13.11.2019

13.11.2013, मॊंन्जहोर (मार्ग) गटॖ पछॖ (कृष्ण पक्ष) ऒक्दॊह (प्रथम) ब्वदवार (बुधवार), श्री सप्तर्षी सम्वत 5095, राश वृष (चलान) ऋतु हरुद (शरद) (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: खूंतिस प्यठ खूंत
    अ: मुसीबथ यॆलि यिवान छु
         तॆलि च़्वपासे
2. मु: खऺन्ज़मॖच़ क्वकॖर
    अ: यस नऻल्य पलव ति आसि
          नॖ/छॊन इन्सान
3. मु: खऺन्ड्यफुट हिसाब
    अ: सु कारॖ बार यथ पूरॖ हिसाब
         थावनॖ आसि नॖ आमुत/
         अडॖल्यॊक हिसाब
4. मु: खमिहे गुर तॖ खमान छि
          गुनॖ
    अ: यस नॖ पज़ि सुय म्यन्ग
          हावान
5. मु: खल ति ख्वदा
    अ: यॆलि नॖ कॆंह नॊन ति आसि
**************************
1. ऒड ऒड करुन...To break
                       into pieces
2. ऒदुर..........Wet/Moist/
                       Damp
3. ऒत...........There
4. ऒप......Boastful/Thra-
                 sonical/Hector
5. ऒबुर.....Clouds/Mice
6. ऒबुज....A green vege-
                 table/Greens
7. ऒबरॖ तलुक आफ़ताब...
              The sun under
              clouds
8. अन्युट.....An earthen lid
              for lidding the pot
9. अनहार......Figure/Shape
                      Form/Image
10. अनहूर..... Bachelor
**************************
        गीता ज्ञान  :अध्याय 18
कर्मन हॖन्ज़ स्यॆदी मंज़ अदिशठान
ब्यॆयि कर्ता ति ब्यॊन ब्यॊन करन
आसान, नाना प्रकऻर्य यछ़ायि अख दीव ज़ान
वॊन भगवानन गीता ज्ञान
**************************
म्यॆ ओस वातुन मुम्बई ॳकिस रिंग सऺरमऺनी दॊहस प्यठ पनॖनिसॖय ॳकिस ख़ास ॴश्यनावस निश। बम्बियि मंज़ ज़ामुत पलेमुत लऺडकॖ तॖ कूर ज़ामॖच़ पलेमॖच़ भूपालस मंज़। द्वनवय गरॖ छि कऻशिर्य ज़ऻच़ हॖन्द्य मगर बूल्य छख थऻवमॖच़ पऻरिम। ज़िठ्य ज़िठ्य कऻशिर्य ज़बऻन्य मंज़ वुछिम कथबाथ करान दफ अमापॊज़ बाकय सऻरीय वुछिम व्वपर ज़बऻन्य मंज़ॖय पानॖवुन्य कथबाथ करान। बॖ ओसुस न्यॆचिव वऻल्यसॖन्दि तरफ़ॖ। वारॖ वारॖ ह्यॆतिन पऺछ़्य यिन्य तॖ समा गमा ति गव बडान। रिंग सऺरमऺनी ॴस दॊयिमि दॊह सुबहस। कालॖ शामस ताम आयि पऺछ़ यॆमिस यॆति प्यठ ओस युन। शामन छि बिहित तॖ कऺम्य ताम दिच़ राय ज़ि सऺमिथ छि सऻरीय वुन्यक्यनस  तॖ क्याज़ि ग्यवव नॖ लीला वीला कॆंह। हां में हां कॊर अड्यव तॖ ॳड्य वुछिम अख ॳक्यसॖन्दिस बुथिस कुन वुछान। सन्योस हना तॖ नन्योम ज़ि पऺछ़्य ॴस्य ख़ासो ख़ास, तिमन मंज़ ॴस प्वफ तॖ मास मगर तिहिन्द्य मर्द ॴस्य पर ज़ऻच़ हॖन्द्य, अख मंगलोरुक, अख करनाटकुक, अख लखनवुक वगैरा वगैरा। कॆंह पऺछ़्य ॴस्य महाराष्ट्रिक्य। ग्यवव हय तॖ ग्यवव क्याह तॖ फिकिरी कऻशुर तरि नॖ तिमन कॆंह तॖ यी सोंचान समजान गऺयि तॖ दॊपुख वऺलिव व्वंय ग्यवव जंत्री मंज़ लीखित गणेश जियिन लीला अख तॖ पतॖ वुछव ब्यॆयि कॆंह। म्वखसरॖ पऺर गणीश अस्तुति तॖ कॆंच़न पछ़्यन खऺच़ न्यॆन्दॖर अमि लीलायि सॗत्य। अमि लीलायि पतॖय लॊग थख तॖ लऺज्य ओरॖच योरॖच कथबाथा। सान्यन कऻशिर्य कोर्यन हॖन्द्य बच्चॖ यिम पऻरिम गरन मंज़ ज़ामॖत्य छि तिमन छु नॖ कऻशिर्य ज़बऻन्य सॗत्य मतलब कांह।यिथ पऻठ्य गऺज्य सऻन्य ज़्यव, प्रज़नथ तॖ कल्चर।सनव यॊदवय तॖ अख वंश गव कम असि पनॖनि ज़ऻच़ मंज़ अख कूर पर-ज़ऻच़ मंज़ खान्दर करनॖ सॗत्य।समाज गव छ़ॊकान तॖ श्रॊकान रसॖ रसॖ। दोष कस खारव।  सिरिफ दिमव  बारव तॖ बदलवुनिस माहोलस हलम दारव। कथ छि जऻरी
**************************
"शिव छुय थलि थलि रोज़ान
मव ज़ान ह्यॊंद तॖ मुसलमान
त्रुकय छुख तॖ पान प्रज़ॖनाव
स्वय छय साहिबस सॗत्यी ज़ान"
            *********
अर्थात, शिव हर स्थान पर रहता है, हिन्दू और मुसलमान का भेद
मत करो, यदि समझदार हो तो अपने को पहचानो तो वही साहिब के साथ पहचान है।
    पऺरिव यि लल वाख ति
**************************
 कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
   भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)