01.08.2019

01.08.2019,श्रावणॖ (सावन) गटॖ पछॖ (कृष्ण पक्ष) मावस (देवादेव) (अमावस्या)ब्रसवार (वीरवार/ब्रहस्पथवार)श्री सप्तर्षी सम्वत 5095,राश कर्कट (चलान)ऋतु वर्षा (चलान)...
चूंकि पगाह छु ऒक्दॊह रावान, पगहुक वॊहरवोद यी ॳज़्य यानि मावसि द्वह
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: वावस नावॖ सऻल
    अ: बे मॊकॖ कऻम करॖन्य
2. मु: वालॖ वालॖ खोसॖ
    अ: कऻन्सि हॖन्ज़ सऻरॖय दौलथ
          विटि विटि ख्यॆन्य
3. मु: वाज़ गव लूकन क्युथ
    अ: अमल नॖ करॖन्य/दॊयम्यन
         परुन तॖ पानस पॖर पॖर
4. मु: वाख वाख ध्वनि भैरवी
    अ: वनॖनॖ वनॖनॖ कऺरिथ छु ती
         सपदान
5. मु: वारिनि निश शुर थवुन
         खऺटिथ
   अ: राज़दारस निशि राज़ खटुन
**************************
1. ज़ऻबतॖ.....Rule/Code of
                law/Regulation/
                Discipline
2. ज़ऻबतॖ बनावुन....To act
              according to law
3. ज़ऻबतॖ तऻलीम... Education
                            code
4. ज़ऻबतॖ दीवऻनी...Civil proce
                            dure code
5. ज़ऻबतॖ फ़ौजदऻरी..Criminal
                  procedure code
6. बे-ज़ऻबतॖ...Out of the way
7. ज़ऻलदार....Chief of cer-
               tain area/Leader
8. ज़ऻमिन....Surety/Security
9. ज़ऻमिन बनावुन....To stand
                           surety for
10. ज़ऻमिनी...Surety/Securi-
                     ty/Guarantee
**************************
        गीता ज्ञान  :अध्याय 14
युस भक्ति भावॖ लगातार म्यॆ स्वरान, सु ठीख पऻठ्य त्र्यन ग्वनन तार लबान
म्यॆ ब्रह्मस प्रावनस लायक़ बनान
वॊन भगवानन गीता ज्ञान
**************************
गऺयि तिम द्वह, गऺयि तिम गोरि ति द्वद कॖनिथ। वॊन्य छु नोव आलम।
असि ति प्यॆयि जबरन मऺशरावुन सु वख यॆलि सऻन्य ज़िठ्य ॴस्य नॖ मुसलमानॖ सॖन्दि अथॖच त्रॆश ति च्यवान। मुसलमानस ॴस्य नॖ कुठिस अंदर अच़नॖ दिवान। अज़कल छु श्रावण रयथ चलान, जयपोरस मंज़ व्वथ ज़ात-पातुक हंगामॖ, यॆलि ॳक्य शख़सन मंगॖनोवमुत ख्यन वापस कॊर यि वऺनिथ ज़ि सु ख्यन ओस ॳकिस मुसलमानन ओनमुत सु ति यथ श्रावणकिस रयतस मंज़ युस तऺम्यसॖन्द्य बापथ श्रूच़ तॖ पवित्र रयथ छु यिवान मानॖनॖ। ख्यन सोज़न वऻल्य वॊनॖनस दर जवाब ज़ि ख्यनस छु नॖ धर्मॖच बंदिश।
बवाल गव खड़ा। टी वी-यस प्यठ चल्यव बऺहस मुबऺहस। म्यॆ प्यव पऺतिय दौर याद कऺशीरि मंज़ ॴस्य नॖ ॳस्य ति मुसलमानन सॗत्य ख्यन-च्यन करान, तऺम्यसॖन्दि अथॖ चाय ति च्यवान, पान्युर ओस पोन्य सारान च़ूर्यमिस पोरस ताम पां मलॖर खारान तॖ चोकस निश गरवंजस प्यठ मलॖर थवान मगर अंदर अच़नस ॴसॖस आसान ममऺनियत। सऻन्य ज़िठ्य ॴस नॖ गन्डॖ, टमाटर, रोहनॖ ख्यवान यि ज़ऻनिथ ज़ि यिम चीज़ छि छ़्यट। मगर वख बदल्यव, दफ्तरन मंज़ या बाकॖय अदारन मंज़ या होटलन मंज़ छि अज़कल सार्यॆय ज़ऻच़ रलमिलॖ गऻमच़ॖ। कुस कऺम्यसॖन्दि अथॖ क्याह छु ख्यवान-च्यवान अम्युक ख़यालॖ म्वकल्यव मजबूरन या ज़ऻनिथ मऻनिवथ, छ़ॊट-श्रूच़ छु व्वंय बस तोतथ ताम यॊतथ ताम कऻन्सि हुन्द दखॖल-अन्दाज़ छु नॖ। व्वंय छि सऻरी सोरुय सारिनी जायन सारिनी सॗत्य ख्यवान च्यवान। बस फ़ाकॖ-वाकॖ, श्रूच़-छ़्यॊट, शाकाहऻरी या मांसाहऻरी आसुन छु व्वंय द्वह वुछिथ, वार तॖ व्यस्तार वुछिथ लूख व्यतरावान तॖ युस कांह संजीदॖगी हावि सु छु तिथय पऻठ्य प्यतरावान यिथ पऻठ्य जयपोरस मंज़ तऺमिस बलेमानसस प्यव प्यतॖरावुन। रामॖ लगय च्यानि लीलाये।
**************************
"ग्वरॖय मोल तय ग्वरॖय मऻज्य
ग्वरॖय दिवान न्यत्रन गाश
यॆम्य छ़ऺरिस मऺरिस वस्त्र लऻगी
छुय पुण्यस भागी पापस नाश"
 पऺरिव यि लल वाख ति दॊहय
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogsport.com ति वुछिव)