01.12.2019

01.12.2019 मॊन्जहोर (मार्ग) ज़ूनॖ पछॖ (शुक्ल पक्ष) पऻन्च़म (पन्चमी) आथवार (रविवार/ एतवार)श्री सप्तर्षी सम्वत 5095, राश मकर (चलान)ऋतु हेमन्त (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात तॖ सॗत्य छुस अख लल वाख अर्थ सॖत्य ह्यथ
**************************
1. मु: ग्रकॖवुन्यन बानन शीन
    अ: कऻम मुकमल गऺछ़िथ पतॖ
          मुसीबथ युन/ॴखरी मर-
          हलस प्यठ वकानॖ गछ़ुन
2. मु: गरॖ प्यठुक ज़ामतुर गव बरॖ
         प्यठुक हून
    अ: खानि दामादस छॆ नॖ क़दॖर
          करनॖ यिवान
3. मु: गरि नॖ बर तॖ पॆंजि काठगर
    अ: यस शख़सस नॖ पानस
          सॊम्ब ति गुज़ारॖ आसि तस
         कथ प्यठ छु फ़यऻज़ी करनि
          न्यॆरुन/बे-शोज़ बोज़
4. मु: गरॖ वन्दय गरॖ सासा बरॖ
         न्यॆरय नॖ ज़ांह
    अ: गर्युक ह्यु राहत छु नॖ गरि
         न्यबर मुम्किनॖय
5. मु: गरि नॖ वय तॖ न्यॆबरॖ हावान
         टय/ गरि नॖ वय तॖ कावन
         साल
   अ: गुज़ारॖ रॊस ॴसिथ ति फटॖ-
        नस युन
**************************
1. ग्वडनिच ऒंगॖज....Index
                               finger
2. मंज़िम ऒंगॖज.... Middle
                             finger
3. त्र्यॆयिम ऒंगॖज...Ring
                            finger
4. किस...... Little finger
5. न्यॊठ.........Thumb
6. रोंख...........Butex
7. लंग...........Thighs
8. कॊठ..........Knee
9. ज़ंग...........Leg
10. ग्वड......... Ankle
**************************
         गीता ज्ञान  :अध्याय 18
कार्यि स्यद गछ़नस प्यठ न तोशान, न अस्यद गछ़नस पछ़तावान, विकारॖ रॊस सु सातविक वनॖनॖ यिवान
वॊन भगवानन गीता ज्ञान
**************************
वारियाह कालॖ प्यठॖ वुछ नॖ म्यॆ तिम द्वार यिमन ब्रान्दॖ दरवाज़न खान्दरॖक्यन मॊकन प्यठ क्रूल ओस यिवान खारनॖ। नर्म नर्म रीशिम अथव ॴस्य सऻन्य शूर्य लऺडकॖ या कोरि लोलॖ सान ब्यॊन ब्यॊन रंग मिलनऻविथ दरवाज़क्यन द्वनवऺन्य पासन पोशि वऺथॖर बनऻव्य बनऻव्य अख ॳकिस सॗत्य मान मान करान रोज़ान। असवुन्यव बुथ्यव ॴस्य अथ ब्रांदॖ द्वारस प्यठॖ कनि कमि लोलॖ सान ल्यॆखान "स्वागतम्" तॖ "रत्नी व्यडस रतनलालस" या फलऻन्य व्यडस फलऻन्य। यि रऺगॖदार द्वार ओस शोलॖ मारान खान्दरन मंज़ तॖ खांदरॖ पतॖ ति वऺरियस खन्डस। तिम द्वार छि नॖ नज़रि यिवान तॖ न रूद्य तिम ब्रांद। दय दय करान आसि नॖ नवि पुयि यि ति पताह ज़ि क़्रूल गव क्याह। कुस खारान, कर खारान कति खारान क्याज़ि खारान यि आसि नॖ सान्यन नव ज़ात शुर्यॆन ख़बरॖय। यनॖ ॳस्य ह्यॆतिन फेरॖन्य ब्यॊन ब्यॊन जंजगरन खांदरॖक्य रसम पूरॖ करनॖ बापथ, तनॖ गयि ॳस्य पनॖन्यव असली रसमव निशि दूर स्यठाह दूर। द्वार पूज़ा ति छिनॖ व्वंय अज़कल करान म्यॆ बासान तिक्याज़ि तिम द्वार छियी नॖ तॖ न तिम ब्रांद। व्वंय कति छु माम माहर्यॆनि व्वट्य दारिकिन्य कडिथ वीगिस ताम वातॖनावान। स्यॆदि दरवाज़ॖ क्याज़ि छि नॖ माहर्यॆनि कडान तॖ वीगिस प्यठ खड़ा थवान, यि वनॖनस छु नॖ कांह नज़र यिवान तॖ न छु बोज़न वऻलिस फुर्सथॖय। ल्वकॖट्य म्वकॖट्य मगर महत्वपूर्ण रसॖम ह्यॆत्य असि नज़र-अंदाज़ करॖन्य तॖ परम्परायव निशि ब्यॊन गछ़ॖन्य।खान्दर छि सपदान वुनि ति। सपदान रोज़न ब्रौंहकुन ति मगर सु वलॖवलॖ, सु उत्कर्ष स्व विधि छॆ नॖ व्वंय नज़र यिवान मगर नज़र छु यिवान बदलय आलमाह। मऻज्य दीवी दीन सारिनी कारस तार।सोन ॴसिन सारिनी नमस्कार।
**************************
"ॴरस न्येरि नॖ मॊदुर शीरय
न्यर्वीरस न्येरि नॖ शूरा नाव
मूर्खस परुन छुय हऺस्तिस कशुन
यस मालि दांदस ब्यहा च़ाव"
          ***********
आलूबुखारा में से मीठा रस नहीं निकलता। निर्वीर्य शूर नहीं बन सकता। मूर्ख को समझाना हाथी को खुजलाना है, अर्थात बेकार है। जिस बैल को सुस्ती और आलस्य ने धरदबोचा हो, वह काम से गया"
     पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
   भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)