30.11.2019

30.11.2019, मॊन्जहोर (मार्ग) ज़ूनॖ पछॖ (शुक्ल पक्ष) च़ोरम (चतुर्थी) बटॖवार (शनिवार शनिश्चरवार) श्री सप्तर्षी सम्वत 5095, राश मकर (दुहचि 2.32 बजि प्यठॖ), ऋतु हेमन्त (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: गरॖ कॊर अनि कानि गरॖ
         रोव मान मानि
    अ: अगर गरॖ बऻच़न मंज़ कथ
         कुनी आसि कान्ह अख ति
         ह्यॆकि खानदऻरी हुन्द फ़र्ज़
         नखॖ वऻलिथ
2. मु: ग्रटस तल फॊस
   अ: कऻन्सि तल लॊगुमत आसुन
         कऻन्सि हुन्द आवेज़ आसुन
3. मु: ग्रॗस्तिस नय फ़ारसी तॊग
         मारुन मा वोत
   अ: कऻन्सिहे व्वपर ज़बऻन्य मंज़
        कथ तऺज्य नॖ करॖन्य राह
         कुस खार्यस। अनज़ान
       आसुन छॆ नॖ पाम या ग्वनाह
4. मु: ग्रॗस्य कार गव जिनॖ कार
    अ: ज़मीन कमावनस छि
         स्यठाह मॆहनथ लगान
5. मु: ग्रटॖ कडुन तॖ परिनि छानुन
    अ: सख़ मॆहनत करॖन्य
**************************
1. सीनॖ.....Chest/Breast
2. यड......Belly
3. कमर....Back
4. नऺर.......Arm
5. ख्वनॖवठ... Elbow
6. हॊच़.....Wrist
7. अथॖ......Hand/Hands
8. न्यॊठ.....Thumb
9. किस..... Little finger
10. मंज़ अथॖ....Palm
**************************
      गीता ज्ञान  :अध्याय 18
युस कर्ता बंदनॖ रॊस आसान, न किबुर सान कथ बाथ करान, सु सऻबिर तॖ उत्साह वोल आसान
वॊन भगवानन गीता ज्ञान
**************************
यॆमि वऺरी यीत्यन ति खान्दरन म्यॆ शॊम्हूलियत कऺर गाह तिम खान्दर दिल्लि मंज़ ॴस्य या ज्यॆमिस मंज़, अकि ख़ास चीज़ॖच कमी गऺयम नज़रि। स्व गऺयि शेंकॖ शब्दॖच। सिरिफ़ बूज़ुम यि शेंकॖ शब्द रोहिनी मंज़ॖय योत ॳकिस मेखलि प्यठ। खान्दरन प्यठ वुछुम नॖ यिथ पऻठ्यन कॆंह ति। या छि यि प्रथा असि व्वंय ख़तम कऺरमॖच़ या रूद्य नॖ तिम ज़ीठ्य शाह यिम ज़्यूठ तॖ ज़ोरॖ ज़ोरॖ शेंकॖ शब्द ह्यकन वऻयिथ या मा छि सोंचान ज़ि बैंड बाजि छु बजानॖय तॖ व्वंय क्याह न्यॆरि शेंकॖ शब्द दिथ। नतॖ मा छि मंदछान अज़कल शेंकॖ शब्द वायनस। कॆंह न तॖ कॆंह कारण छु युस नॖ म्यॆ बेकलस आव समजस मंज़ वुन्युखताम हालांकि दपान छि शेंकॖ शब्दस छु पनुन अख महत्व शास्त्रात मूजूब। अथ शब्दस मंज़ छु अख पनुन प्रभाव मगर यि शब्द छु नॖ व्वंय कनन गछ़ान कॆंह। पॊत माहराज़ॖ ति छुनॖ व्वंय माहराज़स सॗत्य नज़रि यिवान। कॆंच़न खान्दरन वुछुम  पर-ज़ऻच़ हुन्द माहराज़ॖ तॖ तऺमिस सॗत्य तमी ज़ाच़ हुन्द ब्रह्मुन ति। व्वंय छु नॖ शायद तिमन यॆतिक्यन ब्रह्मनन प्यठ ति विश्वास रूदमुत। तमी ज़ऻच़ हॖन्दि रस्मॖ रिवाजि सॗत्य लगॖन सपदान सुति ज्यॆमिस मंज़।  कऻशिर्य कूर तॖ लऺडकॖ पनॖनि ज़ऻच़ न्यबर,ब्रह्मुन ति ज़ऻच़ न्यॆबरिम।मंत्र वगैरा ति परान पनॖनी आयि पनॖनी ज़बऻन्य मंज़। रसूमात ति पूर करान पनॖनी पऻठ्य। ॳस्य तिमन थलि थलि वुछान छ़ॊपॖ कऺरिथ ज़ि तिम करान क्याह। योरुक छु सिरिफ ख्यन च्यन तॖ योरॖच छि हूर हिश कूर। दिलस छु तस्लाह ज़ि खान्दर कॊर पनॖनिस अलाक़स मंज़। न तॊर असि फिकिरी ज़ि तिम वनान क्याह तॖ करान क्याह तॖ न तॊर तिमन फिकिरी ज़ि ॳस्य क्याह ॴस्य वनान या क्याह ॴस्य करान। वुछनस तल आव म्यॆ सिरिफ यि ज़ि तिम ॴस्य पनॖनिस लऺडकस लोंचि थफ कऺरिथ तॖ ॳस्य ॴस्य पनॖनि कॊरि दामनस थफ कऺरिथ यॊत्ताम लगॖनुक अंद वोत। अमापोज़ माहर्यॆनि तॖ माहराज़न कऺर पानॖवुन्य त्रॆयिमि ज़बऻन्य मंज़ कथ बाथ य्वस नॖ यपऻर्य द्वन दर्यन पताह लऺज्य, न लऺडकॖ सॖन्द्यन गरिक्यव तॖ न कोरि हॖन्द्यन गरिक्यन। बस नालॖमोताह कॊरुख पनॖन्यन पनॖन्यन अंगन ॴश्यनावन तॖ द्रायि सऻरी पानस पानस। खान्दरन हुन्द व्यवहार बदल्यव, अनहार बदल्यव।अंदरिम न्यॆबरिम नज़ारॖ बदल्यव। पकान छि ॳस्य ति क़दमाह क़दमाह। भगवान दीन सारिनी तार। सोन ॴस्यनख नमस्कार।
**************************
"बबरि लंगस मुशुक नो मोरे
हूनि बस्ति कोफ़ूर न्यॆरि नॖ ज़ांह
मनॖ यॊद गारॖहन फेरिय ज़ेरे
नतॖ शालॖटूंगे न्येरी क्याह"
          **********
रेहान (मरवाहे) की शाखा से सुगन्ध कभी नहीं जाती। कुत्ते के चमडॆ से कपूर की सुवास कभी नहीं आ सकती। यदि तू उस (परमपद अक्षर) का ध्यान मन से
करे तो वह सहज ही (तेरी ओर)घूमेगा। नहीं तो गीदड की तरह चिल्लाने मात्र से कोई लाभ नहीं
     पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)