25.07.2019

25.07.2019 श्रावणॖ (सावन) गटॖ पछॖ (कृष्ण पक्ष) ॴठम(देवादेव) ब्रसवार (वीरवार/ब्रहस्पथवार), श्री सप्तर्षी सम्वत 5095, राश मेष (चलान) ऋतु वर्षा (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात **************************
1. मु: लाफ़ गऺछ़्यनम माफ़
    अ: पनॖनि ताक़तुक बे-जा
          इस्तिमाल करनुक एहसास
          गछ़ुन
2. मु: लाम लगॖन्य
    अ: लऻन लगॖन्य/अख ॳकिस
        पतय कुनि जायि दवुन प्यॊन
3. मु: लऻर ख्यवान पानस डाकर
         त्रावान ब्यॆयिस
    अ: मग़रूरियत हावॖन्य/हंगॖ तॖ
         मंगुक थज़्ज़र हावुन
4. मु: लऻर कमव ख्यॆयि, परद्यव,
         म्यॆ दॊप पनॖन्यव मा।
    अ: पनॖनि सुन्द जान्यर न ज़रुन
        पनॖनिस फ़ऻयदॖ न वातॖनावुन
5. मु: लऻर्य किन्य लोहूर
    अ: ज़ेछर द्युन/वथ तॖ कथ
          ज़ेठॖरावॖन्य
**************************
1. बादाम..... Almond
2. डून.........Walnut
3. च़ूंठ.........Apple
4. टंग.........Pear
5. गिलास....Cherry
6. च़नुन.......Peach
7. संगतरॖ.....Orange
8. च़ेर.........Apricot
9. खज़ॗर......Date
10. बमच़ूंठ....Quince
**************************
      गीता ज्ञान :अध्याय 14
छु क्युथ तस आच़ार व्यच़ार आसान, ब्यॆयि सु कमि कॖस्मॖक्य व्वपाय करान।
यॆमि सॗत्य त्रॆयव लूकव म्वकलान।
वॊन भगवानन गीता ज्ञान
**************************
वॊहरवोद यानि ज़ा-द्वह छु ॳस्य त्रॆयव रंगव मनावान। ग्वडन्युक गव कऻशुर वॊहरवोद। कऻशुर यानि जंत्री हिसाबॖ। अथ वॊहरवऻदिस मंज़ छु यिवान तिथि, रयथ,वार, राश, न‌क्षत्र। यि तिथि गव सु यथ प्यठ शुर छु थनॖ प्यवान। यि तिथि छु जंत्री मुतऻबिक रावान ति मंज़ॖ मंज़ या यॆलि अकुय तिथि द्वयि लटि छु कुनि कुनि सातॖ यिवान तॖ पताह छु नॖ लगान सऺहल सऺहल ज़ि वॊहरवोद छा यिवान ग्वडनिकिस किनॖ दॊयमिस तिथियस प्यठ मानॖनॖ। इन्सान छु दु-च़्यॆतिस गछ़ान। हालांकि जंत्री मंज़ छु वुन्युखताम आमुत हावनॖ ज़ि कमि तिथियुक वॊहरवोद कथ तिथियस प्यठ छु यिवान मगर यॊदवय जंत्री आसि नॖ अथस मंज़, मुश्किल छु गछ़ान सऺही तिथि ज़ानुन। कुस तिथि कर छु रावान, क्याज़ि छु रावान, अकुय तिथि कर छि ज़ॖ गछ़ान, या क्याज़ि छि गछ़ान यि ज्ञान छु ज्योतिषाचार्यन निशी योत, असि छॆ नॖ अमिच ब्वय कॆंह। मगर यि परेशऻनी छॆ नॖ दॊयिमि कॖस्मॖकिस पंचान्गस मंज़, यानि अंग्रीज़-वॊहरवोद यानि कृश्चन कैलैंडरस मंज़। तमि पंचान्गॖ मुतऻबिक छु अख मुक़र्र तिथि यिवान मानॖनॖ युस न रावान छु तॖ न दॊयि लटि अकुय तिथि गछ़ान छु। यि तिथि याद रोज़ुन छु सऺहल।
अथ मंज़ छु यिवान सिरिफ तिथि तॖ रयथॖय योत। यि तिथि समजनस मंज़ छॆ नॖ छ़ऻन्ड प्यवान दिन्य जंत्रीयन या प्रछ़ुन प्यवान ज्यॊतिषण। कथ छि जऻरी
**************************
"हा च़्यता कवॖ छुय लॊगमुत परमस,
कवॖ गॊय अपज़िस पज़्युक ब्रौंत,
द्वशि-बॊज़ वश कॊरनख पर-धर्मस
यिनॖ-गछ़नॖ ज़्यनॖ-मरनॖस क्रौन्त"
पऺरिव यि लल वाख ति दॊहय
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
   भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)