12.10.2020

12.10.2020 ॴशिद(मलमास) (आश्विन/ॳसूज)(मलमासे)गटॖ पछॖ (कृष्ण पक्ष) दऺहम(देवादेव)(दशमी)(देवादेव) च़ऺन्दॖरवार (सोमवार), श्री सप्तर्षि सम्वत 5096, राश सिंह (रऻच़ हॖन्ज़ॖ 12.29 बजि प्यठॖ) ऋतु हरुद (शरद) (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

            लल वाक्

        (पराग पुस्तक-87)

गाल गंड्यन्यम बॊल पऺड्यन्यम

दऺप्यन्यम तिय यस यि रुव्व़े

सहज़ कुसमव पूज़ कऺर्यन्यम

बोह उमलऻन्य तॖ कस क्याह म्वच़े

                अर्थात

यदि कोई गालियां देकर मेरा अपमान करे, या मीठे बोल से स्तुति करै, जिसे जो भी कुछ कहने की इच्छा हो वैसा ही कहे या कोई सुन्दर फूलों से मेरी पूजा करे, मेरे मन में इन बातों से कोई विकार नहीं आता। ऐसा करने वाले के कोष में भी कुछ भी सचित नहीं होता है।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

             ********

1. थऺन्य (Butter)

2. थऺर (Bush)

3. थऻल्य (Plate)

4. थख (Rest/Respite)

5. थकावठ (Tiredness/Fatigue/Exhaustion/Weariness)

               मुहावरॖ

1. मु: थॊकि प्यठ रिकिन्य

    अ: मॊमूली चीज़ॖ सॗत्य या 

         ग़लती सॗत्य न्वकसान

         वातुन

2. मु: थॊकॖ जोद

    अ: अपुज़ वाठ

3. मु: थ्वख निशानॖ

    अ: जल्दी करनॖ खऻतरॖ कऻन्सि

          वनुन, या, जल्द म्वकॖलन

          वोल चीज़

          (पनॖन्य शुर्य ह्यॆछॖनऻव्यूख)

**************************

पंचान्ग:- मथुरा दीवी हुन्द दर्शुन छु म्यॆ कॊरमुत वारियाहि लटि दुर्गा नागॖ यॆलि यॆलि ति बॖ ओसस गछ़ान पनॖनि माजि सॗत्य बटवोर बादामबाग यॆति म्योन अख कऺरीबी ॴश्यनाव मिलिट्री मंज़ मुलऻज़िम ओस। मथुरा दीवी हुन्द दर्शन ओसुस बॖ करान श्रावनॖ पुनिय कालॖ ति ति क्याज़ि रातस ओसुस बॖ करान बजन कीर्तन तऺम्यसॖन्दिस कमरस मंज़ तॖ श्रावॖणॖ पुनिम द्वह सुबहऻय ओसुस शेंक्राचार खसान शिव मंदरॖ पाठ पूज़ा करान। मथुरा दीवी ॴस अख ख्वश मिज़ाज़ साधवी, हमेशॖ म्वखस प्यठ असुन ओस ॳमिस रोज़ान। प्रसादॖ कनि ॴस्य मथुरा दीवीयि शीरिन्य, बादाम तॖ किशमिश बऻगरान रोज़ान। मथुरा दीवी हुन्द गॊन गॊन मस, यलय तॖ अवेज़ान ॴस आसान मस लंग वऻंकन हॖन्द्य पऻठ्य त्र्यन लरन मंज़ पऻरिथ। फ्यरुना लऻगिथ, नर्यन कछ़करॖ लऻगिथ तॖ ड्यकस प्यठॖ भसमॖ मऺलिथ। बॊड बॊड गोल ट्योकु कऺरिथ प्रज़्लान ॴस्य आसान मथुरा दीवी। बजन कीर्तन ओस रऻत्य रातस चलान रोज़ान तॖ समावारस मंज़ मॊगॖल्यचाय तॖ कुलचिवऺर्य ॴस्य यिवान बऻगरावनॖ। मथुरा दीवी हुन्द यलॖ मस आसनस प्यठ ओस अख मुहावरॖ ति बन्योमुत। मऻज्य ॴस कोरि वनान, "हतय मस पार, यिहऻय छख मथुरा दीवी हिश बासान, या बासान छख मथुरा द्यदा हिश, गछ़ कलस दि कंगुव"।  मथुरा दीवी ॴस थदि पायिच संत। वऻणी मंज़ ॴसॖस स्यॆदी। 

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)