03.12.2019

03.12.2019, मॊन्जहोर (मार्ग) ज़ूनॖ पछॖ (शुक्ल पक्ष)सतम(सप्तमी) बॊम्वार (मंगलवार) श्री सप्तर्षी सम्वत 5095, राश कुम्भ (चलान), ऋतु हेमन्त (चलान) द्रठॖपऻन्च़ुक (पंचक) (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात तॖ सॗत्य छुस अख लल वाख ति अर्थ सॗत्य ह्यथ
**************************
1. मु: गगुर यॆलि नॖ ॳच़िथ ह्यॆकि
         वाजि तॖ पतॖ ह्यथ माजि
   अ: अगर नॖ कांह ह्यकि मुश्किल
        कऻम कऺरिथ/पानस नॖ वातुन
        तॖ ब्यॆयिसॖन्ज़ ज़िम्वऻरी ह्यॆन्य
2. मु: गगुर खोच़ान ब्रऻरिस तॖ
         ज़रोर खोच़ान हूनिस
    अ: प्रथ जानवरस छु ब्यॆयिस
       जानवर सुन्द हऻबथ आसान/
       प्रथ ल्वकटिस बऺडिस छु
       कऻन्सि हुन्द रोब आसान
3. मु: गगुर छु करान ब्रऻरिस लार
    अ: यि ख़लाफ़ि क्वदरयथ या
         ख़लाफि तवक़ू आसि ति
         सपदुन
4. मु: गगुर च़ाव लऺकरि बनि ह्यथ
         क्याह च़ाव तॖ ख्यथ क्याह
         द्राव
    अ: फ़ऺज़ूल कांह कऻम करनॖ
          सॗत्य छु नॖ कॆंह न्येरान/
          फ़ऺज़ूल कऻम
5. मु: गगुर वॊथ ब्रऻरिस ख्यॆनि
    अ: कमज़ोर सुन्द ज़ोरावरस
          सॗत्य मुक़ाबलॖ करुन
**************************
1. बार..... Weight/Weigh-
           ing/Responsibi-
           lity/Room or coun
           ter where drinks
           are served/The
        profession of barris-
        ters
2. बाड.......Fence
3. बार वोल.....Weighty/
                       Heavy
4. बारव.....Scream/Noise/
                 Wild cry
5. बारॖन्य......Brothers
6. बारदानॖ.....Gunny bags/
            Forage/Weight/
            Packages/Provi-
            sion
7. बारगाह..... Palace/Court
            Place of audience/
         Place of some saint
8. बारसस युन.....To come in
                           existence
9. बाज़......Turn in play/
                  Falcon
10. बाज़र.......Market
**************************
        गीता ज्ञान  :अध्याय 18
युस कर्ता मुडॖ मूर्ख नादान, ब्यॆयन हुन्द रोज़गार नष्ट करान, दॖयवुन
आलुछ़ लद सु तामसी ज़ान।
वॊन भगवानन गीता ज्ञान
**************************
बऺहस छु असि पानॖवुन्य जऻरी। अख छु दिवान बारव ज़ि शुर्य छिनॖ कऻशिर्य बटॖ ज़्यादॖ थवान ति क्याज़ि शुर पालुन छु नॖ अज़कल किस वखतस मंज़ सऺहल कथा। ॳकिस शुरिस ज़्यनॖ प्यठॖ ता लाकि तऺम्यसॖन्ज़ि तऻलीम पूरॖ गछ़नस ताम छु लछॖबॊद रॊपियि लगान। तॖ द्वन या त्र्यन शुर्यन रछनस सॊम्ब कति छि त्वछ़। ब्याख आवाज़ छि वनान ज़ि यॊदवय ॳस्य ॳक्यसॖय शुरिस प्यठ रोज़व तॖ सोन वंश किथॖ पऻठ्य बडि। अगर कऻन्सि अकॖय कूर ज़न्मस आयि तॖ तऺम्य सॖन्द्य मऻल्य माजि तऺम्यसॖय परवऺरिश कऺरॖ तॖ तऺमिस खान्दर करिथ रूद नॖ वंश ब्रौंहकुन पकनावनस कांह। सु खानदान छ़ॊक्यव तॖ श्रॊक्यव तती। अमि पतॖ योदवय अमि कोरि पर-ज़ऻच़ मंज़ पनुन वर छ़ोंड तॖ ॳमिस कोरि रावि कॆंच़ॖकऻल्य पतॖ पनॖन्य प्रज़नथॖय।
मसलॖ छु गऺम्बीर कऺशीरि तरव वापस या न तरव तमि खॊतॖ गऺम्बीर मसलॖ छु यि ज़ि ॳस्य कऻशिर्य बटॖ किथ पऻठ्य बऺडरावव पनॖन्य वंश तॖ पनॖन्य संख्या। मरुन ज़्यॊन ति छु थवुन मदिनज़र। ॳड्य छि सहमत ज़ि शुरिस गछ़ि च़ीर्य खान्दर युन करनॖ तॖ ॳड्य छि सहमत ज़ि ज़्यादॖ च़ीर्य खान्दर करनॖ सॗत्य छु शुर्य सुन्द यावुन रावान। यिम ल्वकॖट्य म्वकॖट्य मसलॖ छि स्यठाह पीचीदॖ मसलॖ। बॖ छुस पनॖन्य शुर्यन गुज़ऻरिश करान ज़ि पनॖन्यन गरन मंज़ थऺव्यतव पनॖन्य कऻशिर्य ज़्यव बरक़रार युथ बऺडिथ तॊह्य ह्यॆकिव पनॖनि गर्युक इतिहास पानॖ समजिथ। पनुन अदब पानॖ ज़ऻनिथ। यकीन कऺरिव सान्यन शुर्यन छॆ नॖ पनॖनिस नानि बुड्यबबसुन्द नाव पताह। यि घाव यानि यि ज़ख़म कोताह द्वखदायक छु च़्येनन वोलॖय च़्येनि।
**************************
"परस हा मालि पॊरुम तॖ पानस वुनुम
वनॖ कस ललि छुय म्य पानस राह
वाय गोम दिलस म्यॆ क्याह कॊरुम
कुनुय ॴसिथ सॊरुम नॖ ज़ांह"
         ************
अर्थात:- दूसरे को पढाया किंतु स्वयं समझा नहीं और यह मेरा अपना ही अपराध है। एसा मैं ने क्यों किया यही दुख मुझे हुआ है।एक होकर कभी स्मरण नहीं किया।
        पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)