29.11.2019

29.11.2019, मॊन्जहोर (मार्ग) ज़ूनॖ पछॖ (शुक्ल पक्ष) त्रय (तृतीय) शॊकुरवार (शुक्रवार/ जुम्मा) श्री सप्तर्षी सम्वत 5095, राश धनु (चलान), ऋतु हेमन्त (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: गुर खऺसिथ च़ादर मऺन्डिथ तॖ
         गाव प्रऺसिथ
    अ: चीज़न छु परखऻविथ म्वल
         खसान
2. मु: गरॖ द्युन तॖ ज़ामॖन्य नॖ अच़ुन
    अ: कऻन्सि ज़मानथ दिन्य छि
          मुश्किल
3. मु: गरा द्युतमय हऻविथ लरा
         ब्यूठुख त्रऻविथ
    अ: यॆलि कऻन्सि सॗत्य ज़ान
         पहचान गछ़ि तॖ पतॖ तुल्यस
          नॖ थफॗय
4. मु: गरि ति हाख परि ति हाख
         नाहकय ज़ुवॖ गरी द्राख
    अ: यॆलि नॖ ब्यॆयि सॖन्दिस गरस
          मंज़ खऻतिर वाति
5. मु:  गुर गरि तॖ नजासस म्वल
    अ: चीज़ नॖ कुनी तॖ हंगॖ मंगॖ
          चुकाव मुकाव करुन
**************************
1. वुठ......Lips
2. दंद......Tooth/Teeth
3. ज़्यव....Tongue
4. ह्वॊंग्यन....Chin
5. गलॖ.......Cheek/Cheeks
6. ॴस......Mouth
7. बुथ.......Face
8. हॊट......Throat
9. गर्दन.....Neck
10. फ्यॊक.... Shoulder
**************************
         गीता  :ज्ञान अध्याय 18
यस कर्म अंजाम हिंसा तॖ न्वकसान, ब्यॆयि सामर्थ नॖ व्यच़ऻरिथ करनॖ यिवान सु मऺहज़ अज्ञान तॖ तामस ज़ान
वॊन भगवानन गीता ज्ञान
**************************
राथ ओसुस बॖ ॳकिस मित्रॖसॖन्ज़ि कोरि हॖन्ज़ि बरऻच़चि स्वागतॖ बापथ नोयडा गोमुत। वारॖ कारॖ आयि बरात जान पऻठ्य यानि प्रऻन्य पऻठ्य। प्रऻन्य पऻठ्य म्यानि वनॖनुक मतलब छु शोर-शोराबॖ रॊसतुय। बैंड-बाजि बगऻरॖय। मन गव स्यठाह ख्वश ति क्याज़ि कन रूद्य श्वद्ध नतॖ छु कनन ज़र प्यवान यॆलि माहराज़ॖ यिवान छु तॖ पतॖ पतॖ छु बैंड-बाजि वज़ान तॖ शुर्य बऺड्य कोरि लऺडकॖ ज़नानॖ मर्द थऺकॖरावान पान बैंडस सॗत्य सॗत्य नऺच़्य नऺच़्य। कोरि वऻल्य प्रारान अथन मंज़ पोशि मालॖ ह्यॆय ह्यॆय यॊत ताम नॖ नच़न वऻल्य थख कडन तॖ माहराज़स अंदर दिन अच़नॖ। थऺकॖरावान छि पान डानस कऺर्य कऺर्य। थऺकरावान छि तिमन बड्यन बुज़र्गन मर्दन ज़नानन यिम लोलॖ हति खड़ा छि आसान वारियाह कालॖ प्यठॖ पनॖन्यन पनॖन्यन अथन मंज़ हार तॖ पोशि मालॖ ह्यॆय ह्यॆय। वैसे ति छॆ नॖ अज़कल स्व त्वछ़ ज़्यादॖ कालस खड़ा रोज़नॖच तॖ प्यठॖ छु अज़ाब गछ़ान यॆलि प्रारुन प्यवान छु बैंड बाजि बंद गछ़नस ताम। ज़नानन हुन्द वनवुन ति छु कऺन्य पऺत्य गछ़ान नच़न वाल्यन हॖन्दि शोरॖ सॗत्य। तमि मूजूब आव मज़ॖ रातॖच बरात वुछिथ। भगवान दीनख ज़ीठ वुम्बॗर माहर्यॆनि तॖ माहराज़स। छावुन यॆछ़नख बहार। अख ख़ास चीज़ यि म्यॆ राथ नज़रि गव सु गव यि ज़ि सऻर्यसॖय बरऻच़ मंज़ॖ ॴस्य यिनॖवऻल्य बरऻत्य त्रॖहि-पान्च़त्रॖह वुहर्य ह्यॊर ह्यॊरॖय ब्वन नॖ कांह सिवाय अख ल्वकुट पान्च़ॖ-शु वुहुर युस शायद पनॖनिस बुडिबबस सॗत्य ओस आमुत। हऻरान गोस बॖ यि वुछिथ ज़ि नवजवाना गोम नॖ नज़रि कांह। न कोर्यन मंज़ॖय तॖ न लऺडकन मंज़ॖय। फुर्सथ कति छि सान्यन शुर्यॆन, मऻलिस माजि सॗत्य ति कति छि शुर्य। ग्वडॖ शुरीय छि कति। शुर्य पालान ॳस्य कमि लोलॖ सान, अख वोत चीन तय ब्याख जापान, ॳड्य छि च़्रंगान तॖ ॳड्य लाचार, कर्मॖ लीखाये कर नमस्कार।
**************************
"नफ़सॖय म्योन छुय हॊस्तुय
ॳम्य हऺस्य मॊंगनम गरि गरि बल
लछॖ मंज़ॖ सासॖ मंज़ अखा लॊसतुय
नतॖ ह्यतनम सऻरी तल"
        ***********
अर्थात:- मेरा मन एक हाथी के समान है जो सदा बलवान बनने की इच्छा करता रहता है। इस इच्छा रूपी हाथी को लाखों मनुष्यों में किसी एक ने वश में किया। शेष सबको इस ने कुचल दिया
  पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)