27.12.2019

27.12.2019, पॊह (पौष) ज़ूनॖ पछ (शुक्लॖ पक्ष) ऒक्दॊह (देवादेव) (प्रथम) शॊकुरवार (शुक्रवार/जुम्मा)श्री सप्तर्षी सम्वत 5095, राश मकर (रऻच़ हॖन्ज़ॖ 11.44 बजि प्यठॖ) ऋतु हेमन्त (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात तॖ सॗत्य छु अख लल वाख ति अर्थ सहित
**************************
1. मु: मऺछ कयाह ज़ानि पोंपुर्य
         गथ
    अ: ल्वकट्यन कयाह छि ब्यॆयि
         सॖन्दि बजरॖच पताह
2. मु: मॊदुर म्यक्राज़
    अ: पनुन लऻगिथ न्वकसान
         वातॖनावुन
3. मु: मरच़ॖ पीपिन्य हिश नच़ुन
    अ: ॳक्सी जायि नॖ बिहुन
4. मु: मरॖहऻ गरि कुस थवन
    अ: कुन्यरुक एहसास
5. मु: मऺरिथ दऻर खॖन्ज़ॖन्य
    अ: न्वख्तॖचीनी करॖन्य/बद
         लिहाज़ लागुन
**************************
1. न्यॆचुव....Son
2. कूर.......Daughter
3. ज़्युर.....Grandson
4. ज़िर......Grand daughter
5. मऻज्य....Mother
6. वोरॖ मऻज्य....Step mother
7. मोल......Father
8. वोरॖ मोल....Step father
9. ब्यॆमॖ.........Brother in law
10. ज़ामतुर.....Son in law
**************************
          गीता ज्ञान  :अध्याय 18
ज्ञान यूगॖच य्वस स्थिति आसान, यॆमि स्यॆदी मनुश ब्रह्मस प्रावान,हे अर्ज़न बोज़ वनय छ़ॊच़रॖ सान
वॊन भगवानन गीता ज्ञान
**************************
विश्वास छु बॊड चीज़। विश्वासस प्यठ छु सम्सार पकान। कुस कऺमिस प्यठ कोताह विश्वास करान छु या कोताह विश्वास करुन पज़ि यि वनुन छु स्यठाह मुश्किल मगर अथ मंज़ संशय छु नॖ कांह ज़ि विश्वास छु वाठ दिवान द्वन दिलन। शुरिस माजि प्यठ विश्वास, माजि शुरिस प्यठ। ब्यॆनि बऻयिस प्यठ या बऻयिस ब्यॆनि प्यठ। रॗनिस ज़नानि प्यठ या ज़नानि रॗनिस प्यठ, यारस यारस प्यठ। ग्वरस भक्तस प्यठ या भक्तस ग्वरस प्यठ। यि विश्वास छु नॖ अकि अंदॖ आसान बऺल्कि दु-तरफानॖ। यॆत्यन विश्वास डॊल ज़ानुन गछ़ि तऺमिस अन्तरात्मा गॊल। मनुशस छु विश्वास ज़ि कनि मंज़ छु भगवान, कॆंच़न छु विश्वास ज़ि भगवान छु नॖ कुनीय। कॆंच़न छु पीरस फ्कीरस प्यठ विश्वास कॆंच़न छु नॖ मन्दरन मंज़ ति विश्वास। शंकराचार्यस बास्यव ज़ि साईं छु नॖ कॖन्हॗय मगर ज़ानि सु भक्त यॆमिस साईयस मंज़ क्याहताम नज़र आव तॖ तऺमिस प्यठ द्युतुन ज़ुव तॖ जान। वनुन छु म्यॆ ज़ि ग्वडॖ च़ॖ पनुन पान परज़ॖनाव। तथ्य अन्दर छु बिहित भगवान। तथ दि कांह ति नाव, कांह ति स्वरूप, कांह ति रऺग। यि छु सोरुय च्यऻनिस विश्वासस प्यठ। विश्वास गछ़ि करुन तॖ तथ प्यठ पज़ि दरुन।
**************************
            लल वाक्
" कुस हा मालि लूसुय नॖ पकान पकान
कुस हा मालि लूसुय नॖ व्वल्गान सुमीर
कुस हा मालि लूसुय नॖ मरान तॖ ज़्यवान
कुस हा मालि लूसुय नॖ करान न्यंद्या
            ************
अर्थात:- कौन है जो चलते चलते थक हार न गया।कौन है जो सुमेरु पर्वत को लांघते लांघते अस्त न हुआ।कौन है जो ज़न्म मरन के फेरों से नहीं हारा और कौन है जो निंद्या करते बाज़ न आया?
       पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)