01.11.2020

01.11.2020, कार्तिक (कतक) गटॖ पछॖ (कृष्ण पक्ष) ऒक्दॊह (प्रथमा) आथवार (रविवार/ ऐतवार), श्री सप्तर्षि संवत 5096, राश वृष (रऻच़ हॖन्ज़ॖ 3.40 बजि प्यठॖ) ऋतु हरुद (शरद) (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

       महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

              लल वाक्

         (पराग पुस्तक-107)

ज्ञानॖक्य अमबर पॗरिथ तने

यिम पद ललि दऺप्य तिम हृदि ॴन्ख

कारॖन्य प्रणवॖक्य लय कॊर लले

च्यथॖ ज्यॊति कऻसॖन मरनॖनि शेंख

             अर्थात

ज्ञान रूपी वस्त्र पहन कर लल के कहे पदों को आंक ले, अर्थात धारण कर (जैसे लल ने धारण किए)। लल भी ओम् के कारण ही (परमशिव के साथ) लय हो गई जिस से उसके चित में ज्योति का प्रकाश प्रगट होकर मरने की शंका समाप्त हो गई।

भावार्थ:- लल के अनुभवों को समझ कर जीते जी ही ओम् के साथ लय होकर प्रकाश मंडल पहुंच कर आवागमन के चक्कर से छूटना चाहिए।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

              **********

1. जानिमन (Own life/My dear/Dear friend)

2. जानबाज़ (Brave/Daring/Intrepid)

3. जानपऻठ्य (Very well/Fit/Settled/Right/Safe and sound)

4. जानियर (Goodness/Nobility/Gentlemanliness/Politeness/Civility)

5. जाल (Mesh/Web)

               मुहावरॖ

1. मु: खऻकी फूकी गर्दि

         आसमऻनी

    अ: यस नॖ कॆंह ति सूरथ रोज़ि

         या, यॆलि कांह सऻर्यसॖय 

         फान कऺरिथ पऺथरिस लारि

2. मु: खानॖमऻलिस नॖ कोज तॖ

         परज़ॖनन मिमुज़

    अ: गरिक्यन बऻच़न नॖ वातुन तॖ

         परद्यन साल करुन

3. मु: खानॖमाज्यन तानॖ बागय

    अ: हकदार शखसन छु नॖ 

         शूबिदार कॖसमत आसान

        (पनॖन्य शुर्य ह्यॆछॖनऻव्यूख)

**************************

पंचान्ग :- असि मंज़ छि कॆंह बऻय ख्वश ज़ि रिलीफ यीतिस कालस मेलान रोज़ि सरकार तरफॖ तॖ राशन ति छु मुफुत मेलानॖय तिमन क्याह छु करुन वापस कऺशीरि गऺछ़िथ। न मेलि बिहिन सॊम्ब जाय, यॊदवय मेलि ति, खबर छा यि रिलीफ तॖ मुफुत राशन मा करन बंद तॊत वऻतिथ तॖ छि ब्याख ख्वशख्यथ। नऺव जाय पुटॖन्य प्राटॖन्य, शेरॖन्य सम्बालॖन्य, किछ़ आसि, कति आसि, कऻच़ाह आसि, अमि म्यंगॖ दगि निश छु दूर यॆत्यन बिहिथ आरामॖ सान पनॖन्य कऻम करान तॖ प्यॆठवऻन्य पौंसॖ मेलान। कऺशीरि गऺछ़िथ कयाह लास छु लबुन। अक्त्रॖह वऺरी कऺड्य। वारॖकारॖ शुर्य ति गऺयि बजाह पनॖनि पनॖनि जायि। यिम ज़िठ्य ॴस, तिम टॖरेयि। यि सूंचिथ छु तिमव म्यानव बायव पनुन खयालॖय बदलोवमुत कऺशीरि वापस गछ़नुक। व्वंय गऺयि उर्य क्रखा क्रखा दिन्य ज़ि हम क्याह चाहते हैं, इन्साफ, स्व छि चलान। स्व गछ़ि रोज़ॖन्य चलवॖन्य। यिहऻय प्लान ओस मुसलमानस कऺशीरि मंज़ ज़ि क्रख दिन, हम क्याह चाहते हैं, आज़ादी, तॖ सरकार ओस रोज़ान खर्चावान हदॖ रॊस त्युहुन्द ॴस बंद करनॖ बापथ। असि सॗत्य ति छु सुय वरतावं यिवान करनॖ तॖ तिम ति पकान ॳस्य ति पकान तॖ वख छु पकानॖय पकान, लीडरन छु पनुन दुकान चलानॖय चलान। कथ छि जऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)