19.07.2019

19.07.2019 श्रावणॖ गटॖ पछॖ (कृष्ण पक्ष) द्वय(देवादेव)(द्विती)
शॊकुरवार (शुक्रवार/जुम्मा)श्री सप्तर्षी सम्वत 5095,राश कुम्भ (दुह्यचि 2.57 बजि प्यठॖ),ऋतु वर्षा(चलान)..ॳज़्यकि प्यठॖ लॊग द्रठॖपऻन्च़ुक (पंचक) ति
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: तमाह छु तावन
    अ: लालॖच करनॖ सॗत्य छु
         ॴख़रस न्वकसान गछ़ान
2. मु: ॴबो प्यॆयियो बलाय मंद-
         छि पतॖ छय ख़जालथ
    अ: अख ॴब छु वारिहान
         ॴबन ज़न्म दिवान तॖ
         ब्यॆयि ख़जॖल करनावान
3. मु: ग़र्ज़मन्द छु फॊटुमुत हॊछि-
         मच़ि क्वलि
    अ: ग़र्ज़मन्द इन्सान छु सख़
         न्वकसान तुलान
4. मु: ग़र्ज़मन्द दीवानॖ
    अ: ग़र्ज़मन्द छु नॖ पनुन हाजथ
         कडनॖ विज़ि अक्लि हॖन्ज़
         कथ या कऻम करान
5. मु: फ़रहाद बॖड
    अ: स्व बॖड यस खॊडॖफ्यॆचि
         आसन
**************************
1. च़ॖ.......You
2. च़ॖन्य...Piece of charcoal
3. च़ॖनुन.....Peach
4. च़ॖनुन कुल....A peach tree
5. च़ॖनॖनपोश.A peach flower
6. च़ापुन.....To chew/To
                  munch
7. च़ाफ़...... Chewing
8. च़ाफ़ द्युन....To chew/To
                      munch
9. च़ाटॖहाल..... School
10. च़ाठ.....Pupil/Disciple/
                Student/Scholar
**************************
       गीता ज्ञान  :अध्याय 14
यॆलि मनुश सतोग्वनॖ वक्तॖ मरान, उत्म कर्मॖ वानन हॖन्ज़ जाय प्रावान। स्वर्ग आदिलूकन छु प्राप्त सपदान।
वॊन भगवानन गीता ज्ञान
**************************
राथ यानि अर्दाह जुलाई 2019 गव ब्याख अख नामावार, महानुभाव प्वरुष स्वर्गस। श्री अर्ज़न नाथ कौल साहिब सऻब छुस नाव। कऺशीरि मंज़ ओस वारियाह समय ब्रौंठ श्रीनगरॖ करफऺलि-मऺहलॖ रोज़ान तॖ दिल्लि यिथ वारिहान जायन रोज़नॖ पतॖ ओस शिपरा सन सिटी मंज़ मुस्तकॖल तोर पऻठ्य रोज़ान। कौल सऻबन दपान छि तन मन सान पनॖनि समाजिच सीवा कऺरमॖच़। आल इन्डिया कश्मीर समाज संस्थायि सॗत्य छु रूदमुत जुडिथ। संसदस मंज़ ओस सरकऻर्य नोकरी करान तॖ रिटायर गऺछ़िथ ओस पनॖनिस समाजिच सीवा करान रूदमुत। ॳम्यसॖन्ज़ अर्धांगनी श्रीमती ललिता जी ॴस वारियाह कालॖ ब्रौंठॖय स्वर्गस गऻमॖच़। तस सॖन्दिस नावस प्यठ ओस कौल सऻबन अख नगॖद यनामॖ थोवमुत युस दिनॖ ओस यिवान तऺमिस बचस यॆमिस पनॖनि माजि ज़्यव यानि कऻशुर वनॖनस मंज़ महऻरियथ आसिहे। यि यनामॖ ओस यिवान दिनॖ जे के विचार मंच संस्थाय दऺस्य महा शिवरात्रिकिस महोत्सव मोकस प्यठ। कौल सऻबुन योगदान दपान रूदमुत छु ब्यॊन ब्यॊन संस्थायन मंज़ विज़ि विज़ि। कौल सऻब छि रूद्यमॖत्य मददगार वारियाहि रंग्य पनॖनिस कऻशिर समाजस मंज़। अज़ गऺयि तिम पनॖन छाप त्रऻविथ पनुन असली गरॖ वैकुण्ठस कुन। गाज़ीपुरॖ शुमशान-घाटॖ कॊर ॳमिस दाह संस्कार राथ शामन पांछ़ बजे।
द्राव पनुन इतिहास रचऻविथ तॖ पनॖन रॖत्य कर्म कऺरिथ। तऺम्यसॖन्ज़न कॆंच़न जान काम्यन अंद वातॖनावुन छु सोन फ़रज़ न तॖ रोज़ि सु कर्ज़ सान्यन फ्यॆक्यन प्यठ। नेरान अकि फिरि फ़ेरान नॖ वापस। फ़ेरान मगर तमिकुय कॆंह कालस। नम गछ़ान ॳछ यॆलि फ्युर लगान ख़यालस, दमफुट्य गछ़ान लगान ब्यॆयि तऺथ्य जंजालस।
**************************
"तलॖ छुय ज़्युस तय प्यठॖ छुख नच़न।
वनतॖ मालि मन क्यथॖह पच़न छुय
सोरुय सॊम्बरिथ यॆति छुय म्वच़न
वन तॖ मालि अन किथॖ रोच़न छुय।"
पऺरिव यि लल वाख ति दॊहय
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)