24.07.2019

24.07.2019,श्रावणॖ (सावन) गटॖ पछॖ (कृष्ण पक्ष)सतम(देवादेव)(सप्तमी), ब्वदवार (बुधवार),श्री सप्तर्षी सम्वत 5095, राश मेष (दुहचि 3.41 बजि प्यठॖ), ऋतु वर्षा (चलान)..अज़ म्वकलि द्रठॖपऻन्च़ुक (पंचक) ति
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: गाव दी नॖ वॊछ़ ति ह्यॆयि नॖ
    अ: न करि ब्यॆयिस मदद न
         तुलि पानस फ़ऻयदॖ
2. मु: गाव ति चावॖन्य तॖ वॊछ़ ति
         रंज़नावुन
    अ: स्व कऻम करॖन्य यॆमि सॗत्य
         पानस ति फ़ऻयदॖ वाति तॖ
       ब्यॆयिस ति न्वकसान गछ़ि नॖ
3. मु: गानि रोव रून तॖ कमि
         शहरुक
   अ: यॆलि कऻन्सि हुन्द थव पताह
        छ़ारुन सऺहल आसि नॖ
4. मु: गाम छु ख़ाम
    अ: गऻमी ज़िन्दगी छि क्रॗठ
         आसान
5. मु: गाटॖ छा नाटॖ बाज़रॖ ह्यॆयज़ि
         मऺल्य
    अ: अकॖलमऺन्दी छि दय सुन्द
          द्युत
**************************
1. क्वकुर.....Cock
2. क्वकॖर.....Hen
3. बतुख......Duck
4. गाव........Cow
5. दान्द.......Bull
6. मऻश....... Buffalo
7. कठ........Sheep
8. छ़ावॖज.....Goat
9. मऺछ........Fly
10. तुलॖर.....Bee
**************************
        गीता ज्ञान  :अध्याय 14
         अर्ज़न दीव वनान
अर्ज़न छुस वनान ही भगवानॖ,
प्वरुश किथॖ पऻठ्य ग्वन ॳतीत बनान
छि तसंद्य कम कम लक्षण आसान
वॊन भगवानन गीता ज्ञान
**************************
तनाव छु ज़बर्दस्त अज़कल प्रथ इन्सानस। ल्वकट्यन शुर्यन प्यठॖ बऺडिस बुज़र्गस ताम। परनॖ रंग्य, ख्यनॖ-च्यनॖ रंग्य, पलवव-दलवव रंग्य, व्वथनॖ-बॆहनॖ रंग्य, देखा-दीखी रंग्य, मान-मान अख ॳकिस सॗत्य करनॖ रंग्य, कमावनॖ रंग्य, ख़र्चावनॖ रंग्य, शुर्य रछनॖ रंग्य, स्वम्बॖरावनॖ रंग्य वगैरा वगैरा। अज़ आयि अख ब्याख बुरॖ ख़बर ज़ि कुस ताम अश्वनी कला गव स्वर्गस बंगलोरॖ जहाज़स मंज़ तॖ जहाज़ॖ आव एमरजैन्सी मंज़ इन्दौर हवऻई अड्डस प्यठ लैंड करनावनॖ। अशवनी सऻबस ओस ब्यॆयि ति कॊत ताम वातुन मगर दिलॖच दुबराय गऺयस बंद तॖ वऺटॖन ॳछ। फोटू तलॖ ओस जवान बासान। नून आस्यस मऻलिस माजि तॖ गरिक्यन बाकॖय बऻच़न प्योमुत यि ख़बर बूज़िथ। ज़ॆहनी तनाव छु बॊड वजह अमि कॖस्मऺकि मोतुक म्यॆ बासान। यिथय पऻठ्य छु सऻनिस समाजस मंज़ ति वारिहान म्यान्यन बायन ब्यॆन्यन हदॖ ख्वतॖ ज़्यादॖ तनाव ब्यॊन ब्यॊन रंग्य अज़ कल नज़र यिवान। तनाव-ग्रस्त छि सऻरी ॳस्य मगर बास छि नॖ दिवान अख ॳकिस मगर इन्सानॖ सॖन्दि बुथ्य तलॖ छु ननान ज़ि सॖ कमन ग्वतन छु गोमुत। ॳस्य छि आमॖत्य वलनॖ पूरॖ पऻठ्य मोह-ज़ालस मंज़। यॊत ताम नॖ ॳस्य पनुन स्वभाव बदलावव, पनॖन्यन ख़यालन फ्युर दिमव, पनॖनिस मनस मंज़ तृप्ती अनव, तॊत ताम रोज़ि असि यि तनाव छ़ायि हॖन्द्य पऻठ्य सॗत्य सॗत्य।
**************************
"ललिथ-ललिथ वदय ब्व वाय
च़ित्ता मुहॖच प्ययी माय
रोज़ी नो पतॖ लोह-लंगरॖच छ़ाय
निज-स्वरूपॖ क्या मॊठुय हाय"
पऺरिव यि लल वाख ति दॊहय
**************************
कऻशुर ह्यॆछव कऻशुर परव
कऻशर्य पऻठ्य पानॖवुन्य कथबात करव
**************************
  नऺविव तॖ फॊलिव
   भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)