27.11.2019

27.11.2019 मॊन्जहोर (मार्ग) ज़ूनॖ पछॖ (शुक्ल पक्ष) ऒक्दॊह (प्रथम), ब्वदवार (बुधवार),श्री सप्तर्षी सम्वत 5095, राश वृश्चिक (चलान) ऋतु हेमन्त (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: गिल दिवान छ़ऻन्ड दान्यस
    अ: ज़ुव बचावनॖच कूशिश
2. मु: गबि बुथि रामॖ हून
    अ: ज़ुलुमगार मगर शऺरीफ़ बुथ
3. मु: गऻज़्य व्वदुर
    अ: सु शख्स युस ब्यॆयिस थपि
          नी
4. मु: गऻन्ठ नॖ कुनि तॖ गऻन्टॖ ओल
    अ: बे वख्तॖच तयऻरी करॖन्य
5. मु: गरस गरॖ छा वाठ दिवान
    अ: गुज़ारॖवोल गरॖ छु नॖ ग़रीब
         गरस फ़ऻयदॖ वातनावान
**************************
1. गाव.....Cow
2. मऻश..... Buffalo
3. दांद.......Ox
4. वछ़ॖर.....Calf
5. गुर........Horse
6. गुरिन्य....Mare
7. खर.......Ass/Donkey
8. हून........Dog
9. हून्य......Bitch
10. ब्रोर.....Cat
**************************
       गीता ज्ञान  :अध्याय 18
युस कर्म करि शास्त्र व्यज़ सान, न
करनुक अबिमान न फल कांछ़ान
रागॖ दूवेशि करनॖ सात्विक ज़ान
वॊन भगवानन गीता ज्ञान
**************************
खान्दरव तुल व्वथॖवार। दवॖ दवॖ छि करान बटॖ मगर तोति छि नॖ सारिनी खान्दरन ह्यकान वऻतिथ। राथ ॴस ॳकिस गरस मऻन्ज़िराथ नोयडाहस मंज़। गिन्दन गॊर रॊसतुय। सऻरी बऻथ ग्यॆव्य ग्यवन वऻल्य जान सॊरूदस मंज़। बडॖ मज़ॖ आव। रऻत्य रातस रूद जॆशिन चलान। खान्दरस मंज़ कॊर पनॖन्यवॖय बऻच़व नच़ुनाह गिन्दुनाह। म्यॆ सॗत्य ओस अख बुज़ुर्ग इन्सान बिहिथ कुर्सी प्यठ। ॳम्यसॖय ओस नोव दऺह रुपियुन पैक्यटा चन्दस मंज़। यि इन्सान ओस वारॖ वारॖ कडान यि नॊव रॊपियि बन्डल तॖ अमि मंज़ ओस कडान गंज़रिथ कॆंह नोट आलवन बापथ तिहन्द्यन कलन प्यॆठ यिम अथ महफिलि मंज़ नच़ान ॴस्य। हालांकि पानस ओसुस मुश्किल गछ़ान थॊद व्वथुन मगर रॊपियि थॊम्बा थॊम्बा ओस सोज़ान कऻन्सि अथि आलवनॖ बापथ तिहिन्द्यव कलव प्यॆठ्य यिम अति नच़ान ॴस्य। दॊपुन म्यॆ ज़ि म्यॆ माहरा छि स्यठाह खुशी अज़ ज़ि यिम छि म्यान्यन शुर्यन हॖन्द्य शुर्य डानस करान। ज़ानि दय पतॖ कर वुछि बॖ युहुन्द नच़ुन। ग्यवन वोल ओस बख्ति बावॖ सान ग्यवान। मन गव ख्वश। गरिक पनॖनी बऻच़ ॴस्य गिन्दन गऺर्यसॖन्द्य रॊस नच़ान। अथ मऻन्ज़्यरऻच़ मंज़ मील्य म्यॆ कॆंह तिम ॴश्यनाव ति यॊत बॖ ल्वकचारस यिवान गछ़ान ओसुस ह्यॆरऺच़ हॖन्द्य डून्य ह्यथ या पनुक रोठ ह्यथ या सत्यदीवॖक पूर्य ह्यथ। ल्वकॖचारॖक द्वह प्यॆयि याद। याद आयि कऺशीर ब्यॆयि अकि फिरि।अख लार अख दार कति ॳस्य छि मेलान, झेलान हिज्रुक दौर। राथ मील्य अख ॳकिस।ज़ानव ग़नीमथ। क्याह पताह कल हो न हो।
**************************
"प्रान तॖ रुहुन कुनुय ज़ोनुम
प्रान बज़िथ लबिय न साद
प्रान बऻज़िथ कॆंह ति ना ख्यज़े
तवय लॊबुम सूहम साद"
       ***********
अर्थात :- प्रान तथा रुहुन (लहसुन) को एक जैसा माना। प्रान को तल कर (जला कर या प्रानों को तकलीफ़ देकर) स्वाद न मिलेगा। इसलिए प्रान (प्राणों) का तडका लगाकर नहीं खा लेना। अर्थात प्राणों को हठात नहीं रोकना या पीडा देना। ऐसा (सहज क्रिया) करने से ही मैंने सोहम का स्वाद पा लिया, अर्थात स्वात्म को पहचानने का आनंद पा लिया
     पऺरिव यि लल वाख ति
**************************
कऻशुर ह्यॆछव कऻशुर परव
कऻशीर्य पऻठ्य पानॖवुन्य कथबात करव
**************************
 नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव