24.11.2019

24.11.2019, मॊन्जहोर (मार्ग) गटॖ पछॖ (कृष्ण पक्ष) त्रुवाह (त्रॆयॊदशी) आथवार,श्री सप्तर्षी सम्वत 5095, राश तुला (चलान)ऋतु हेमन्त (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: ख्यनॖ मंज़ॖ व्वकुस
    अ: ॴसिथ बऺसिथ ति नॖ कॆंह
         अथि युन
2. मु: ख्यनॖ वोलॖय ख्यॆयि तॖ ख्या-
         वि,न ख्यनवोल क्याह करि
    अ: यस पानस ख्यनस हऻल
         आसि, सु छु ब्यॆयिस ति
         ख्यावान
3. मु: ख्यनॖ मऺट नऻल्य ज़ऺट गऺयि
         बऺड दौलथ
    अ: ज़िन्दगऻनी हॖन्ज़ बुनियऻदी
         ज़रूरथ पूरॖ गछ़ॖन्य
4. मु: गाटॖ छा नाटॖ बाज़रॖ ह्यॆयज़ि
         मऺल्य
    अ: अकॖलमन्दी छि दय सुन्द
          द्युत
5. मु: गाम छु ख़ाम
    अ: गऻमी ज़िन्दगी छि क्रॗठ
          आसान
**************************
1. बोज.....Partner
2. बाज.....Tax/Tribute
3. बाजॖ.....Musical instru-
             ment/Harmonium
4. बाजॖवोल....Harmonium
                     player
5. बा-जमाथ...... Together/
              In congregation/
             Collectively
6. बादाम....... Almond
7. डून............ Walnut
8. खऺज़ॗर...........Date
9. बादा...... Obstruction/
                   Trouble
10. बाबथॖर....Brother's son
**************************
     गीता ज्ञान  :अध्याय 18
यॆमि ज्ञानॖ मनुश ब्यॊन ब्यॊन ज़ीवन, कॖसमॖ कॖसमॖ बावॖ अलग अलग डेंशन तथ ज्ञानस छि राजस ज्ञान वनान
वॊन भगवानन गीता ज्ञान
**************************
व्वसॖ द्रव्सॖ छि अज़कल वऺछ़मॖच़ असि कऻशिर्य बटन खान्दरव सॗत्य। प्वन्य छि नॖ अथि यिवान लूकन। अख योर अख होर। मुम्बॖयि प्यठॖ आयि ज्यॊम खान्दर करनि ति क्याज़ि ज़्यादॖ अंग ॴश्यनाव छि बऺसिथ ज्यॆमिस मंज़ॖय। दिल्लिवऻल्य ति वऻत्य ज्यॊम खान्दर करनि ति क्याज़ि अंगन ॴश्यनावन हुन्द आसुन बसुन छु ज़्यादॖतर ज्यॆमिस मंज़ॖय।
शुमार रोस जंजगर आयि बनावनॖ ज्यॆमिस मंज़ यिमन त्रॖहन वऺरियन मंज़ यथ मंज़ बटॖ आव खान्दर करान वुन्युखताम।यिम जंजगरॖ बनऻव्य ज्यॆमिक्यव डूगरव। त्रॖहन वऺरियन मंज़ गऺयि असि आश्रम खड़ा वति वति मगर जंजगर बन्याव नॖ कांह ति वुन्युखताम। सान्यव पौंसव सॗत्य बनऻव्य लूकव बेशुमार जंजगर मगर ॳस्य छिनॖ ह्यकान यि कऻम पनॖनि ज़ऻच़ बापथ कऺरिथ। ॳस्य छि लऺग्यमॖत्य सिरिफ़ हवनन पतॖ। यॆमि सॗत्य सऻनिस समाजस राहत मेलिहे तोर कुन छु नॖ कांह सोंचनॖच कूशिश करान। न ज्यॆमि या न ज्यॆमि न्यबर। हालांकि ल्वकॖट्य म्वकॖट्य व्वतसव छि मनावान नोयडा स्यक्टर 34-हस मंज़, कश्यप ऋशि बवनस मंज़ मगर खान्दरॖ बापथ छि जायिहॖन्ज़ व्यछ़य वुनि ति। सानि नादऻनी तॖ मजबूरी हुन्द फऻयदॖ छि पर-ज़ऻच़ हॖन्द्यॖय नफ़र तुलान मगर ॳस्य छि अमि सोंचॖ निशि दूर ।असि छु अथ मंज़ ति बासान क्याह ताम बजरॖय ह्यु। कथ छि जऻरी
**************************
"केंच़न रऺण्य छय शिहिज बूनी
न्येरव न्यबर शुहुल करव
केंच़न रऺण्य छय बरॖ प्यठॖ हूनी
न्येरव न्यबर तॖ ज़ंग ख्यॆयिय"
          ************
अर्थात :- किसी की पत्नी ठंडे मिज़ाज की होकर चिनार के पेड की भांति ठंडा साया प्रदान करके सुख देती है। कोई स्त्री घर के बरामदे पर बैठी कुत्तिया की तरह अर्थात कर्कश होती है जो बात बात पर झगडा करती है अपितु ठंडी स्वभाव की गृहणी घर को प्यार से स्वर्ग बनाती है और झगडालू पत्नी घर को नरक बनाती है।
 पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
   भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)