05.11.2019

05.11.2019, कार्तिक (कतक) ज़ूनॖ पछॖ (शुक्ल पक्ष) नवम (नवमी) बॊम्वार (मंगलवार) श्री सप्तर्षी सम्वत 5095, राश कुम्भ (दुहचि 4.46 बजि प्यठॖ) ऋतु हरुद (शरद) (चलान) ...ॳज़्यकि प्यठॖ छु द्रठॖपऻन्च़ुक (पंचक) ति
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पान्छ़ मुहावऻरॖ तॖ दऺह कऻशिर्य लफ़ॖज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: कॊवोक कत्यू ? मेहरनि
         म्वन्डि पतॖ कनि
    अ: यस ज़्यव ख़राब आसि सु
          छु स्यठाह एहतियातॖ पतॖ
          ति वुचापॖ कथॖ करान
2. मु: कऺहरिस सॗत्य गरॖ किथ
         कऺन्य कॊरुथ, यी तऺम्य
         दॊपुम ती कॊरुम
    अ: वुल्टॖ शख्सस सॗत्य कऻम
         करनुक तऺरीकॖ छु यी ज़ि
         तसुन्दुय बोज़ुन हमेशि
3. मु: कनिकॖ छि दान कऻनी प्यठ
      त्रॆ मन रनान तॖ शॆ मन ख्यवान
    अ: य्वस ज़नानॖ बऺल्य थ्यकान
         आसि, तस वनान
4. मु: कोचि गरदऻनी गऺयि हालॖ
         हऻरऻनी
   अ: आवारॖगर्दी छि तबाह करान
5. मु: क्वलि छ़ुनुन छु आसान तॖ
         खारुन छु मुश्किल
   अ: बिगाडुन छु सहल अमापॊज़
      सु शेरुन या पारुन छु मुश्किल
**************************
1. एतिकाद......Belief/Faith/
                       Credence
2. एतराफ....... Admission/
                       Confession/
                       Recognition
3. एतिराज़......Objection/
               Fault finding/
               Criticism
4. इज़हार.......Expression/
               Display/Express-
               ing/Disclosures/
               Examination/Pro-
               clamation
5. इतिलास.....सिल्क ड्रैस
6. इतिराफ.....Directions/Ex-
             tremities/Side/En-
             virons/Boundaries
7. अशरफ़.....Rich men/
                    Noblest
8. अशुद्धी....Dirtiness/Im-
          purity/Uncleanness
9. अशुभ....Unfortunate/In-
             suspicious/Evil
10. ॳसूल....Principle/
              Fundamentals/
              Causes/Manners
              Dogmas
**************************
        गीता ज्ञान  :अध्याय 18
यिम शास्त्र व्यज़ सऻरी कर्म करान,
ब्यॆयि यिमन कर्मन हुन्द फल ति त्यागान, तिम त्यऻगी बेशक़ छि ब्वज़वान
वॊन भगवानन गीता ज्ञान
**************************
वुछनस तल छु यिवान ज़ि असि कऻशिर्य बटन छु खान्दरन व्वछ़बन प्यठ कऺरिथ क्रऻविथ वारयाह न्वखसान गछ़ान पौंसॖ रंग्य। हालांकि बास छिनॖ दिवान। कॊरिवोल या लऺडकॖ वोल छु अंगन ॴश्यनावन, यारन दोस्तन हुन्द अख फ़िरॖस्तॖ बनऻविथ तमी मूजू्ब सालॖ कार्ड छापनावान तॖ बऻगरावान। कार्ड बऻगरावॖन्य ति छि अख बऺड कऻम। कऺशीरि मंज़ अज़ त्रॖह वऺरी ब्रौंठ ति ॴस्य कार्ड बऻगरावान मगर ततिकिस बऻगरावनस तॖ यॆति बऻगरावनस छि ज़मीन आसमानॖच फरॖख। वऺलिथ मऺलिथ तॖ फॊलिथ ॴस्य तति। कार्ड बऻगरावॖन्य ॴस्य सहल मगर यॆति छि बासान यि कऻम सख़। जायन हुन्द दूर्यर तॖ वखतॖच कऺमी छि ख़ास वजह। यीच़ मॆहनत कऺरिथ कार्ड वातॖनऻविथ पतॖ यॆलि सालर कम यिवान छि तॖ मनस छु फ़ेरान  ज़ि सऻरी कयाज़ि आयि नॖ। सालर ति छु पनॖनि जायि परेशान यि सूंचिथ ज़ि गछ़हऻय तॖ गछ़ॖ क्वत।तिक्याज़ि तऺमिस निश छि आसान आमॖत्य पांच़ सथ कार्ड ब्यॊन ब्यॊन अंगन ॴश्यनावन हॖन्द्य। बड्यन दॊहन हॖन्द्य तऻरिख छि पानवॖन्य टकरावान। यि सालर छु नॖ ह्यकान सारिनॖय जायन वऻतिथ।ॳमिस सालरस छि बाकय साल गछ़ान अथॖ तॖ दोयिमि तरफ़ॖ छु मेज़बान ति परेशान ज़ि तऺमिस निश वऻत्य नॖ सऻरीय पऺछ़्य।दऺपिव ज़ि न छु खर ख्वश न खरॖ वोल।अमि मूजूब छु दॊनवऺन्य तरफ़नॖ न्वकसानॖय न्वकसान। कथ छि जऻरी
**************************
"मऻरिथ पांछ़ बूथ तिम फल हऺन्ड्य
च़ीतन दानॖ वखुर ख्यथ
तदय ज़ानख परमॖ पद च़ऺन्ड्य
हिशी खॊश खोवुर कोह ति ना ख्यथ"
            *******
अर्थात उन पांच भूतों को मारो जो मोटे भेडूं की तरह हैं। जो मनुश्य की चेतन शक्ति रूपी दाने की नहारी खाकर मोटे ताज़े  हो गये हैं। इन्हें मारकर ही तुम परम पद को पा सकते हो। फिर यह दायें जाये या बांये तो कोई अंतर नहीं पडता।
   पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
  भूषण कौल "दीप"
 (बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)