23.11.2019

23.11.2019, मॊन्जहोर (मार्ग) गटॖ पछॖ (कृष्ण पक्ष) काह (देवादेव) (एकादऺशी) बटॖवार (शनिवार/शनिश्चरवार) श्री सप्तर्षी सम्वत 5095,राश तुला (रऻच़ हॖन्ज़ि 1.45 बजि प्यठॖ), ऋतु हेमन्त चलान...चूंकि बाह छि रावान, पगहुक वॊहरवोद यी ॳज़्य यानि कऻश द्वह
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: ख्वरस प्यठ ख्वर
    अ: वऻर्यदाथ/वकानॖ
2. मु: खॊखॖ ब्रोर
   अ:च़र्यन हार्यन च़ऺलरावनॖ बापत
        ज़च्यन हुन्द इन्सान
3. मु: खॊट मॊहर
    अ: सु शख्स युस नॖ कुनि
          कारस लगि
4. मु: खोसॖ ख्यन
    अ: सालॖ विज़ि प्रथ कुनि थफ
       दिन्य तॖ प्यूंताह प्यूंताह ख्यॊन
5. मु: ख्यावुन छु नॖ रावान
    अ: कऻन्सि खऻर करुन छु नॖ
          ज़ायि गछ़ान
**************************
1. मऻज्य....Mother
2. मोल/बाबॖ.....Father
3. बोय........ Brother
4. बाबी........ Brother's wife
5. ब्यॆनि........Sister
6. ब्यॆमॖ.....Sister's husband
7. बापथ......For
8. बापारॖ... Business/Trade
                 Commerce
9. बापऻर्य.... Businessman/
               Merchant/Trader
10. बाठ....Branches of a
                 tree
**************************
        गीता ज्ञान  :अध्याय 18
ग्वन गंज़रन वऻल्य शास्त्र छि वनान ज्ञान क्रॆया कर्म त्र्यॆयि प्रकऻर्य आसान, यिम सऻरी म्यॆ निश बोज़ थाव ध्यान
वॊन भगवानन गीता ज्ञान
**************************
मोबाइल गव असि रगि रगि मंज़ सऺनिथ। ब्रिंज़िस छु नॖ अमि रॊस वार। तिम तिम चीज़ छि यिवान मोबाईलॖ दऺस्य करनॖ यिम न असि ज़ांह स्वपॖनस मंज़ ति सूंचमॖत्य ॴस्य। लऻर्य गऺयि ॳस्य अथ मोबाइलस तिथॖ पऻठ्य ज़ि असि मॊठ काग़ज़स प्यठ क़लमॖ सॗत्य ल्यॆखुन। व्हाटसापन कऺर्य ॳस्य गीर्य स्यठाह। मच़र ह्यु छु यिवान तऺमिस यॆमिस हऻल आसि गऻमॖच़ मॊबाइलस प्यठ कथबाथ करनॖच तॖ यकदम यियस बंद करनॖ सु  ज़ऺर्यॆय यॆमि दऺस्य सु जुडिथ ओस पनॖन्यन अंगन ॴश्यनावन सॗत्य, यारन दोसतन सॗत्य। सु गव न्यट तॖ व्हाटसाप।  यि एहसास सपुद म्यॆ ज्यॆमिस मंज़ यॆति सरकारन छु न्यटॖय बऺद कॊरमुत पॗंच़िमि अगस्तॖ 2019 प्यठॖ तॖ ज्योम छु बाकय जायन निशॖ छ़्यनॖ गोमुत यि करनॖ सॗत्य।अमि वजह सॗत्य छु अज़कल पानॖवुन्य शॆछ ख़बर सोज़ॖन्य बंद गऻमॖच़। सरकारस पनॖन्य मजबूरी मगर ततिक्यन बसकीनन अख लाचऻरी। बॖति गोस छ़्यनॖ त्वहि निशि कॆंच़न दॊहन बस अमी मूजूब यि दऺप्य ज़ि ति मोबाइलस ज़न ओस ज़ुव द्रामुत। बस फोनुय योत ओस चलान तथ ति आसॖ गॖठ-गोजि गछ़ान कथ करान करान। रुक्य रुक्य ओस पकान। वासॖ काकॖन्य गासॖ नाव दक्कॖ दी दी पकॖनाव। यान्य बॖ ज्यॆमि न्यबर द्रास तॖ म्यॆ बास्यव ज़न बॖ कथ ताम नऺविस आलमस मंज़ बॖ च़ास तॖ बास्यॊम ज़न बॖ ब्यॆयि होशस तॖ हवहऻस मंज़ बॖ आस। यूत वऺनिथ तॖ बऻसिथ ति छि मगर पनॖन्य कऺशीर ख़ासो ख़ास। कथ छि जऻरी।
***********************
"सबूर छुय ज़्युर मरॖच़ तॖ नूनॖय
ख्यनॖ छुय ट्यॊठ तॖ ख्यॆयस कुस
सबूर छुय स्वनॖ सुन्द दूरॖय
म्वलॖ छुय थॊदॖय तॖ ह्यॆयस कुस"
           ***********
अर्थात :- धैर्य एक ऐसा कडवा पदार्थ है कि इसे ग्रहण करना कठिन है। यह सोने की तरह अत्यंत मूल्यवान है। इसको ख़रीदना भी कठिन है। अर्थात धैर्य तथा सहनशीलता कोई विरला ही पा सकता है।
   पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप”

(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)