13.12.2019

13.12.2019, पॊह (पौष) गटॖ पछॖ (कृष्ण पक्ष) ऒक्दॊह(देवादेव) (प्रथम), शॊकुरवार (शुक्रवार/जुम्मा),श्री सप्तर्षी सम्वत 5095, राश मिथुन (चलान),ऋतु हेमन्त (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात तॖ सॗत्य छु अख लल वाख अर्थ सहित
**************************
1. मु: लरि तल नॖ गासॖ न्यॆबरॖ
         वनॖनॖ फरि
    अ: छ़र्यन मच्यन ठसॖय योत/
         छ़ऺरी ह्वॊख्य दम दिन्य
2. मु: लडऻय मऺल्य ह्यॆन्य
  अ: हंगॖ तॖ मंगॖ तनाज़न मंज़ पान
       आवरावुन/लडायगॊर आसुन
3. मु: लऺड्य लऺड्य ह्यॊन
    अ: ताकॖत्कि ज़ोरॖ कॆंह हऻसिल
         करुन
4. मु: लछ़ॖज्य लगॖन्य
    अ: बॆ-वख मरुन
5. मु: लछ़ि गछ़ुन
    अ: बेयज़थ गछ़ुन/यज़थ नॖ
         रोज़ुन
**************************
1. बर/दरवाज़ॖ....Door
2. दऻर.........Window/Beard
3. डीड्य......Big gate
4. हेर.......... Stairs
5. हेरॖ पऻयव.....Steps
6. लब.........Wall
7. तालव....... Ceiling
8. छत..........Roof
9. डब....Veranda(wooden)
10. कुठ........Room
**************************
         गीता ज्ञान  :अध्याय 18
हे अर्ज़न बुदी तॖ व्रती ज़ान, ग्वनव
किन्य ति त्र्यॆयि प्रकऻर्य आसान, पूरॖ पऻठ्य अलग अलग वनय थव ध्यान।
वॊन भगवानन गीता ज्ञान
**************************
अख कऻशिर कूर वुछिम छि आमॖच़ बागॖन्य ॳकिस पंज्यऻब्य लऺडकस। खान्दरस प्यठ छु कोरि दपान ओस ड्यॆजिहोर पनॖन्यन कनन लगोवमुत। वऻरिव वऻतिथ यिम ति तऺमिस आयि मुबारकस तिमव वुछ ॳमिस कनन मंज़ ड्यॆजिहोर लऻगिथ तॖ गऺयि हऻरान ज़ि ॳमिस छु क्याह यि। ॳमि कोरि वॊन तिमन ज़ि बॖ छस कऻशिर्य कूर तॖ यि ड्यॆजिहोर छु असि मंज़ सुहागॖच निशऻनी यानि मंगल सूत्र। तिमन खॊत नॖ ॳमिस कोरि हुन्द वनुन टारि कॆंह तॖ दॊपहस ज़ि चूंकि च़ॖ आयख सऻनिस गरस मंज़, च़्ये प्यॆयि ती करुन य्वस सऻनिस पंज्यऻब गरस मंज़ रसमो-रिवाज छु। द्वनवय दऺर्य छि पनॖनि पनॖनि जायि सऺही मगर फ़ऻसलॖ करि कुस। तनाव छु गोमुत दपान शुरु अथ गरस मंज़ ड्यॆजिहऻरिस प्यठ। कूर दपान ज़ि खांदरॖ ब्रौंठ छु तमि लऺडकस यि साफ़ पऻठ्य वॊनुमुत ज़ि स्व यी वऻरिव गरॖ ड्यॆजिहोर लगऻविथ। ॳशॖक छु ऒन। लऺडकन मोन कोरि हुन्द वनुन मगर लऺडकॖवाल्यव ह्यॊत अथ कथि सनुन। बोज़नस तल आव ज़ि कोरि छु नॖ पनॖनि खांदरॖ पतॖ अख ति प्रूग वऻरिव ऒनॖमुत तॖ न छु अमि पानस सॗत्य खांदरस प्यठ ॳन्यमॖत्य ट्रंक वऻरिव बऻच़न ब्रौंहकनि मॖच़ॖरऻव्यमॖत्य ति वुन्युखताम। लऺडकॖ आमुत छु दु-तरफानॖ अज़ाबस मंज़। यपऻर्य ज़नानि हुन्द प्यार तॖ हूपऻर्य गरिक्यन हुन्द बार। कर्मॖ लीखाये कर नमस्कार। ब्रौंहकुन वुछव कस सॖन्ज़ मऻज्य स्वन तोलि तॖ कस सॖन्ज़ मऻज्य ऱवफ तॊलि।
तथ गरस मंज़ छि चलान ब्यॊन ब्यॊन बोलि।
**************************
"संसारस मंज़बाग कथ शायि रोज़य
वेज़ि परम शिव शम्भू अघूर।
ल्वलि मंज़बाग बोय ललॖनावन,
जिगरस मंज़बाग करस गूरॖ-गूर"
         ************
अर्थात:- संसार के मध्य मैं यहां किस तरह रहूं । (यहां तो) परमशिव अघोर शम्भू ही रहेगा। मैं उसी को अपनी गोद में ले कर हिला-डुला लूंगी और अपने हृदय के झूले में उसे झूले झुलाऊंगी।
    पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)