12.12.2019

12.12.2019, मॊन्जहोर (मार्ग) ज़ूनॖ पछॖ (शुक्ल पक्ष) पुनिम(देवादेव) (पूर्णिमा) ब्रसवार (वीरवार/ब्रहस्पथवार/गुरुवार),श्री सप्तर्षी सम्वत 5095, राश मिथुन (शामन 6.22 बजि प्यठॖ), ऋतु हेमन्त (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात तॖ सॗत्य छु अख लल वाख अर्थ सहित
**************************
1. मु: लर्यन बऻच़ तॖ बऻच़न बतॖ
    अ: लरि गऺयि त्यॆलि यॆलि बऻच़
         आसनस तॖ बऻच़न गछ़ि बतॖ
         आसुन
2. मु: लरि तल नॖ वगुव ति रोज़ुन
    अ: स्यठाह गुर्बत प्यॆन्य
3. मु: लाख लाख निन्य तॖ बाख
         बाख दिन्य
    अ: नी नी ति बारव दिन्य/
         ॴसिथ बऺसिथ ति नाशुक-
         री करॖन्य
4. मु: लऻव ब्वद गऺयि सऻव ब्वद
    अ: ल्वकचि वुम्बरि मंज़ गाटॖ-
         जार/ल्वकटिस छु जल्द
         फिकॖरि तरान
5. मु: लरि लब रटॖन्य
    अ: कऻन्सि नखॖ गछ़ुन/दोस्ती
          मंज़ ब्यॆयिहऻन नखॖ युन
**************************
1. प्रभात....Dawn
2. सुब.......Morning
3. दुपऺहर....Noon
4. शाम...... Evening
5. राथ......Night/Yesterday
6. पगाह....., Tomorrow
7. कऻल्यक्यथ....Day after
                         tomorrow
8. कालॖ ........ Yesterday
9. ऊतरॖ.........Day before
                     yesterday
10. हफ़तॖ......Week
**************************
         गीता ज्ञान  :अध्याय 18
युस कर्ता मुडॖ मूर्ख नादान, ब्यॆयन हुन्द रोज़गार नष्ट करान दॖयवुन
आलुछ़ लद सु तामसी ज़ान।
वॊन भगवानन गीता ज्ञान
**************************
म्यॆ छु बासान ज़ि वख्तस सॗत्य सॗत्य छि सान्यन शुर्यन धर्मॖच/कर्मॖच ज़ऻन्यकऻरी ह्यॆच़ॖमॖच़ कम गछ़ॖन्य। यि कऺमी छॆ नॖ केवल सानि ज़ऻच़ मंज़ शुर्यॆन योतुय बऺल्कि बाकय ज़ऻच़ हॖन्द्यन शुर्यॆन ति छि अमिच कऺमी वुछनस तल यिवान। सुय वजह छु ज़ि अज़कलॖक्य सऻरी नवजवान लऺडकॖ किहो कोरि छि हवहऻस मंज़ वुडान पनॖन्यन संस्कारन लतॖक्रम कऺरिथ पकान तॖ करान रोज़ान बद कार तॖ बूगान छि ब्यॊन ब्यॊन रऺगव द्वख विज़ि विज़ि। परुन ल्यॆखुन छु पॊज़ मगर पनॖनि संस्कृति रऻछ़ करॖन्य ति छि तीच़ॖय ज़रूरी यानि पनॖन्यन संस्कारन प्यठ पकनॖ सॗत्य छि मेलान आसऻयिश, मनॖच खुशि तॖ तनाव निशि म्वक्ति। यि छु सान्यव बुज़र्गव परखोवमुत तॖ थऺवमॖच़ यि परम्परा जऻरी। असि ति छु फ़र्ज़ यि परम्परा ब्रौंहकुन पकनावॖन्य बेशक़ नवि अंदाज़ॖ तॖ नवि तऺरीकॖ सॗत्य। पौंस छु अथुक मल। यि छु नॖ हमेशॖ बापथ रोज़वुन मगर संस्कार छि रोज़वॖन्य तॖ रोज़ान इन्सानस वतॖ-हावक। पोंसॖ छु मायाज़ाल तॖ मन छु चंचल। मायाज़ालॖ मंज़ॖ नीरिथ तॖ मन डन्जि थऺविथ छु असि क़दम क़दम कडुन तॖ स्वख तॖ शऻन्ती प्राप्त करॖन्य। शुर्यन धर्मॖच तॖ कर्मॖच ज़ऻन्यकऻरी दिन्य तॖ  तिमन प्यठ  विश्वास थवुन पज़ि असि तॖ सान्यन शुर्यन पज़ि पनॖन्य मऺर्यादा ज़िन्दॖ थावॖन्य। पनॖनि वंशुक नाव शूबरावुन तॖ नाकारॖ काम्यन निशि दूर रूज़िथ पनुन नाव रथि खारुन।
**************************
"साहिब छु बिहिथ पानय वानस
सऻरी मंगान कॆंछ़ाह दि
रॊट नो कऻन्सि हुन्द रऻछ नो वानस
यि च़्यॆ गछ़िय ति पानय नि"
          *********
अर्थात:- साहिब (ईश्वर) स्वयं दुकान लगाए बैठे हैं। सभी कुछ न कुछ देने (उन से लेने) की याचना करते हैं। (यहां) किसी की रोक टोक नहीं। दुकान का कोई प्रहरी नहीं, जो तुझे चाहिये, स्वयं ही ले जा"
      पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)