16.11.2019

16.11.2019, मॊन्जहोर (मार्ग) गटॖ पछॖ (कृष्ण पक्ष) च़ोरम (चतुर्थी), बटॖवार (शनिवार/ शनिश्चरवार), श्री सप्तर्षी सम्वत 5095, राश मिथुन (चलान), ऋतु हेमन्त
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: ख्यव-च्यव रंगॖ च़रि,कऻन्टुर
         लॊग वालॖ बरि
    अ: राह कस तान्य तॖ रटान
         कस तान्य
2. मु: ख्यॆल कठ
    अ: अक्लि रॊस व्यॊठ-पूठ
          इन्सान
3. मु: ख्यथ ति ख्यनची कल
    अ: सिरिफ़ ख्यनॖची परेशऻनी
4. मु: ख्यमॖहऻ तॖ छुम नॖ मऻल
         ख्यमॖ नय तॖ मश्यम हऻल
    अ: ख्यनस कांह न तॖ कांह
         बहानॖ छ़ान्डान
5. मु: ख्यनॖ बुलबुल पकनॖ पऻज़
         तॖ गन्डनॖ ग्वसऻन्य
    अ: सु शख्स युस कम ख्यवान
         आसि, पल्वन-दल्वन लोर
         आसि नॖ तॖ कऻम करनस
          मंज़ तेज़ आसि
**************************
1. हाक्.....Collard greens
2. सॊच़ल....Mallow
3. क्रछ़.......Knapweeds
4. ऒबुज....Sorrel
5. हन्द......... Dandelion
6. लीसॖ....... Amaranth
7. नुनर.......Purslane
8. मॊन्जि.....Knol Khol
9. नदुर.......Lotus root
10. ओलुव.... Potato
**************************
        गीता ज्ञान  :अध्याय 18
बॖ करान छुस यि अहम् युस नॖ आसान, सु सम्सऻर्य विश्यन तॖ कर्मन फसान, सु सारिनॖय मऻरिथ ति नॖ कांह मारान
वॊन भगवानन गीता ज्ञान
**************************
ऊत्रॖ ओस कश्यप भवनॖ, नोयडा स्यक्टर 34-हस मंज़ शारदा हवन आमुत करनॖ। ख्वशकॖस्मती सान म्यूल म्यॆति मॊकॖ अथ जायि वातनस तमि द्वह। वेद मंत्र, पन्चस्तवी तॖ तमिक्यन श्वलूकन हुन्द कऻशुर तरजमॖ, गोपी नाथ जियिन नामावली वगैरा वगैरा आव परनॖ अथ हवनस प्यठ। पानस अन्द्य-पऺख्य दिच़िम नज़र तॖ ॳकिस बच्चस त्रऻविथ यीत्य ति भक्त आमॖत्य ॴस्य बास्यॆयम ज़ि पन्च़ाहि वुहिर्य ह्यॊर-ह्यॊरॖय ॴस सऻरी, ब्वन नॖ कांह। हालांकि सऻन्य कूशिश गऺछ़ आसॖन्य नऺव पुय यिथ्यन जायन ताम वातनावनॖच मगर कॆंह ख़ास वजह छु येमि मूजूब सऻन्य शुर्य छि नॖ ह्यकान वऻतिथ तॖ तन मनॖ सान शमूहलियथ कऺरिथ। मऻज्य दीवी कऺरिन रुत तिमन महाप्वरुषन यिमव कॆंच़न संस्कृत मंत्रन कऻशुर तरजमॖ छु थोवमुत कऺरिथ तॖ ॳस्य छि ह्यकान हॖकॖ पऺरिथ। शास्त्रक्यन यिमन चीज़न हॖन्ज़ तरबियथ दिनॖच छि सख़ ज़रूरथ। सान्यन शुर्यन ताकि तिहिन्ज़ दिलचस्पी बडिह्यॆ यिछ़न जायन प्यठ वातनॖच। ॳस्य छिनॖ ह्यकान पज़ि मनॖ यि कऻम कऺरिथ। नतीजॖ छु यि वुछनस तल यिवान ज़ि सऻन्य शुर्य छि पननि शास्त्रॖ निशि दूर दूर गछ़ान। हवनस प्यठ नवीद करनि छि अमापॊज़ कॆंह जवान इका दुका नज़रि गछ़ान मगर यॆतिनस तऺम्यसॖन्ज़ अशद ज़रूरथ छि तॊतन छुनॖ वातान। हऻरान गोस बॖ यि वुछिथ ति ज़ि कॆंह भक्त-जन छि गरि प्यठय अनान ज़ॖ-त्रॆ ल्वकॖट्य डबहऻन तॖ सॊम्बरावान सब्ज़ी वगैरा यिमन डबन मंज़ पनुन गरॖ बापथ। कर प्यमव ॳस्य पायस, दय ज़ानि।
**************************
"कोसम बाग़स ह्यॊतमय अच़ुन
पच़ियय मन तॖ अच़ुन प्राव
स्वरूप दर्शन छु तॊतुय अच़ुन
कॊत छु गछ़ुन पकुन त्राव"
         ***********
अर्थात :- मैं कुसुम वाटिका में प्रवेश करने लगी। तुम चाहो तो प्रवेश करो। वहां ही घुसने से स्वरूप का दर्शन होगा। इधर उधर जाना छोड दे। जहां आनन्द की प्राप्ति अर्थात स्वरूप दर्शन हो वहां प्रवेश करो। इसके लिए कहीं नहीं जाना है। यह सब अपने अंदर ही है
     पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)