09.12.2019

09.12.2019,मॊन्जहोर (मार्ग) ज़ूनॖ पछॖ (शुक्ल पक्ष) बाह (देवादेव) (द्वादशी) च़ऺन्दॖरवार (सोमवार) श्री सप्तर्षी सम्वत 5095,राश मेष (चलान) ऋतु हेमन्त (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात तॖ सॗत्य छु अख लल वाख ति अर्थ सहित
**************************
1. मु: गूर्य हखुर
    अ: चोर/बेवक़ूफ़/नादान
2. मु: गोलि लायक़
    अ: बे-आर
3. मु: गोंछ़ि मथुन सॊम्ब
    अ: स्यठाह कम
4. मु: गोंछ़ बुड दम
    अ: यावॖ यठ
5. मु: गोंछ़ि ॴस पतॖ खोस
    अ: प्रथ कांह चीज़ छु पनॖनि
         अनॖवारि सपदान
**************************
1. बऻब्य टूप्य....A kind of cap
2. बावजूद.....In spite of
3. बावरॖ......Mad/Insane/De
                ranged/Foolish
4. बावज़ॖ........ Niece
5. बाह.......Twelve/Steam
6. बावुन.....To offer/To put
                in water(Flowers
                etc. of Pooja)/To
             express/To reveal
7. बावथ.....To express
8. बाव खसुन....To become
              expensive/To be
              in more demand
9. बाव करुन....To fix a price
10. बाववॊट..... Bracelet
**************************
        गीता ज्ञान  :अध्याय 18
युस मनुश फलॖच यछ़ा थऺविथ धर्म कामस लॊग रूज़िथ,स्व दारना
शक्ती राजस ज़ान
वॊन भगवानन गीता ज्ञान
**************************
पनॖन्यन शुर्यन प्यठ छि नज़र थवॖन्य ज़रूरी। विश्वास छु प्रथ मऻलिस माजि पनॖनिस शुरिस प्यठ अथ मंज़ कांह शक़ छु नॖ मगर अज़ कलॖक हालाथ वुछिथ छु इन्सान त्रऻहरान। बऺहमि जमऻच़ ताम छु ॳज़्युक शुर पनॖनिस मऻलिस माजि हॖन्दिस यि दऺप्यज़ि ति फऺरिस तल आसान तॖ ॳमि पतॖ छि लाकम ह्यवान ड्यॆज्य गछ़ॖन्य। ख़ास कर यॆलि शुर गरॖ न्यबर नीरिथ कुनि ट्रेनिंग-वेनिंगि मंज़ रोज़ान छु सु छु पनुन पान बाल्येग ज़ऻनिथ आज़ाद ख़यालन मंज़ ह्यवान ग्वतॖ ग्वथ करॖन्य। पनॖनि ज़िन्दगी हॖन्द्य फ़ऻसलॖ पानॖ ह्यवान करॖन्य। अथ बदलाव यिनस छु नॖ हरजॖ कांह योत ताम गरॖच आन बान तॖ शान म्वछि मंज़ रोज़ि। अगर यि सोंचुन दरकिनार कऺरिथ लडकॖ या लड़की कांह त्युथ फऻसल पानय करि यॆमि सॗत्य तऺम्यसॖन्दिस खानदानस कुनि कॖस्मुक ज़ख वाति, सु रोज़ि वॖम्बरि पछतावान। हालांकि जवऻनी हॖन्दिस हवहऻस मंज़ तर्यस नॖ यकदम फिकिरी मगर द्वह द्वह गछ़्यस खसान, तॖ तनाव गछ़्यस बडान। यिमव बलायव निशि दूर रोज़नॖ बापथ छु फ़र्ज़ बनान मऻलिस माजि दूर ताम यिमन कथन हुन्द व्यच़ार कऺरिथ पनॖनिस शुरिस लाकम थवॖन्य चऻरिथ तॖ फ़र्ज़ समजिथ पज़ि असि पनॖन्यन शुर्यन पनॖन्यन संस्कारन हॖन्ज़ ज़ऻन्यकऻरी ति दिन्य। तिहॖन्दिस परनस सॗत्य सॗत्य छु म्यॆ बासान यि विषय ति छु ज़ानुन ज़रूरी। यॆति मोल मऻज्य छ़ान्डान कोरि हॖन्दि बापथ तान, कूर आयि पनुन वर पानय छ़ऻन्डिथ सु ति पनॖनि ज़ऻच़ न्यबर तॖ कॊरुन पेश पनॖनिस मऻलिस माजि ब्रौंहकनि। हयबुड्गॖ ह्यु मोल मऻज्य गव हऻरान तॖ बे-ज़बान। कोरि लोग रऺडकॖ ज़ि तऺमिस गछ़ि यिहऻय लऺडकॖ। ॳमिस क्युथ गरॖबार,प्रुछ़ मऻल्य माजि पनॖनि कोरि, जवाब म्यूलुख ज़ि म्यॆ छु बस ॳम्यसॖय सॗत्य आमुत वार तॖ व्यसॖतार ॳम्यसॖन्दिस खान्दानस सॗत्य म्यॆ कारॖ बार।  मऻल्य माजि ह्यॊकनॖ करिथ नकार। कर्मॖ लीखाये नमस्कार।
**************************
"ऒमुय आद्य तय ऒमुय सॊरुम
ऒमुय ठहरुम पनुन पान
अन्यथ त्रऻविथ न्यथॖय बोसुम
तवय प्रोवुम परमस्थान"
       **********
अर्थात:- ओम् ही आद्य है इसलिए
ओम् का ही स्मरण किया।ओम् को अपना आप ही मान लिया। अनित्य को छोडकर नित्य अर्थात ईश्वर का ही आभास हो गया। इसी कारण ओम् की उपासना से  मैं ने परम स्थान पा लिया
      पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)