15.12.2019

15.12.2019, पॊह (पौष) गटॖ पछॖ (कृष्ण पक्ष) च़ोरम (चतुर्थी)
आथवार (रविवार/एतवार),श्री सप्तर्षी सम्वत 5095, राश कर्कट (चलान), ऋतु हेमन्त (चलान)...
अज़ छि संकट च़ॊरम (संकट निवार्ण चतुर्थी) ति
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात तॖ सॗत्य छु अख लल वाख ति अर्थ सहित
**************************
1. मु: लन्जि पम्पोष
   अ: ल्वक्टि् माहोलॖ न्यबर नीरिथ
         स्यठाह थज़र प्रावुन
2. मु: लॊग न तॖ जॊग आव पॊत
         फीरिथ
    अ: कुनि चीज़स या कामि हुन्द
         पूरॖ करनुक वादॖ कऺरिथ ना-
         काम गछ़ुन
3. मु: लूटस तॖ जोशस बऻज्यवठ
    अ: नाकारॖ छु नाकारस सॗत्य
          रलान/बुरॖ काम्यन मंज़
          हिसॖदऻरी
4. मु: लूकॖ मॊत गव अनिगॊट
    अ: आवाज़ि ख़लक़ गव
          नक़ारि ख्वदा/जमगठस
          छु नॖ कांह जवाब
5. मु: लूकॖ हुन्द कऺतिथ न्यथॖनॊन
         पान
    अ: मॆहनतस नॖ फल
**************************
1. गुर....Horse
2. बऻर गुर.....A horse used
                    to carry load
3. खर......Donkey/Ass
4. बऻर खर....A donkey used
                    to carry load
5. बऻथ......Song
6. बऻट्य.....A big plate
7. बऻच़.....Members in a
                family
8. बऻज़्य.... Deceive
9. बऻदियानॖ..Aniseed/Sweet
                   fennel
10. बऻदी.....Indigestive
**************************
        गीता ज्ञान  :अध्याय 18
युस स्वख ग्वडॖ ज़हर बासान, मगर अमृत अम्युक अन्जाम आसान, यि परम स्वख प्रावान
सातविक ज़ान
वॊन भगवानन गीता  ज्ञान
**************************
समय गव पकान पनॖनि रफतारि मंज़ तॖ यि मऻज्य ॴस ज़िन्दॖ रोज़नुक संज़ करान पनॖन्यन द्वन मोसूय शुर्यॆन मंज़। किरायि मकानॖ निशि पनुन पान म्वकलावनॖ मूजूब कुन अमि माजि पनुन स्वन-गऺहनॖ तॖ सूंचुन सेरॖ वावॖ ख्वतॖ छु डेरॖ वाव स्यठाह ज़रूरी। करताम ओस मऻल्यकन ज्येमिस मंज़ॖय अख ज़मीन च़कुल मऺल्य ह्यॊतॖमुत तॖ सोंचान आसिहे ज़ि यॆलि यिम शुर्य अथ लायक़ गछ़न तॖ खारन लबॖ च़ोर पानय मगर ॳमिस ति कति ॴस पताह ज़ि मोत छु इन्सान  सॖन्दिस पऺदिस तल आसान, पतहॗ छु नॖ थवान कर छु निवान वुफ कऺडिथ। माजि ह्यॊत मकानॖ बनावनॖच आय त्राय रटॖन्य तॖ द्युतुन कॖन ॴखरस। नरि हॖन्ज़ि जायि ज़ंग तॖ ज़ंगि हॖन्ज़ि जायि नॖर लऻगिथ कॊर अमि माजि मकानॖ खड़ा तॖ रुत साथा वुछिथ कॊरुन गृह प्रवेश। वॊश्य त्रोवुन ज़ि अज़ गॊछ़ व्वॊमॖ जी ज़िन्दॖ आसुन तॖ वुछिहे पनुन गरॖ कथ छि वनान। द्वह द्वह खॊत शुर्यन ति। युस मोसूम शुर ओस सु ह्यॊतुन बाल्यॆग गछ़ुन तॖ युस बॊड शुर ओस सु ह्यॊतुन खान्दरस लायक़ बनुन। यिम द्वनवय शुर्य ॴस्य होरॖ योरॖ यिथ ॳमिस माजि अलनॖ तॖ वलनॖ यिवान। माजि हॖन्दिस फऺरिस तल बिहिथ पनॖन्यन स्वपॖनन साकार बनावनॖच तदबीर छ़ान्डान रोज़ान। पनॖन्यन ज़खमन ठानॖ दिथ नवि सुबहॖच आशाय हॖन्ज़ ज़ॖच़ॖ मेलनॖ बापथ बे-सबरी सान गऺर गऺर कडान। शुर्य ॴस्य माजि असुवुन बुथ ह्यथ वुछुन यछ़ान तॖ मऻज्य ॴस्य पनुन पगाह यिमन द्वन लालन मंज़ वुछान रोज़ान तॖ यिमन ॴस आज़र-बाज़र सोज़नॖ ब्रौंठ ग्वडॖ च़ॖनि ट्यॊक करान तॖ अदॖ आज्ञा दिवान नेरनॖच तॖ ॴशिर्वाद तॖ ॴही सुबॖ शाम करान रोज़ान। अमि ब्रौंहकुन वुछव पगाह। मऻज्य दीवी कऺर्यनवॖ रुत। तुहॖन्ज़ ॴही रूज़िन म्यॆति सॗत्य।
**************************
"च़ालुन छु वुज़मलॖह तॖ त्रटय
च़ालुन छु मन्द्यन्यन गटॖकार
च़ालुन छु पान पनुन कडुन ग्रटय
ह्यतॖ मालि संतोष वाति पानय"
         *********
अर्थात:- ललेश्वरी कहती हैं कि अध्यात्म को पाने के लिए कडक तथा बिजिलियां तथा दोपहर को
गहन अंधकार सहन करने पडते हैं। ऐसा समझो कि चक्की के दोनों पाटों के बीच में पिसे जाने की पीडा को सहना है। जब संतोष तथा सहनशीलता प्राप्त होगी तो संतोष रखो कि लक्ष्य स्वयं ही पास आ पहुंचेगा।
    पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)