17.10.2020

17.10.2020 ॴशिद (आश्विन/ ॳसूज) ज़ूनॖ पछॖ (शुक्ल पक्ष) ऒक्दॊह (प्रथमा) बटॖवार (शनिवार/शनिश्चरवार) श्री सप्तर्षि सम्वत 5096, राश तुला (चलान) ऋतु हरुद (शरद) (चलान)...नवरात्र शुरु (दुर्गायि हुन्द ॳज़्युक रूप छु शैलपुत्री हॖन्दिस रूपस मंज़)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

     महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

            लल वाक्

       (पराग पुस्तक-92)

लल बो द्रायस कपसि पोशॖचि सऺच़ॖय

कऻड्य तॖ दून्य कऺरनम यऺच़ॖय लथ

तॖयि यॆलि खारिनम ज़ऻविज तॖये

वोवॖर्य वानॖ गऺयम अलऻन्ज़ॖय लथ

               अर्थात

ललेश्वरी अपनी अध्यात्मिक यात्रा कपास के माध्यम से प्रस्तुत करते हुए कहती है, मैं कपास के कोमल फूल से डोडा बनी और डोडे में से कपास के रूप में फूटकर निकली। बिनोले वाले तथा धुनये ने मेरी बहुत दयनीय दशा बना दी। कातने वाली ने मेरे पतले धागे काते। फिर जुलाहे के करघे पर बुने जाने के लिए लटकाई गई। 

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

             *******

1. तुहुन्द (Your's)

2. तहज़ीब (Etiquette/Manners/Refinement/Culture/civilization/Politeness)

3. थॊस (Flake of snow)

4. थॊंब (Handful of liquid)

5. थ्वख (Spittle/Saliva/Phlegm)

                मुहावरॖ

1. मु: टरलस टर फुटुन मोल 

         मरनस बराबर

    अ: अपज़िस नन्यर गछ़ुन छु

         अपज़्यऻरिस सख़ मुश्किल

         गछ़ान

2. मु: टोडर मऺल्य हिसाब

    अ: प्यॆठ्य प्यॆठ्य अन्दाज़ॖ 

         लगावुन

3. मु: टोठ छु नेक

    अ: पनुन चीज़ छु रुत बासान

        (पनॖन्य शुर्य ह्यॆछॖनऻव्यूख)

**************************

पंचान्ग:- त्वहि सारिनी छु नवरात्र मुबारक। अधिकमास याने मलमास आसनॖ म्वखॖ आयि युहुस नवरात्र अख ऱयथ च़ीर्य। योदवय त्वहि सारिनी याद आसि ज़ि कऺशीरि मंज़ ॴस्य ॳस्य कऻशिर बट्टॖ नवरात्री क्यन ग्वडनिक्यन च़्वन दॊहन अर्थात ऒक्दॊह प्यठॖ च़ोरम ताम मामस याने न्यॆनि ख्यवान तॖ नवम द्वह ॴस्य हारी पर्वत याने पर्बत याने च़क्रीश्वर च़ॊट खारान। च़ोट माने तऺहर च़रवन या तऺहर शूशनोर खारान तॖ च़क्रीश्वर न्यबर पहाडॖ प्यठॖ गऻन्टन ख्यावनावान। यि च़ॊट ॴस्य ॳस्य ज़ीठ्ययऻर ति खारान। यि प्रथा ॴस कऺशीरि मंज़ म्यॆ बासान त्रॆयव च़ॊरव हतव वऺरियव प्यठॖ या तमि ब्रोठॖ कालॖ प्यठॖ ति आमॖच़ चलान मगर ज़ानि दय अथ प्रथायि क्याज़ि आव थख दिनॖ तॖ असि त्रोव नवरात्रिकि ग्वडनिकि द्वह प्यठय न्यॆनि ख्यॆनि तॖ सॗती त्रोव असि गऻन्टन तऺहर तॖ च़रवनॖ या शूशॖनोर खारुन पर्बत याने च़ऺक्रीश्वर या ज़ीठ्ययऻर। म्यॆ छु बासान ज़ि गऻन्टन बऺली न वातनॖ मूजूब मा म्यूल असि तिमन जानावारन हुन्द आहिबद तॖ असि प्यव सोरूय जायदाद त्रऻविथ कऺशीरि प्यठॖ च़लुन। म्यॆ छु नॖ फिकिरी तरान ज़ि यि प्रथा कति प्यठॖ तॖ कऺम्य ॴस शरु कऺरमॖच़ तॖ क्याह मक़सद ओस अथ रसमस । म्यॆ छु नॖ यिति फिकिरी तरान ज़ि असि क्याज़ि द्युत अथ रसमस छ़्यन तॖ कऺम्यसॖन्दिस वनॖनस प्यठ। समॖज छु नॖ यिवान कि सऻन्य पूर्वज यिमव यि प्रथा पऻज्यमॖच़ ॴस, ॴस्या ग़लत किनॖ ॳस्य छि ग़लत यिमव यि प्रथा फॖटरऻव। धर्मॖच रऻछ ॴस्य सऻन्य ज़िठ्य ति करान यि दऺप्यज़ि ति सानि ख्वतॖ ज़्यादॖ, तॖ परम्परा ति ॴस आमॖच़ पकान कॆंच़व हतव वऺरियव प्यठॖ। मगर कऺशीरि न्यबर क्याह द्रायि ॳस्य, ॳस्य ज़न रऺटिख च़ूरॖ हांच़ि ज़ि अगर न्यॆनि ख्यॆयि तॖ असि मा मारन। ॳस्य छि वैसे ही खोच़ान ब्यॆयि ज़ऻच़क्यन लूकन तॖ तमि म्वखॖ छि पनॖन्यन रसमन ॴब ज़ऻनिथ वुरुन त्रावान प्यठॖ। ब्यॆयि छि ॳस्य नकॖल करनस मंज़ ताक। करवा चोथ, भाई दूज, तीज, होली दहन, होली मिलन, धन तेरस हि पर्व पानॖनऻव्य, तॖ संकट च़ोरम, चन्दन षॆष्टी, ऐकादशी जैसे पर्वॖ मऺशरऻव्य। कॊत कुन छि ॳस्य लमान तॖ असि क्याज़ि छि वुनि ति कऻशिर्य बट्टॖ वनान या कऻशिर्य पंडित वनान, म्यॆ तॊर नॖ फिकिरी वुन्युखताम। कथ छि जऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप" 

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)