05.10.2020

05.10.2020, ॴशिद(मलमास)(आश्विन/ॳसूज)(मलमासे) गटॖ पछॖ (कृष्ण पक्ष) त्रय (देवादेव) (तृती) च़ऺन्दॖरवार (सोमवार), श्री सप्तर्षि सम्वत 5096, राश वृष (रऻच़ हॖन्ज़ॖ 9.41 बजि प्यठॖ), ऋतु हरुद (शरद) (चलान)..अज़ छि संकट च़ोरम (संकट निवार्ण चतुर्थी) ति

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

     महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

              लल वाक्

        (पराग पुस्तक - 80)

यस नॖ कॆंह कान तय छ़ॊरुय यस तरुय

सु कुस शूरवीर य्यदस नेरे

ॳन्दरी नय गलि तस वेहनुय ब्योलुय

शैय नय आसि तय क्रय कति व्यपे

            अर्थात

जिस के पास तीर नहीं है और तरकश भी ख़ाली है वह योद्धा क्या युद्ध करेगा। उसके पास कोई लक्ष्य नहीं है और मन से विष का बीज भी समाप्त नहीं हुआ हो। उसकी कोई क्रिया भी सार्थक नहीं होगी। सारांश यह कि जिस के मन से द्वैत रूपी विष का अभाव न हुआ वह साधक लक्ष्यहीन होकर निरर्थक व्यापार करता है। ल‌क्ष्य निर्धारण करके, इसलिए पूरी तयारी तथा दृढता के साथ मन से द्वैतभाव को समाप्त करके एक वीर की तरह आगे बढना श्रेयस्कर है।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

            ********

1. ताअबद (For the whole life unto eternally/Ever lasting)

2. ताब (Patience/Endurance)

3. ताब अनुन (To show patience/Suffer silently/Endure)

4. ताब करुन (To be patient)

5. ताब न अनुन (To be impatient/Be unable to endure

               मुहावरॖ

1. मु: ताबस छु लाभ

    अ: ताब करनस छु फऻयदॖ 

         मेलान

2. मु: तालवस लोरि काह जंगॖ 

         विज़ि नॖ अख ति

    अ: मोकॖ विज़ि नॖ चीज़ अथि 

         युन

3. मु: तऻज़्य बटॖन्य कान

    अ: मोमूली छ़्वम्ब वरतऻविथ 

         कांह बचाव करुन

      (पनॖन्य शुर्य ह्यॆछॖनऻव्यूख)

**************************

पंचान्ग:- कनन गव ज़ि कऺशीरि मंज़ छि क्याहताम व्वसॖ द्रस चलान ज़ि कऻशिर्य बटन हॖन्दि बापथ मा यिन दऺहन मुख्तिलिफ ज़िलन मंज़ केंह ज़ॖ कमरॖ वऻल्य फ्लै्ट बनावनॖ तॖ तिम यिन दिनॖ तिमन यिम तति प्रधान मंत्री योजना तहत नोकरी छि करान तॖ ब्यॆयि तिमन यिमन ब्रोंहकुन नोकरी मेलनॖच आश छि। यॊदवय यि क़दम आमुत छु तुलनॖ सरकारॖ दऺस्य, यि छु अख रुत क़दम। मगर समस्या छि ज़ि सानि समाजक्यव केंच़व संस्थायव बऺर हामी अथ कदमस मगर केंच़व संस्थायव कॊर यि फऻसलॖ नामनज़ूर ति क्याज़ि तिमन वोत पऺतिम्यव कॆंच़व वऺरियव प्यठॖ सरकारस मंगान पनुन कशमीर बिल्कुल ब्यॊन। तिम छि यछ़ान कुनुय ज़मीनॖ च़कुल व्यॆथि यपारि यॆति बट बसावन पनुन गरॖबार अलग थलग पऻठ्य। सरकार छु दुच़्यॆतिस गोमुत ज़ि सऻन्य यि संस्था छा ठीख किनॖ हॊ संस्था।  यपऻर्य या हुपऻर्य, मानव सरकारन यॊदवय मोन युहुन्दुय तॖ द्युतुन ज़मीन चकुल बटन रोज़नॖ बापथ। सवालॖ छु ज़ि क्याह कऻशुर बट्टॖ छा तयार कऺशीरि वापस गछ़नॖ बापथ? क्याह बटॖ बस्या तिमनॖय मारवातलन मंज़ यिमव 1990-तस मंज़ कत्ले आम कॊर बटन। आतंकवादव हऻव पनॖन्य हऺस्ती, मऺस्ती मंज़ कऺडिख बट्टॖ ज़बर्दऺस्ती रातोराथ। वुनि छि कॆंह क़ऻतिल ज़िन्दय, फेरान आज़ाद तॖ प्रारान ब्यॆयि शिकारस। यिछ़न स्कीमन सरांजाम अनॖनस  लगनॖ वारियाह दल, बऺहस लगि, बटस छु अकुय नारॖ या तरुन तॖ वारॖवारॖ तिमनॖय सॗत्य रलुन। न तॖ गलुन कऺशीरि न्यबरॖ मगर कऺशीरि मंज़ न। कथ छि जऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

 नऺविव तॖ फॊलिव

 भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)