31.12.2019

31.12.2019, पॊह (पौष) ज़ूनॖ पछ (शुक्लॖ पक्ष) पऻन्च़म (देवादेव) (पन्चमी) बॊम्वार (मंगलवार),श्री सप्तर्षी सम्वत 5095, राश कुम्ब (चलान), ऋतु हेमन्त (चलान), द्रठपऻन्च़ुक (पंचक)(चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात तॖ सॗत्य छु अख लल वाख ति अर्थ सहित
**************************
1. मु: मोतस तॖ कबरि छु हिसाब
    अ: हिसाब छु प्रथ कामि तॖ
         चीज़स
2. मु: मॊदुर दानॖ च़्वकि नॖ च़ॊक
         दानॖ मॊदरि नॖ
    अ: ख़स्लथ छॆ नॖ हरगिज़
         बदलान
3. मु: मॊंगॖ खार ख्यथ ति फ़ाकय
    अ: यस नॖ यड यी/ना शुकुर
          गुज़ार
4. मु: म्वय ति यॆती म्वयखानॖ ति
         यॆती
    अ: प्रथ कांह चीज़ मॊय्यसर
         आसुन
5. मु: मॊत च़ाव पॊत दारि क्वलय
         ह्यथ अटॖबारि
    अ: रनि हुन्द मारॖमोत छु
        इन्सानस क्वफ़ेल करॖनावान
**************************
1. बचुन....To be saved/To
          escape/To recover/
          To remain behind/
          To be felt over/To
          survive/To avoid
2. पचुन....To digest
3. बचावुन...To save/To pro
            tect/To defend/To
            escape/To rescue/
            To secure/To pre-
            serve/To guard
4. बचथ....Saving/Surplus/
         Gain/Profit/Residue/
         Remainder
5. बचॖ.....Child/Children
6. बचॖ नगमॖ....Male dance
7. बऺचरावुन....To save/To
               lay by/To be pro-
               tected
8. बचगान....Small baby/
                    Kids
9. बिचोर.....Helpless/Poor
                     Unfortunate/
                     Miserable
10. बचॖदऻन्य..Womb/Uterus
**************************
          गीता ज्ञान  :अध्याय 18
प्राभक्ती सॗत्य म्यॆ ब्रह्मस ज़ऻनिथ,
बॖ यि छुस युथ छुस यि तत्व मऻनिथ, अमी तत्वॖ ज्ञानॖ म्यॆ मंज़ लय सपदान।
वॊन भगवानन गीता ज्ञान
**************************
अज़ छु अकत्रॖह दिसम्बर ज़ॖ सास कुनवुह यानि यॆमि वऺरियुक पऺतिम द्वह। पगाह अच़व ॳस्य वारॖ कारॖ नऺविस वऺरियस मंज़। पगहॖच कथ करव पगहॗय मगर अज़ वुछव ॳस्य असि क्याह लॊब तॖ असि क्याह रोव यथ वऺरियस मंज़। प्यॆठ्य प्यॆठ्य यॊदवय वुछव तॖ म्यान्यन कॆंच़न बायन वॊथ मऻल्यसुन्द सायि, कॆंच़न हॖन्ज़ मऻज्य वऻच़ स्वर्गस। वारियाह गऺयि बायन निशि छ़्यनॖ तॖ कॆंहन रऻव ब्यॆनि। यथ वऺरियस मंज़ अगर वुछव तॖ बासान छु ज़ि मरन वाल्यन हॖन्ज़ रफ़तार रूज़ तेज़। नेरान अकि फिरि फ़ेरान नॖ वापस, फेरान मगर तमिकुय कॆंह कालस। नम गछ़ान ॳछ यॆलि फ्युर लगान ख़यालस।दमफुट्य गछ़ान लगान ब्यॆयि तऺथ्य जंजालस। व्वंय त्रावव नज़र दॊयिमिस तरफस कुन तॖ वुछव असि लॊब क्याह। कॆंह म्यऻन्य बऻय आयि पनॖन्य माहर्यॆन ह्यथ तॖ कॆंह म्यऻनि ब्यॆनि आयि पनॖन्यन माहराज़न ह्यथ। मगर यिमन खान्दरन मंज़ वुछव यॊदवय तॖ वारियाह खान्दर गऺयि ज़ऻच़ न्यबर। वख छु बदलान मगर
बदलॖन्य गछ़ि नॖ पनॖन्य सभ्यता, बदलॖन्य गछ़न नॖ पनॖन्य संस्कार। ति करनॖ सॗत्य छु असि पनॖनिस समाजस ज़ख वातान। नऺविस वऺरियस मंज़ ह्यकन सऻन्य शुर्य यिमन कथन प्यठ सोंच विचार कऺरिथ। नवज़ात शुर्यन हॖन्ज़ ग्रन्द छि वारियाह कम रूज़मॖच़ यथ वऺरियस मंज़। वारियाह शुर्य वऻत्य व्यलायथ मऻलिस माजि यॆति भगवानस हवालॖ कऺरिथ। वारियाह सऻन्य शुर्य गऺयि परनस ल्यॆखनस मंज़ बजाह।यि छि मुबारॖकॖच कथ। भगवानस मंगव यॆति ब्रौंठकुन ॳस्य ज़ि असि जान जान काम्यन मंज़ काम्याबी मेलॖन्य। नाकारॖ काम्यन निशि दूर थावुन। बजाह रूज़िव युस यॆतिनस छुवॖ। नोव वऺरी नीर्यनवॖ ह्रॊच़ तॖ फ्रूच़।
************************** 
              लल वाक्           
"राजस बऻज यॆम्य करतल त्यऻज्य
स्वर्गस बऻज छुय तफ तय दान
सहज़स बऻज यॆम्य ग्वर कथ पऻज्य
पापॖ प्वन्य बऻज छुय पनुनुय पान"
           ***********
अर्थात:- तलवार का त्यागी राज्य का भागीदार है। तप दान करने वाला स्वर्ग का साझी है और गुरु वाक्य का पालन करने वाला ही शिव का साथी है और पाप पुन्य का साझी अपना आप ही है।
     पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव