10.12.2019

10.12.2019, मॊन्जहोर (मार्ग) ज़ूनॖ पछॖ (शुक्ल पक्ष) त्रुवाह (देवादेव) (त्रयोदशी) बॊम्वार (मंगलवार), श्री सप्तर्षी सम्वत 5095, राश वृष(दुहचि 1.17 बजि प्यठॖ), ऋतु हेमन्त (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात तॖ सॗत्य छु अख लल वाख अर्थ सहित
**************************
1. मु: ग्वलाब तॗर
    अ: सोंतॖ कालॖच तॗर/मोमूली
         सर्दी
2. मु: ग्वसऻन्य गऺडवॖ
    अ: बेछवुन
3. मु: ग्वसऻन्य तॊमुल
  अ: वारियाह कॖसमॖ ख्यनॖ चीज़न
        हुन्द रलॖ
4. मु: ग्वलाब ऱवय
    अ: ग्वलऻब्य बुथ/माशोक़/
         ख्वश युवुन
5. मु: ग्वनॖ ख्वतॖ ग्वनॖ दूष
    अ: नीकी करान करान वुल्टॖ
          गछ़ुन
**************************
1. कांगॖर.....Fire-pot
2. कंगन्य....A small comb
                  used by ladies
3. लॊंगुन.....A measuring
            pot made of wood
4. नॊट......Earthen pitcher
5. टोक.....Earthen lid
6. तौलिया....Towel
7. टूप्य......Cap
8. साफ़ॖ.....Turban
9. पुलॖहोर....Sleeper made
                   of dry-grass
10. जऺजीर्य....Hukka
**************************
      गीता ज्ञान  :अध्याय 18
यि दारना शक्ती मूर्ख इन्सान न्यॆन्दॖर आलुछ़ द्वख तॖ भय प्रावान स्व दारना शक्ती तामस ज़ान
वॊन भगवानन गीता ज्ञान
**************************
ज़मानॖ बदल्योमुत छु यूत ज़ि इन्सान छु कुनि सातॖ हऺच़्य च़ापान कॆंह कॆंह चीज़ वुछिथ। दंदस तल ज़्यव छ़ॖनान कॆंह कॆंह वऻर्यदात बूज़िथ तॖ कुनि सातॖ आसमानॖ प्यवान कॆंह कॆंह चीज़ वडींशिथ।च़ूंठ छु च़ूंठिस वुछिथ रंग रटान दपान छि। सऻनिस समाजस मंज़ यि कॆंछ़ा बदलाव आमुत छु या यिवान रोज़ान छु अम्युक असर छु ब्यॆयिस समाजस प्यठ ति प्यवान या दॊयिमि समाज्युक असर छु सऻनिस समाजस प्यठ ति प्यवान। ॴखॖर इन्सानॖय छि होरॖ ति तॖ योरॖ ति। अगर द्रॊजर छु तॖ यि छु सारिनॖय हॖन्दि बापथ। गन्डॖ किलो दपान वोत ज़ॖ हथ रॊपियि ताम।यिनॖ ज़ांह सूंचमुतुय ओस। कॊर्यॆन सॗत्य बेहुर्मती कऺरिथ पतॖ तिमन ज़ालुन कऻच़ाह दहशतॖच कथ छि। ॳस्य ति छि कोरिवऻल्य, माजिवऻल्य ब्यॆनिवऻल। ख़ोच़ुन छु लगान यिथ्य वऻर्यदात बूज़्य बूज़्य। सान्यन शुर्यन हॖन्ज़ हिफ़ाज़त कुस करि किथॖ पऻठ्य गछ़ि समज छु नॖ यिवान इन्सानस। युस मरान सु ति इन्सान, युस मारान सु ति इन्सान। यॆमिस यिवान आर सु ति इन्सान युस लागान बे-आर सु ति इन्सान।सऻन्य अख कूर यॆम्य आरस प्यठ क़तरऻव सु ति ओस इन्सान तॖ यॆम्य कऻन्सि कऻन्सि हुन्द यज़थ तॖ आबरू बच्योव सु ति ओस इन्सान। म्यानि वनॖनुक मुद्दा छु ज़ि बदलवॖन्यन हालातन कुन वुछिथ पज़ि असि पनॖन्य रऻछ पानय करॖन्य, पनुन अन्तरात्मा साफ़ शफ़ाफ़ थवुन, देखा-दीखी निशि दूर रोज़ुन तॖ पनॖनिस धर्मस प्यठ पऺकिथ पनॖन्यन संस्कारन पानय रऻछ करॖन्य त्यॆली रोज़ि दय ति असि सहायतस तॖ दी असि ति स्यॆदि बुथि तार। नमस्कार।
**************************
"स्वयि कुल नो द्वदॖ सॗत्य सऺग्यज़ि
सर्पिनि ठूलन दीज़ि नो फाह
स्यॆकि शाठस फल नो वऺविज़ि
रावरिज़ि नॖ कॊम-याजन तील"
         *************
अर्थात:-बिछू घास को दूध से सींचना नहीं, सर्पिनि के अण्डों को कभी न सेंकना। बालू के पुलिन पर बीज न बोना, भूसी की नान खताई पर तेल बर्बाद न करना"
      पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)