07.07.2019

07.07.2019 हारॖ (आषाढ) ज़ूनॖ पछॖ (शुक्ल पक्ष) पऻन्च़म(देवादेव)
(पंचमी) आथवार (रविवार/एतवार),श्री सप्तर्षी सम्वत 5095, राश कन्या (रऻच़ हॖन्ज़ 1.46 बजि प्यठॖ), ऋतु ग्रीष्म (चलान)...अज़ छि कुमार शॆयम ति
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: जान ऒर तॖ जहान् ऒर
    अ: अरिजुवॖ छु सोरुय जान
          आसान
2. मु: जान छु पनुन पान
    अ: ब्याख ह्यॆकि तॆलि जान
         ॴसिथ यॆलि पानॖ जान
         आसि
3. मु: जान गव सुय युस जान
         वरतावि
    अ: जान्यर छु नॖ सिरिफ़ वनॖनॖ
         सॗती आसान बऺल्कि बऻविथ
         द्युन प्यवान
4. मु: जऻहिल बटन छु ठोकुर
         च़लनोवमुत
    अ: जहालथ छि न्वकसान वातॖ
         नावान
5. मु: जंगस मंज़ छि ठील्य ति तॖ
         गूल्य ति
    अ: यॆति जान फ़ऻयदॖ छ़ान्डव
         तति छु न्वकसानॖ खऻतरॖ ति
         तयार रोज़ुन
**************************
1. ठपॖ..Stamp/Seal/Signer
2. ठकॖ ठकॖ करुन.......Pomp
                             and show
3. ठग.....Robber/Swindler/
              Cheat/A trickster
4. ठंडॖ......Cold drink
5. ठऻन्ठुर....Maker of hard-
                  ware vessels
6. ठठॖ......Joke/Laughter
7. ठिकानॖ.....Residence/
             Address/Destina-
             tion
8. ठिकॖरावुन....To place/To
             place properly/
             To stand firmly
9. ठुमरी....Light classical
             song/Music to
             which it is set
10. ठुकुर....Stumble/Wrong
             step/Misfortune
**************************
        गीता ज्ञान :अध्याय 14
यॆम ज़ोन सु छु म्योन स्वरुप प्रावान, आदि स्रेष्टी छु नॖ पऻदॖ सपदान। न प्रलयकालॖ व्याकुल सपदान।
वॊन भगवानन गीता ज्ञान
**************************
प्रोन प्रानान तॖ नॊव नवान। यि छि परम्परा। अथ मंज़ छु यि इन्सान ति पानय बदलान रोज़ान वखतस सॗत्य सॗत्य। ॳम्यसॖन्द्य ख़याल बदलान रोज़ान। व्वथुन बिहुन।ख्यन-च्यन। ॳम्यसॖन्द्य यार दोस्त, अंग-ॴश्यनाव बदलान रोज़ान। बदलाव छु जान। तरक्की हॖन्ज़ निशऻनी मगर रिशतन मंज़ बदलाव युन छु इन्सानस ॳजीब ह्यु लगान। ख़ास तोर पऻठ्य यारन दोस्तन मंज़ बदलाव छु इन्सानस कुनि कुनि सातन हऻरऻनी हुन्द सबब बनान। बॖ छुस पनुन तजरु्बॖ वनान मगर विश्वास छुम ज़ि यि तजरुबॖ आसि प्रथ कान्ह पनॖनि वऻन्सि मंज़ आमुत करान। म्योन ज़्युर यानि म्यऻनिस न्यॆचविस सॖन्दिस न्यॆचवस सुन्द दोस्त आव द्वह अकि म्योन गरॖ पनॖनिस दोस्तस यानि म्यऻनिस ज़्युरिस मेल्यनि। म्यॆ प्रुछ़ वैसे ही ॳमिस नाव पताह तॖ नन्योम ज़ि ॳमिस बचॖसुन्द बऺड्यबब ओसुमुत ओस म्योन ल्वकचारुक दोस्त युस वखतॖक्यव दक्कव सॗत्य ओस म्यॆ मऺशथॖय गोमुत। यि बच्चॖ बन्यव सबब तॖ ॳस्य ल्वकचारॖक दोस्त मील्य ब्यॆयि अकि फिरि मगर बदलेमॖत्य ॴस ॳस्य द्वनवय कथि बाति रंग्य। शायद छु यी वख्तक तक़ाज़ॖ। व्वंय छि नॖ कॆंह अंग ॴश्यनाव परज़ॖनावनय यिवान। यॊदवय कुनि खान्दरस मंज़ या कुनि हवनस ववनस मंज़ कांह प्रोन यार दोस्त या कांह अंग ॴश्यनाव समखान ति छु, अख ॳकिस परज़ॖनावनस छु वख्त लगान तॖ कथ करनस ति छि गॖठ-गोजि गछ़ान। सौंचान छि ज़ि कथ हाय करव ज़ि ज़ानि दय जवाबस मंज़ ॳम्यसुन्द रॊख क्युत आसि। मगर अख कथ छि वऻयिथ ज़ि मन छु ख्वश गछ़ान यॆलि कांह प्रोन मेलान छु।  सु चीज़ ॴस्यतन, जाय ॴस्यतन, यार दोस्त ॴस्यतन या अंग ॴश्यनाव ॴस्यतन। प्रऻनिस मेलनस सॗत्य छु प्रोन ल्वकचार ब्यॆयि फीरिथ यिवान।
**************************
 "सदाशिव। सदाधार। सत्कल्पपादपो भवान्।
सद्-बुद्धिं देहि मे नाथ। यतस्त्वं करुणापर:।।"
पऺरिव यि मंत्र ति दॊहय
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)