28.11.2019

28.11.2019 मॊन्जहोर (मार्ग) ज़ूनॖ पछॖ (शुक्ल पक्ष) द्वय (द्विती) ब्रसवार (वीरवार/ब्रहस्पथवार/ गुरुवार) श्री सप्तर्षी सम्वत 5095,राश धनु (सुबहॖचि 7.33 बजि प्यठॖ) ऋतु हेमन्त (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: गरि गटॖ तॖ मऺशीदि च़ॊंग
    अ: पानस नॖ वातुन तॖ ब्यॆयिस
          पलज़ुन/पानस व्यछ़य
          रोज़ॖन्य तॖ ब्यॆयिस मदद
          करुन
2. मु:  गरस मंज़ गंगा
    अ: यॆलि नॖ कॆंह प्रावनॖ खऻतरॖ
          मॆहनत प्यॆयि करॖन्य
3. मु:  गुर बडि सोन तॖ दानॖ
          ख्यॆयि च्यॊन
    अ: ब्यॆयि सॖन्दि सॗत्य फ़ऻयदॖ
         तुलुन
4. मु: गर गुन्डॖ
    अ: पनॖनिस गरस मंज़ बऺडीमी
         हावॖन्य अमापॊज़ न्यॆबरॖ नॖ
         कथ ति फोरॖन्य
5. मु: गरॖ गव च़कॖ नाव दकॖ दी दी
         पकनावं
    अ: गरॖ चलावुन छि ज़ीठ तॖ
         मुश्किल कऻम अथ छु
         ह्यकुन प्यवान
**************************
1. मस......Hair
2. ॳछ.....Eye/Eyes
3. कन.....Ear/Ears
4. ड्यकॖ....Forehead
5. बुमॖ...... Eyebrow/Eye-
                 brows
6. ॳछरवाल....Eye lashes
7. ॳछ टोर.....Eye lid
8. नस........Nose
9. नकॖवोर..... Nostrils
10. गोंछ़....... Moustaches
**************************
      गीता ज्ञान  :अध्याय 18
युस कर्म स्यठाह दुशवार आसान
फल यछ़न वोल आसि यछ़ान
सु कर्म करुन राजस ज़ान
वॊन भगवानन गीता ज्ञान
**************************
म्यॆ छु बिल्कुल याद ज़ि म्यऻनिस ल्वकचारस मंज़ अगर बूटस पऻलिश आसिहे नॖ कऺरिथ आसान या बूटस फ़ीतॖ आसिहे नॖ सऺही पऻठ्य गन्ठिथ आसान च़ाटॖहाल न्यॆरनॖ विज़ि माजि हॖन्दि दऺस्य  ॴस ब्यवऻरी प्यवान ज़ि रबॖद छुय नॖ। यिथय पऻठ्य अगर पतलूनस आसिहे आसान इस्तर्य करनय या कुनि जायि यिथऻय छ़्यॊनमुत दपान ॴस मऻज्य यि छुय छ़्यॊनॖमुत पतलून तॖ च़ॖ छुख ना मंदछान ति यि पतलून लऻगिथ कुनि जायि ति गछ़नॖ विज़ि। मगर ॳज़िक हालाथ वुछिथ छुस बॖ वाकयी आसमानॖ प्यवान पनॖन्यन लऺडकन तॖ कोर्यन हॖन्द्य फऻशनॖ त्रठाह वुछ्य वुछ्य। त्यॆलि अगर कऺमीज़ि बटुन लागॖहऻव ह्यॊर ब्वन दपान ॴस्य तमीज़ॖय छुय नॖ। पलव लागनुक सऺलीकॖ छुय नॖ। मगर अज़कल छु सोरुय हॊल कॊल तॖ पऺतिमि फऻशनॖ विप्रीत यानि सोरुय फिरिथॖय। ॳड्यन छि हऺज्य कमीज़ तॖ स्यॆद्य बटन। कुरतस लोंचि ह्यॊर ब्वन तॖ कॊर्यॆन हॖन्द्यन वरदनन फ्यॆक्य अकि तरफॖ यलय या न्यथनऺनी, जीन छ़्यॆनॖमॖती, सदरि या वास्कटस कून अख ह्यॊर तॖ ब्याख ब्वन। मतलब स्यॆद्य पलव छ़ॖननवोल छु ज़न मंदछान मंज़ बागॖ।  फऻशनन छि छ़ठ कऺडमॖच़ व्यॊखतुय।कलस प्यठ मसतस कम कम डिज़ायन छि यिवान करनॖ। हबुशन हॖन्द्य पऻठ्य कलस अंद्य अन्द्य च़्यफ आसान ह्यॆच़ॖमॖच़। अड्यन मस आसान कोस्मुत तिथॖ पऻठ्य ज़ि बासान छु ज़ि नऻविद छु ओसमुत नाखान्दॖ। लूकन हॖन्ज़न शकलन छि अज़कल बेवऺतीरॖ पऻठ्य पऻराव आमुत करनॖ।  कथ छि जऻरी
**************************
"बुथि क्या जान छुख व्वंदॖ छुय कनी
असलॖच कथ ज़ांह सनी नो
परन ल्येखन वुठ ऒंगॖज गऺजी
अंदरिम दुय ज़ांह च़ऺजी नो"
       *************
अर्थात:- चेहरे से तो अच्छे लगते हो किंतु तेरा हृदय कठोर है। असली बात का तू ने मनन ही नहीं किया। पढने लिखने से तेरी केवल ऒंगली और होंठ ही घिस गये किन्तु अन्दर का द्वैत भाव हृदय से नहीं गया।
  पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)