04.12.2019

04.12.2019,मॊन्जहोर (मार्ग) ज़ूनॖ पछॖ (शुक्ल पक्ष) ॴठम (अष्टमी) ब्वदवार (बुधवार) श्री सप्तर्षी सम्वत 5095, राश कुम्भ (चलान) ऋतु हेमन्त (चलान) द्रठॖपऻन्च़ुक (पंचक) (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात तॖ सॗत्य छुस अख लल वाख ति अर्थ सॗत्य ह्यथ
**************************
1. मु: गल वानस गुर हवालॖ
    अ: यसुन्द ख़तरॖ आसि तऺस्य
         पान मटि थवुन
2. मु: गगरायन छु नॖ रूद आसान
    अ: युस क्रख करि सु छु नॖ
         कऻम कॊट करनस पोशान
3. मु: गिल छय कांछान दानॖ
    अ: प्रथ शख़स छु ती यछ़ान
         यथ मंज़ तस फ़ऻयदॖ आसि
4. मु: गगॖर सऻर
    अ: रच़ि रच़ि च़ूरि निनॖच अमल
5. मु: गगरि हुन्द कन
    अ: कथ ज़्येठॖन्य
**************************
1. बास..... Feeling
2. बासकर......Sun
3. बासमथ......A variety of
                      rice
4. त्वमुल........Rice
5. बासुन........To feel
6. बासनावुन....To make
                     some one feel
7. बाशन्दॖ....... Inhabitant/
               Resident/Citizen
8. बाषा........Language
9. बाषॖ.......First talks of
                  baby
10. बाशानॖ.....With grande-
               uer/With dignity
 **************************
         गीता ज्ञान  :अध्याय 18
हे अर्ज़न बुदी तॖ व्रती ज़ान, ग्वनव
किन्य ति त्र्यॆयि प्रकऻर्य आसान।
पूरॖ पऻठ्य अलग अलग वनय थव ध्यान
वॊन भगवानन गीता ज्ञान
**************************
कऻशर्यव ह्यॆत्य पनॖन्य पनॖन्य ग्रुप बनावॖन्य पनॖनिस समाजस मंज़ खान्दरन प्यठ ग्यवनॖ बापथ तॖ यिमन ग्रुपन मंज़ सऻरी साज़िन्दर छि नॖ कऻशिर पंडितॖय यऻत्य आसान। रबाब सारन्ग वुछ म्यॆ वुनिति मुसलमान साज़िन्दरॖय वायान। कऻशुर बटॖ छु अथॖबाजि सम्बऻलान तॖ पानॖ ति ग्यवान मगर नच़न-गॊर छु वुनि ति मुसलमानॖय।कऻशिर्य बटॖ छि परहेज़ करनॖ पतॖ ति यिमनॖय गिन्दन-गर्यन सॗत्यी मऻन्ज़रऻच़न मंज़ नच़ान तॖ गतॖ ग्यूर तुलान। अख ज़ानन वाज्यन कथ छि यिति ज़ि यीत्य ति बऻथ यिमन बड्यन व्वछ़बन दॊहन या यिमन  व्वतसवन प्यठ ग्यवनॖ यिवान शीथ फ़ी सऺदी बऻथ छि तिम यिम मुसलमानवॖय लीख्यमॖत्य छि तॖ परनॖ छि यिवान चावॖ सान।रसुल मीर, वाहब ख़ार, न्यामॖ सऻब, जानबाज्, हब्बॖ खॊतून, वगैरा वगैरा।  रॊपियि  छि यिवान आलवनॖ नच़न वाल्यन प्यठ ति क्याज़ि युथ नॖ कऻन्सि हॖन्ज़ नज़र लग्यख।रॊपियन छु नॖ शुमारॖय रोज़ान। नच़नगॊर छु नच़ान कम तॖ रॊपियि वटान खुलॖ। वाव वुछिथ नाव त्रावान। यॆति तस बासान छु ज़ि यज़मन सॖन्दि गरि छि नच़न वाल्यन हुन्द शुमार जान तति छु सु तमी आयि लगान नच़नि। कोताह परिहेज़ कऺर्यतन यि बटॖ मगर तोति छुस ॳम्यसॖय मुसलमानस सॗत्य कारॖबार करुन।
बटॖ च़ऺल्यतन कोताह ति दूर यिमन निशि तोति छु यिमनॖय सॗत्य मेलनस प्यठ मजबूर कुनि नतॖ कुनि रऺन्ग्य। ॳम्यसॖय मुसलमानस सॗत्य छु अलनॖ तॖ वलनॖ यिवान तॖ पकान।कथ छि जऻरी। दय कऺरिन असि सारिनॖय यऻरी।
**************************
"शहन हुन्द शिकार गऻन्ठ कवॖ ज़ाने
हऻन्ठ कवॖ ज़ाने प्वत्रॖ दोद
शमहुक सोज़ लऺश कवॖ ज़ाने
मऺछ कवॖ ज़ाने पोम्पॖर्य गथ"
          ************
अर्थ:- शाहबाज़ की तरह शिकार
करने का अनुभव चील को कैसे हो सकता है। बांझ महिला पुत्र का दर्द कैसे जान सकती है।शमह का प्रकाश तथा लकडी की रोशनी की समता नहीं। परवाना और मक्खी की समता नहीं है।
        पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)