. माम.......Maternal uncle
9. माहर्यॆन्य....Bride
10. माहराज़ॖ....Bridegroom
**************************
        गीता ज्ञान  :अध्याय 18
ब्रह्मनन क्षॆत्रयन विशन तॖ शूदरन
कर्म यिहॖन्द्य स्वबावॖ सॗत्य उत्पन
ग्वनव मूजूब गऻमॖत्य मुकरर ज़ान
वॊन भगवानन गीता ज्ञान
**************************
रुत सात वुछिथ कॊर अमि माजि द्वयमिस यानि ल्वकॖटिस न्यॆचॖविस ति खान्दर आन बान तॖ शानॖ सान। योदवय ॳमिस कोरि यानि नवि न्वशि सऻरी ग्वन मेलान ॴस्य लऺडकॖ सॖन्द्यन ग्वनन सॗत्य अख ग्वन ओस नॖ मेलान। अथ ग्वनस ओस रूदमुत कुस ताम ग्वनॖ दूष, यथ नॖ कांह पूश। न मन्ज़िमयोर, नॖ ट्यॆकिन्य मिलावन वोल, न मऻज्य तॖ न ॳमिस कोरि हुन्द मोल। यि कूर ॴस शऺरीफ़ गरॖच रऺज़ील कूर। मनस मंज़ ईर्शा तॖ बुथिस प्यठ नूर। जान जान स्वभावव निशि स्यठाह दूर। यि नन्यव वारॖ वारॖ रॗनिस तॖ हशि यॆलि अमि न्वशि पनॖन्य पर ह्यॆत्य मऺच़रावॖन्य, बऻच़ ह्यॆतिन गऺन्ज़रावॖन्य, तल्खॖक्य तीर ह्यॆतिन चलावॖन्य। यॆमि हशि यि न्वश अनेयि कमि लोलॖ तॖ मायि सान तमीय न्वशि ह्यॊत करुन अथ लऺसिथ बसिथ गरस फुन्य फान।
न्वश ॴस पऺरमॖच़ ल्यीछमॖच़ मगर संस्कार ॴसिस रूद्यमॖत्य कथ ताम कूनस मंज़ मालिन दऺरिस मंज़ युस नॖ बोज़नॖ आव कऻन्सि ॳकिस ति। ऒत ताम ओस यि गरॖ गरॖ ह्यु बासान मगर ॳमिस न्वशि हॖन्द्य तेवर प्यॆयि वुल्टॖ तॖ गर्युक माहोल ह्यॊतुन संजीदॖ बनुन। माय महोब्बतस ह्यॆच़ॖन्य दरार प्यॆन्य। बानॖ ह्यॆतिन व्यॆगुर्य गछ़ॖन्य। मेछरस मंज़ ह्यॊतुन टेछर अच़ुन तॖ बास्यव ज़ि ब्रांदॖ कऺन्य छॆ नॖ स्यॆज़ बीठमॖच़। य्वस यि कथ आस बॖ वनान पऺतिम्यव द्वयव त्रॆयव दॊहव प्यठॖ अमि कथि हुन्द अंद छ़ान्डव पगाह। तॊत ताम सूंचिव तॊह्य ति ज़ि यॆमि कथि हुन्द अंद क्याह गछ़ि आसुन।
**************************
"ग्रटॖ छु फेरान ज़ेरे ज़ेरे
ओहकुय ज़ाने ग्रटॖकुय छ़ल
ग्रटॖ यॆलि फेरि ज़ऻव्युल न्येरे
गॊ वाति पानय ग्रटॖबल"
       ***********
अर्थात:- चक्की धीरे धीरे घूमती है
जिसे चलाने की तकनीक ग्राठी ही जानता है। जब चक्की चलेगी तो महीन आटा निकलेगा और गेहूं स्वंय ही चक्की पर पीसने के लिए
पहुंचेगा।
        पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)