02.07.2019

02.07.2019 हारॖ (आषाढ) गटॖ पछॖ (कृष्ण पक्ष) मावस (अमावस्या), बॊम्वार (मंगलवार),श्री सप्तर्षी सम्वत 5095, राश मिथुन (चलान) ऋतु ग्रीष्म (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य
लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: बऻल्य बऻल्य फ़ेरुन
    अ: आवारॖ-गर्दी करॖन्य
2. मु: बाह त्रख श्वॊंगुन तॖ ख़ार
         व्वथुन
    अ: बॆ-ग़म रोज़ुन
3. मु: बऻच़न यिज़ाह तॖ प्वतल्यन
         पूज़ा
    अ: पनॖन्यन तक्लीफ़ तॖ व्वपरन
         फ़ऻयदॖ
4. मु: बांग्यन छि बांग दिन्य
    अ: गाटॖल्य छि वथ हावान न
         कि मजबूर करान
5. मु: बागि बोग नानि क्युथ टोक
    अ: बॆमन्दछ लागुन/ज़्यादॖ
         लालॖच करुन
**************************
1. बा-अदब....With respect/
                Well mannered/
                Respectfully
2. बा-ख्वदा....In the name
                of God/Swearing
                of God
3. बा-रऺसूख़...Influential per-
              son/One who can
              talk with official
              head
4. बा-क़ऻयदॖ.....Properly/As
            per rules,/Approba-
            tory
5. बा.....By/With
6. बाब.... Chapter/Topic
7. बाबी....Brother's wife
8. बाबॖ.... Father
9. बाबू....Clerk/Mode of
               address
10. बापथ.... For
**************************
     गीता ज्ञान - अध्याय 13
 हे अर्ज़न आदि रॊस तॖ न्यरग्वन ॴसिथ, सारिनॖय शऺरीरन मंज़ दऺरिथ रूज़िथ
न कॆंह करान न छु ह्यनॖ यिवान
वॊन भगवानन गीता ज्ञान
**************************
गरमन छु अज़कल प्रथ कांह इन्सान पसरॖ ऒनमुत। जानवर तॖ जानावार ति छि अज़कल छ़्यफ़ दिथ पनॖन्यन आल्यन मंज़ बिहिथ आसमानस कुन वुछिथ भगवानस शेहजार मंगान। कऻशिर्य बट्टॖ क्याह करन? यथ नॖ हऻल ॴसॖख ती आख ब्रूंठ्य। तमि कऺशीरि प्यठॖ नीरिथ आयि यपऻर्य तापॖ-क्रायन मंज़ बुज़नॖ। छ़्यपॖ छि दिवान हुपऻर्य यपऻर्य। नौकरी-पेशॖ वोल छु मजबूर तापॖ च़न्ज्यन मंज़ नेरनॖ बापथ मगर यिम बिचऻर्य रिटऻयऻर्ड छि, बुज़ुर्ग छि, तिम छि कमरन मंज़ बिहिथ ए सी-हा चलऻविथ द्वह कडान तॖ पनॖनिस प्वतकालस
याद करान ज़ि कति ॴस्य तॖ कॊत वऻत्य। गरमॖ किन्य ति गऺयि कॆंह म्यॆ बासान सुली स्वर्गस। कति सु कऺशीरि हुन्द आबोहवा युस कॆंच़न दाद्यन ओस ज़न आसान दवाह।
**************************
"वन्दे बोधमयं नित्यं गुरुं शंकररूपिणम। यम् आश्रितो हि वक्रोsपि चन्द्रा: सर्वत्र वन्ध्यते।।"
पऺरिव यि मंत्र ति दॊहय
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
   भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)