11.12.2019

11.12.2019, मॊन्जहोर (मार्ग) ज़ूनॖ पछॖ (शुक्ल पक्ष) च़्वदह (देवादेव) (चतुर्दशी) ब्वदवार (बुधवार), श्री सप्तार्षि सम्वत 5095, राश वृष (चलान) ऋतु हेमन्त (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात तॖ सॗत्य छु अख लल वाख ति अर्थ सहित
**************************
1. मु: लाम लगॖन्य
    अ: लऻन लगॖन्य/अख ॳकिस
         पतॖ कुनि जायि दवुन प्यॊन
2. मु: लाफ़ गऺछ़्यनम म्वाफ़
    अ: पनॖनि ताक़तुक बे-जा
         इस्तिमाल करनुक एहसास
         गछ़ुन
3. मु: लऻर्य किन्य लोहूर
    अ: ज़्येछर द्युन/वथ तॖ कथ
          ज़्येठॖरावॖन्य
4. मु: लऻर ख्यवान पानस डाकर
         त्रावान ब्यॆयिस
    अ: हंगॖ तॖ मंगॖच थज़र हावुन/
         मग़रूरियत हावॖन्य
5. मु: लाल शिनऻयसी ज़ानि
         लालुक क़दॖर
    अ: क़दॖर दानॖय ज़ानि मालॖच
          या कामि हॖन्ज़ क़दॖर
**************************
1. त्रकुर.... Hard
2. नर्म.....Soft
3. गर्म.....Hot
4. शर्म......Shy
5. धर्म...... Religion
6. कर्म.......work
7. दम.......Silence
8. ग़म.......Worry/Sadness
9. वन......Forest/Reveal
10.पन.....Thread
**************************
       गीता ज्ञान  :अध्याय 18
हे अर्ज़न स्वख त्रॆयि प्रकऻर्य आसान, युस स्वखस मंज़ मनुश करि धर्म ध्यान, सीवा बावॖ द्वखन नष्ट करान
वॊन भगवानन गीता ज्ञान
**************************
ॳक्य बरादरन दपान सूज़ आमुत माहराज़ वापस यि वऺनिथ ज़ि च़ॖ आख पनॖन्य बरात ह्यथ लगनॖ सात नीरिथ तॖ दॊपनस च़ॖ यीज़ि नॊव सात वुछिथ म्यऻन्य कूर पानस सॗत्य निनि। हालांकि दपान यॆन्यवोल यानि बरऻच़ सॗत्य आमॖत्य बरऻत्य ख्यॆविख च्यऻविख बडॖ मान सम्मानॖ सान। मगर लऺगॖन यॆच़ि बजि आमुत ओस वनॖनॖ आमुत तमि समयुक क़दॖर न ज़ऻनिथ आव माहराज़ स्व लऺगनुक सातॖ नीरिथ। दपान कोरि मऻलिस गऺयि शिग तॖ सूंचुन कूर गछ़्यम वारॖ रोज़ॖन्य वऻरिव गरस मंज़। सूंचुन अगर बॖ लऺगनॖकिस सातस प्यठ ह्यकॖ नॖ कन्या दान कऺरिथ ख़बर छा कॆंह वुल्टॖ मा गछ़ि। अवॖ मूजूब सूज़ुन माहराज़ॖ वापस तॖ दॊपनस म्यऻन्य कूर छि च्यऻनी मगर यि कडन सातस प्यठ माल्यनि गरि प्यठॖ।अख विश्वास मानव यि।  दॊयिमि तरफ़ॖ गव ॳकिस माहराज़स स्यठाह च़ेर बरात ह्यथ होवुर वातॖनस। दपान कोरि रोव ताब तॖ तमि कॊर बेतऻबी मंज़  पनॖनिसॖय मऺहल्लस मंज़ कऺमिस ताम लऺडकस सॗत्य खांदर यि सुंचिथ ज़ि शायद मा यी नॖ असली माहराज़ॖ तऺमिस निनॖ बापथ। मगर दपान सु माहराज़ॖ ओस कथ ताम जामस मंज़ कथ तान्य जायि फस्योमुत वॊकॖ पऻठ्य तॖ ह्यॊक नॖ वखतस प्यठ वऻतिथ। अखबारॖच खबर पऺरॖम यि कॆंह द्वह ब्रौंठॖय। यि ख़बर ॴस्य सानि ज़ऻच़ न्यबर कुनि ब्यॆयि ज़ऻच़ मुतलक़। यि गव अंद-विश्वास या वनव अख वऺहमॖ मनस मंज़ आसुन। मगर वुछव यॊदवय हालात बदलनस छॆ नॖ तऻर लगान अज़कल। तवय वॊन म्यॆ ज़ि असि छि पनॖन्य रऻछ पानॖ करॖन्य प्रथ तरफ़ॖ। ॳज़्युक आसामुक तनाव वुछिथ छु म्यॆ बासान ज़ि यिनॖवोल वख मा आसि सख़। असि पज़ि पनॖनि माजि ज़्येवि ति बराबर रऻछ करॖन्य युथ नॖ पतॖ पछतावुन प्यॆयि यॆलि हालातन व्वलॖगॊतुन लगि ब्यॆयि।
**************************
"दोद क्या ज़ानि यस नो बने
ग़मॖक्य जामॖ हा वऺलिथ तने
गरॖ गरॖ फीरॖस प्यॆयम कने
ड्यूंठुम नॖ कांह ति पनॖनि कने"
        *************
अर्थात:- जिस पर बन न आई हो, वह दर्द क्या जाने। ग़म (वेदना) का बाना तन पर धारण करके मैं घर घर भटकी और हर जगह मुझ पर पत्थर बरसे। किसी को भी मैं ने अपनी तरफ़ या अपनी तरह का नहीं पाया"
     पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)